Тарҳи давлатии Украина – “Зистан мехоҳам” (Хочу жить) номи 931 зодаи Тоҷикистонро нашр карда, навиштааст, ки “онҳо бо артиши Русия шартнома баста, зидди Украина меҷанганд ва то имрӯз 196 нафари онҳо кушта шудаанд”.
Рӯйхате, ки ин тарҳ бо номи “Зархаридон аз Тоҷикистон дар сафи нерӯҳои мусаллаҳи Русия” нашр кард, ба эътирофи масъулини он, бо истифода аз “одамони худӣ” дар сафи артиши Русия таҳия шудааст.
Дар ин рӯйхат ишора мешавад, ки аз 931 зодаи Тоҷикистон то моҳи январи соли 2025-ум 196 нафар кушта шудаанд. Аз ҳама бештар дар соли 2024 – 147 кас.
“Фавтидагон аз 18 то 70-сола ҳастанд. Як нафар пас аз 7 рӯзи имзои шартнома кушта шудааст”, – зикр мекунад манбаъ.
Дар баробари ин, таъкид мешавад, ки аксари зодагони Тоҷикистон, ки алайҳи Украина меҷанганд, аз сӯйи мақомоти гуногуни Русия бо фиреб, таҳдид, фишор ва сӯйистифода аз вазъи танги онҳо дар муҳоҷират ба ҷанг ҷалб мешаванд.
Бояд гуфт, Тоҷикистон ҳанӯз аз оғози ҷанги Русия дар Украина ва ба такрор аз шаҳрвандонаш хост, дар ин ҷанг иштирок накунанд, зеро он паёмади ҳуқуқӣ дорад ва муҷозот хоҳанд шуд. Аммо дар бораи рӯйхати “Зархаридон аз Тоҷикистон дар сафи нерӯҳои мусаллаҳи Русия”-и тарҳи давлатии “Зистан мехоҳам”-и Украина расман вокуниш накардааст.
Зикр кардан ба марид аст, ки қаблан Украинр номи шаҳрвандони Қазоқистон – 661 нафар (78 кас ҳалок шудаанд), Қирғизистон – 360 нафар (38 кас ҳалок шудаанд)-ро ҳам нашр карда буд. Дар бораи шаҳрвандони Ӯзбекистон маълумоти расмӣ нест.
Коршиносон мегӯянд, Русия дар симои муҳоҷирон аскари тайёрро мебинад ва ҳарчи бештар онҳоро дар ҷанг қурбон кардан мехоҳад.
Русия ҳеҷ гоҳ пинҳон накардааст, ки шаҳрвандони кишварҳои дигар, аз ҷумла Тоҷикистонро барои имзои шартнома бо артишаш ва минбаъд ҷанг дар Украина ҷалб мекунад.
Мувофиқи иттилои Кумитаи тафтишотии Русия ба ҳолати июни соли 2024, зиёда аз 10 ҳазор муҳоҷири меҳнатӣ, ки шаҳрвандии Русияро гирифтаанд, барои иштирок дар амалиётҳои ҷангӣ дар Украина фиристода шудаанд.
Барои ҷалби шаҳрвандони кишварҳои дигар ба ҷанг бо дастури раиси ҷумҳури ин кишвар тарзи соддакардашудаи гирифтани шаҳрвандӣ низ пешниҳод гардидааст. Аммо ин кишвар аз ҳолатҳои зиёди фиреб, таҳдид, фишор ва сӯйистифода аз вазъи танги муҳоҷирон барои имзои иҷбории шартнома бо артишаш сухан намегӯяд.
Аз ҷумла, аз зиндониён, ки зодаи кишварҳои Осиёи Марказӣ ҳастанд ва ба ҷанги Украина иҷборӣ ҷалб мешаванд, мақомоти Русия ҳарфе намезанад, ҳарчанд расонаҳо борҳо шикояти зиндониёнро нашр карданд.
