Дар бархе истгоҳҳои шаҳри Душанбе лавҳаҳои электронӣ барои гирифтани маълумот аз равуои нақлиёти ҷамъиятиро насб кардаанд. Ин чист ва чӣ гуна кор мекунад? Аз масъулон муайян кардем.
Аз корхонаи “Шаҳри бехатар”, як ниҳоди назораткунандаи ҳаракат дар роҳҳои пойтахт ба “Азия-Плюс” гуфтанд, ки лавҳаҳои электронӣ дар доираи лоиҳаи “Низоми электронии идоракунии нақлиётҳои мусофиркашони ҷамъиятӣ” насб шудаанд. Дар ин лавҳаҳо рақами нақлиёти ҷамъиятие, ки аз истгоҳ мегузарад, хатсайри он ва вақти расиданаш ба истгоҳ навишта шудааст. Ҳамчунин, лавҳа сана, вақт ва ҳарорати ҳаворо низ нишон медиҳад.
Айни ҳол, дар 10 истгоҳи Душанбе ба таври озмоишӣ лавҳаҳои электронӣ насб шудаанд. Ин лавҳаҳоро метавон дар истгоҳҳои “Таваллудхонаи №1”, “Маркази миллии тибии ҶТ «Шифобахш»”, “Боғи ҳайвонот”, “Маркази савдои «Тоҷикистон»”, “Телевизиони «Сафина»”, “Майдони сарҳадчиён”, “Донишгоҳи тиббӣ”, “Мағозаи «Олами китоб»”, “Беморхонаи «Ёрии таъҷилӣ»” ва “Маркази савдои «Гулистон»” дид.
Ба иттилои масъулони лоиҳа, лавҳаҳои электронӣ худкор буда, дар асоси маълумоти GPS-и дар ҳар нақлиёт насбшуда фаъолият мекунанд. Аз ин рӯ, вақти омадани нақлиёт дар лавҳа дақиқ нишон дода мешавад.
“Дар марҳилаҳои ояндаи лоиҳа зиёд кардани шумораи лавҳаҳои маълумотиро, ки пурра истгоҳҳои нақлиёти ҷамъиятиро фаро мегирад ва илова карадни маълумот оид ба микроавтобусҳои шаҳр дар нақша аст” – гуфтанд масъулони лоиҳа.
Бояд гуфт, ки дар шакли имрӯзаашон бори аввал лавҳаҳои электронӣ дар истгоҳҳои Душанбе ҳанӯз соли 2017 пайдо шуда буданд. Хабари насби онҳо бошад, аз ин ҳам пештар. Чаро то имрӯз лавҳаҳои электронӣ дар тамоми истгоҳҳои пойтахт насб нашудаанд ва амалишавии ин лоиҳа ҳанӯз дар зинаи озмоиш аст, маълум нест.
