Бо гузашти беш аз 3 моҳ пайвандони як оилае, ки дар Конибодом кушта шуданд, мегӯянд, қотили воқеӣ пайдо нашудааст ва барои пайдо кардани он омодаанд 100 ҳазор сомонӣ диҳанд. Падари хонавода, ки он замон дар баъзе расонаҳо чун қотили 4 узви хонадони худ муаррифӣ гардида буд, ҳамакнун ҷабрдида эътироф шудааст. Аммо мақомот қазияро шарҳ намедиҳанд.
Ҳодисаи куштори пурсарусадои 5 узви як хонавода дар кӯчаи Комил Ёрматови шаҳри Конибодоми вилояти Суғд шаби 29 ба 30-юми марти 2024 рух дод. Он замон баъзе расонаҳо иттилоъ дода буданд, ки Муҳиддин Шарифови 65-сола ҳамсар, келин ва ду набераашро буғӣ карда кушта, пасон худро ба дор овехтааст. Вале мақомот ҳодисаро расман шарҳ надоданд.
Ҳамакнун, бо гузашти беш аз 3 моҳ, Кабир Шарифов, писари Муҳиддин Шарифов, гумонбар ба қатли аъзои хонадон, мегӯяд, аз таҳқиқи қатли аъзои хонаводааш қаноатманд нест.
“Аз куштори аъзои оилаамон беш аз се моҳ сипарӣ шуд, аммо то ҳол қотили воқеӣ пайдо нашудааст”, – зикр мекунад Кабир Шарифов.
Ӯ, ки замони рух додани ҳодиса дар хориҷа қарор доштааст, мегӯяд, ҳеҷ бовар надорад, ки падараш қотил бошад, зеро пас аз куштор аз хона маблағу тилло гум шудааст ва мантиқан, падари, тибқи фарзияи аввал ироашуда, муттаҳам ба куштор, ки худ низ ҷон бохтааст, наметавонист пулу тиллоро дуздад.
“Мо – фарзандон даҳҳо бор ба мақомот даъват ва бозпурсӣ шудем. Ҳар ҳуҷҷату далеле, ки дар даст доштем, пешниҳод кардем. Деворе, ки изи пой ва хароша дошт, низ нишон додем. Дар бораи гум шудани маблағу тилло ҳам иттилоъ додем, аммо то ҳол асли қазия рӯшан нашудааст”, – мегӯяд Кабир Шарифов.
Ӯ мегӯяд, падараш бемор ё майзада набуд. Ҳамчунин, пас аз марг дар баданаш захмҳои зиёд ва дар гарданаш изи корд буд.
Охирин иттилои тоза, ки дирӯз, 3-юми июл Кабир Шарифов расонид, бекор кардани иттиҳоми “қотил” нисбати падараш будааст.
“Ҳафтаи гузашта аз додситони шаҳри Конибодом хабар доданд, ки бегуноҳии падарам собит шудааст ва иттиҳоми “қотил” нисбати ӯ бекор гардидааст”, – гуфт Кабир Шарифов.
Дар додситонии шаҳри Конибодом, ки таҳқиқи кушторро ба зимма дорад, касе ҳозир нашуд ҳодисаро шарҳ диҳад.
Дар Шӯъбаи ВКД дар шаҳри Конибодом гуфтанд, ки дар робита ба ин куштор то ҳол касе боздошт нашудааст.
Фарҳод Носиров, корманди ин шуъба 3-юми июл дар суҳбат ба “Азия-Плюс” гуфт, “ҷиҳати ошкор кардани ҷинояти куштори оилаи Шарифовҳо корбарӣ рафта истодааст, аммо то имрӯз ягон нафар ҳамчун гумонбар боздошт нашудааст”.
Дар ҳамин ҳол, Кабир Шарифов ва додари ӯ Каримҷон Шарифов мегӯянд, омодаанд барои пайдо кардани қотили аъзои оилаашон – падараш Муҳиддин Шарифови 65-сола, модараш Марям Шарифоваи 60-сола, ҳамсараш Фирӯза Шарифова ва фарзандон Абӯбакр Шарифов ва Азиза Кабирзода 100 ҳазор сомонӣ пардохт кунанд.
Бояд зикр кард, ки ин ягона ҳодисаи куштори пурсарусадои аъзои як оила дар шаҳри Конибодом нест. Аз моҳи март то имрӯз танҳо бо ҳисоби мақомот 5 куштори оилавӣ дар шаҳри Конибодом рух дод, ки дар натиҷа 15 нафар кушта шуданд. Кушторҳои падарпайи оилавӣ дар шаҳр ва ошкор нашудани ин ҷиноятҳои махсусан вазнин мардумро ҳаросзада кардааст.
Ҳамчунин, дар шабакаҳои иҷтимоӣ наворҳое (аз камераҳои назоратӣ бардошта шудааст) мечархад, ки дар он дида мешавад, шахсони ниқобпӯш кӯшиши ба хонаҳои мардум воридшавӣ мекунанд. Ин ҳолат боис гардидааст, ки мардуми баъзе аз кӯчаҳои шаҳри Конибодом ситод ташкил карда, то саҳар дар кӯчаҳо навбатдорӣ намоянд.
Аммо мақомот ин ҳамаро расман шарҳ намедиҳад.
