Як гурӯҳ хатмкунандагонро дар Душанбе барои таҷлили “занги охир” танбеҳ дода, падару модарони онҳоро аз 216 то 504 сомонӣ ҷарима бастаанд. Дар ин бора аз милитсияи пойтахт ба “Азия-Плюс” иттилоъ доданд.
Ба гуфтаи манбаъ, як гурӯҳ хатмкунандагони мактаби №89-и ноҳияи Сино баъи тамом шудани дарсҳо дар охири моҳи май дар тарабхонаи “Самандар”-и пойтахт шабнишинӣ барпо карда, “занги охир”-ро таҷлил кардаанд.
“Азбаски таҷлили “занги охир” манъ аст, қоидавайронкунии онҳо ошкор ва барои танбеҳашон дар мактаби мазкур суди сайёр баргузор карда шуда, ин масъала баррасӣ гардид”, – гуфт ҳамсӯҳбати мо.
Ғайр аз ин, бар зидди волидони хонандагон мутобиқи моддаи 90-и Кодекси ҳуқуқвайронкунии маъмурӣ барои “иҷро накардани уҳдадориҳо оид ба парасторӣ, таълим ва тарбияи ноболиғон” парвандаи маъмурӣ боз шудааст.
Бар асоси ин модда волидони хонандагон аз 3 то 7 нишондиҳанда барои ҳисобҳо (аз 216 то 504 сомонӣ) ҷарима шудаанд.
Гуфтан ба маврид аст, ки соли 2015 Вазорати маориф ва илми Тоҷикистон муддати таҷлили “Занги охир”-ро 45 дақиқа – аз соати 8:00 то 8:45 муқаррар намуд.
Он замон баргузор кардани ҳама гуна маъракаҳои ботантана, аз ҷумла баргузории чорабинӣ дар тарабхонаҳо, ҷамъоварии маблағ барои туҳфа ба муаллимон ва сайру гашти оммавиро манъ карда буд.
