Бори нахуст дар шаҳри Душанбе мусобиқаи интихобии Ҷоми ҷаҳон оид ба дучархаронии кӯҳӣ баргузор гардид. Дар ин мусобиқа варзишгарон аз 20 кишвар байни ҳам рақобат карданд.
Садҳо тамошобину мухлиси варзиш дар Майдони дӯстии маркази пойтахт, пушти пайкараи Исмоили Сомонӣ ҷамъ омаданд, то мусобиқаро тамошо кунанд. Душанбе дар қатори шаҳрҳои Барселона, Афина ва Сан-Паулу мизбони ин мусобиқа гардид.
Барои баргузории мусобиқа дар маркази пойтахт муҳити кӯҳӣ фароҳам оварда шуд. Варзишгарон дар ҳар гардиш, қуллапаймоӣ ва фаромадан, назди ҳазорон мухлисон имтиҳон медоданд.
Ёдовар мешавем, ки ҳадафи мусобиқа оммавигардонии варзиш, ҷалби сайёҳон ва таҳкими обрӯи Тоҷикистон ҳамчун созмондиҳандаи чорабиниҳои бузурги байналмилалӣ муаррифӣ шуд. Мусобиқа бо ташаббуси шаҳрдории Душанбе дар якҷоягӣ бо Федератсияи дучархаронии Тоҷикистон ва Кумитаи кор бо ҷавонон ва варзиш баргузор гардид.
