Вазири саноат ва технологияҳои нави Тоҷикистон Шералӣ Кабир зимни нишасти матбуотии рӯзи 6 феврал дар Душанбе изҳор дошт, ки корҳои бевосита оид ба бунёди технопарки муштараки саноатӣ (индустриалӣ)-и Тоҷикистону Русия дар пойтахти Тоҷикистон соли равон оғоз мешаванд.
Ба гуфтаи ӯ, дар ояндаи наздик имзои созишномаи дахлдор миёни ду кишвар дар назар буда, сипас бунёди технопарк оғоз мегардад.
Вазир зикр кард, ки технопарки Душанбе дар заминаи собиқ корхонаи мошинсозӣ пас аз таъмиру навсозии биноҳои дар он воқеъбуда бунёд мегардад. “Ин имкон медиҳад, ки технопарк дар муҳлатҳои кӯтоҳтар ба истифода дода шавад”, – таъкид дошт ӯ.
Шералӣ Кабир ҳамчунин зикр кард, ки барои технопарки оянда таҷҳизоти муосир харидорӣ ва насб мешавад.
Вазир бар ин назар аст, ки “имтиёзҳоли хуб дар пардохти андоз” ба ҷалби сармоягузорон имкон медиҳад.
Ба сурати умум, гуфт вазир, бо супориши президент дар ҷумҳурӣ бунёди зиёда аз 30 адад чунин паркҳо ба нақша гирифта шудааст.
Шералӣ Кабир таъкид дошт, ки технопарки Душанбе тибқи намунаи технопарки индустриалии Қазон сохта мешавад, ки ба гуфтаи ӯ, “барояш хеле маъқул аст”.
“Лоиҳаҳо оид ба бунёди ҳашт технопаркҳо аллакай амалӣ шуданд, лекин онҳо начандон бузург буда, таъиноти маҳаллӣ доранд”, – иброз дошт вай.
Ҳамчунин ба қавли вазир, дар мавриди бунёди технопарк бо Чин низ гуфтушунидҳо ҷараён доранд.
“Мо дар марҳилаи ниҳоии гуфтушунидҳо қарор дорем ва фикр мекунам, ки аллакай ҳамин сол ба корҳои бунёди парк шурӯъ мекунем”, – илова намуд ӯ.
Дар бораи кадом маҳсулот истеҳсол шудан дар ин парк вазир мушаххасан чизе нагуфт.
Дар бораи нияти дар Душанбе бунёд намудани парки муштараки саноатии Тоҷикистону Русия дар Душанбе моҳи майи соли гузашта директори департаменти ҳамкории иқтисодӣ ва иҷозатномадиҳӣ дар соҳаи савдои хориҷии Вазорати саноат ва савдои Русия Роман Чекушов низ изҳори назар карда буд.
“Мо ба ҳамкорон ба мувофиқа расидем, ки ин лоиҳа дар якчанд марҳила амалӣ мешавад. Дар марҳилаи аввал бунёди парки индустриалӣ дар маркази пойтахти Тоҷикистон дар заминаи собиқ корхонаи мошинсозӣ хоҳад буд.
Ин майдони хубест бо дасатрасӣ ба нақлиёт ва имкони роҳандозии чорабиниҳои тиҷоратӣ”, – гуфта буд Чекушов дар рафти ҷаласаи Шӯрои кории Тоҷикистону Русия дар форуми “Русия – Ҷаҳони ислом: KazanForum 2024”.
