Аз 1 то 3 июл дар як қатор ноҳияҳои кӯҳӣ ва доманакӯҳи Тоҷикистон хавфи селфароиҳо аз эҳтимол дур нест. Дар ин бора Агентии обуҳавошиносии ҷумҳурӣ хабар медиҳад.
Гуфта мешавад, фаромадани селҳо бар асари обшавии пиряхҳо дар Ноҳияҳои тобеи марказ, вилояти Суғд ва ғарби ВМКБ пешгӯӣ мешавад. Сабабаш якбора болоравии ҳарорат ва тез шудани суръати обшавии пиряхҳо зикр шудааст.
Дар ин рӯзҳо ба шаҳрвандон чунин тавсияҳо дода мешавад:
– худдорӣ аз сайру саёҳат дар кӯҳҳо;
– ҳузур надоштан дар назди обанборҳо;
– ба моҳидорӣ ва шикор машғул нашудан;
– худдорӣ аз чаронидани чорво дар чарогоҳҳо.
Кумитаи ҳолатҳои фавқулодаи ҷумҳурӣ аз шаҳрвандон даъват мекунад, ки чораҳои бехатарии шахсиро риоя намуда, доимо маълумот дар бораи обуҳаворо пайгирӣ кунанд.
Ёдрас мекунем, ки аз 25 то 29 июни соли равон низ дар Тоҷикистон ҳавои номусоид ба мушоҳида расид: тӯфони чангу ғубор, ифлосшавии ҳаво ва ҳарорати баланд, бахусус дар ноҳияҳои ҷануб ва водиҳо.
Қаблан зикр гардида буд, ки моҳи июни соли 2025 ба Тоҷикистон ҳавои гарми ҳақиқии тобистона омада, қариб дар саросари қаламрави кишвар ҳавои то 2 дараҷа болотар аз меъёри иқлимӣ пешбинӣ мешавад ва дар як қатор ноҳияҳо борон борида, чангу ғубор мефарояд.
