ЯК РӮЗИ ТАЪРИХ – 6 ДЕКАБР
Соли 2002 – Бонки Ҷаҳонӣ бори аввал тасмим гирифт, ки барои татбиқи барномаи коҳиш додани камбизоатӣ дар Душанбе 800 ҳазор доллар грант ҷудо кунад.
Соли 2010 – дар шаҳри Душанбе байни вазоратҳои корҳои дохилии Ҷумҳурии Тоҷикистон ва Федератсияи Русия созишномаи ҳамкорӣ ба имзо расид.
Соли 2012 – дар минтақаи истироҳативу саёҳатии Ҳисор – дараи Алмосӣ Академияи футболи дастаи "Истиқлол" ифтитоҳ ёфт.
Соли 2015 – Дар ноҳияи Фирдавсии пойтахт бинои Маркази муосири солимгардонӣ ва тавонбахшии «Ҳаёт» ифтитоҳ гардид.
Соли 2017 – Дар шаҳри Душанбе масоили дурнамои ҳамкории Тоҷикистон ва ЮНЕСКО муҳокима шуд.
Соли 2019 – Таҳти раёсати Сарвазири Ҷумҳурии Тоҷикистон Қоҳир Расулзода ҷаласаи Кумитаи тадорукот оид ба таҷлили ҷашни 5500-солагии Саразм баргузор гардид.
Саразм яке аз нахустин ёдгориҳои давраи ориёӣ, намунаи беҳтарини тамаддун дар Суғд буда, соли 1976 аз ҷониби бостоншиноси тоҷик Абдуллоҷон Исоқов кашф гардид. Ҳоло он яке аз қадимтарин ёдгориҳои Осиёи Марказӣ ба ҳисоб рафта, дар соҳили чапи дарёи Зарафшон, дар сари шоҳроҳи Панҷакент-Самарқанд, дар наздикии деҳаи Саразм, 15 км ғарбтари шаҳри Панҷакент ҷой гирифтааст. Он ба хотири арзиши бебаҳои фарҳангӣ доштанаш соли 2010 ба Феҳристи мероси ғайримоддии Юнеско ворид гардид.
Соли 2023 – “Ҷашни Сада” ва “Тазҳиб – санъати зарҳалкорӣ” ба Феҳристи мероси ғайримоддии башарият ворид карда шуданд.
Ҷашни Сада яке аз ҷашнҳои қадимаи мардуми ориётабор ба шумор меравад. Моҳияти ҷашни Садаро пирӯзии рӯшноӣ бар торикӣ, гармо бар сармо ва некӣ бар бадӣ ташкил дода, мардум онро бо афрӯхтани гулханҳои бузург таҷлил мекарданд.
Сада ҳамасола дар рӯзи 10-уми моҳи баҳмани солшумории ҳиҷрии хуршедӣ таҷлил мегардад, ки ба 30-юми январи солшумории мелодӣ рост меояд.
Тазҳиб, зарандуд ё тиллокориро метавон маҷмуае аз нақшҳои бадеъ ва зебо донист, ки наққошону музаҳҳабон барои ҳарчӣ зеботар кардани китобҳои мазҳабӣ, Қуръон, китобҳои таърихӣ, Девонҳои ашъор, ҷунгҳои ҳунарию қитъаҳои зебои шеърӣ ба кор мебурданд.
Соли 2020 – БОР дар ҳаҷми 105 миллион доллар кӯмаки бепулро барои ислоҳот ва устувории молиявии бахши энергетика дар Тоҷикистон тасдиқ кард.
ШАХСИЯТҲО – 6 ДЕКАБР
Соли 1925 – зодрӯзи Ҳоҷиумар Қосимов, навозанда ва устоди рақс
Соли 1930 – мавлуди Бобохон Иномов, ҳуқуқшиноси тоҷик
Соли 1931 – зодрӯзи Ризвоншо Игмолшоев, сарояндаи сурудҳои халқӣ, Ҳунарманди мардумии Тоҷикистон
Соли 1939 – зодрӯзи Мубинҷон Юсуфӣ, нависанда, Корманди шоистаи Тоҷикистон
Соли 1940 – мавлуди Соҳибназар Ғоибназаров, китобдор, мудири Китобхонаи миллии Тоҷикистон дар солҳои 1987 – 1998
Соли 1962 – зодрӯзи, Гулчеҳра Қоҳирова, ахтаршиноси тоҷик, доктори илмҳои физика ва математика
Соли 2016 – Мирзо Файзалӣ, Ҳунарманди халқии Тоҷикистон дар 75-солагиаш аз олам даргузашт
Соли 2023 – Амиршо Миралиев, ходими давлатӣ ва яке аз чеҳраҳои матраҳи сиёсати Тоҷикистон дар 77-солагӣ аз олам даргузашт.
ВАЗЪИ ОБУ ҲАВО БАРОИ 6 ДЕКАБР
Дар вилояти Суғд – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд. Шамол аз самти шарқ бо суръати 5-10м/с мевазад. Ҳарорати ҳаво дар водиҳо шабона -3+2º, рӯзона 4+9º гарм, дар ноҳияҳои кӯҳӣ шабона 7-12º хунук, рӯзона -2+3º мешавад.
Дар вилояти Хатлон – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд. Шамол аз самти шарқ бо суръати 4-9м/с мевазад. Ҳарорати ҳаво дар водиҳо шабона -2+3º, рӯзона 9+14º гарм, дар доманакӯҳҳо шабона 0-5º хунук, рӯзона 4+9º гарм мешавад.
Дар шаҳру ноҳияҳои тобеи ҷумҳурӣ – Ҳавои тағйирёбандаи бебориш пешгӯӣ шуда, дар баъзе ноҳияҳо тормеғ мефарояд. Шамол аз самти шарқ бо суръати 4-9м/с мевазад. Ҳарорати ҳаво дар водиҳо шабона -2+3º, рӯзона 8+13º гарм, дар ноҳияҳои кӯҳӣ шабона 2-7º хунук, дар баъзе ноҳияҳо то 12-14º хунук, рӯзона 1+6º гарм, дар баъзе ноҳияҳо то 3-5º хунук мешавад
Дар Вилояти Мухтори Кӯҳистони Бадахшон – Ҳавои тағйирёбандаи бебориш пешгӯӣ мешавад. Шамол аз самти шарқ бо суръати 4-9м/с мевазад. Ҳарорати ҳаво дар ғарби вилоят шабона 7-12º хунук, дар баъзе ноҳияҳо то 2-4º хунук, рӯзона -3+2º, дар баъзе ноҳияҳо то 6+8º гарм, дар шарқи вилоят шабона 24-29º хунук, дар баъзе минтақаҳо то 38-40º хунук, рӯзона 10-15º хунук мешавад.
Дар шаҳри Душанбе – Ҳавои тағйирёбандаи бебориш пешгӯӣ шуда, тормеғ мефарояд. Шамол аз самти шарқ бо суръати 4-9м/с мевазад. Ҳарорати ҳаво шабона -1+1º, рӯзона 11+13º гарм мешавад.
Дар шаҳри Хуҷанд – Ҳавои тағйирёбандаи бебориш пешгӯӣ шуда, тормеғ мефарояд. Шамол аз самти шарқ бо суръати 5-10м/с мевазад. Ҳарорати ҳаво шабона 0-2º хунук, рӯзона 7+9º гарм мешавад.
Дар шаҳри Бохтар – Ҳавои тағйирёбандаи бебориш пешгӯӣ шуда, тормеғ мефарояд. Шамол аз самти шарқ бо суръати 4-9/с мевазад. Ҳарорати ҳаво шабона -1+1º, рӯзона 12+14º гарм мешавад.
Дар шаҳри Хоруғ – Ҳавои тағйирёбандаи бебориш пешгӯӣ мешавад. Шамол аз самти шарқ бо суръати 5-10м/с мевазад. Ҳарорати ҳаво шабона 9-11º хунук, рӯзона -1+1º мешавад.
