Субҳи имрӯз, 5-уми сентябр дар шаҳри Душанбе ба муносибати 30-солагии таъсисёбии Гвардияи миллӣ гузашти низомӣ баргузор шуд. Дар ин чорабинӣ Эмомалӣ Раҳмон, раисҷумҳури Тоҷикистон ва ва Рустами Эмомалӣ, шаҳрдори Душанбе ширкат кардаанд.
Тибқи иттилои дафтари матбуоти раисҷумҳур дар гузашти низомӣ беш аз 5 ҳазор низомии “Қувваҳои мусаллаҳ, сохторҳои қудратӣ, ҳайати шахсии мақомоти ҳифзи ҳуқуқ, занону бонувони Артиши миллӣ ва ҳомиёни қонунияту тартибот” иштирок доштаанд.
Эмомалӣ Раҳмон, ки сарфармондеҳи олии Қувваҳои мусаллаҳи Тоҷикистон ҳам ҳаст, 30-солагии таъсисёбии Гвардияи миллиро табрик гуфтааст.
Раисҷумҳур зимни суханронӣ таъкид кардааст, ки Гвардияи миллӣ воҳиди махсуси дорои иқтидори баланд буда, дар ташаккули низоми мудофиавии кишвар нақши муҳим дорад.
“Гвардияи миллӣ, ки мо онро ҳамчун рамзи давлатдории навини миллӣ ва бо дарназардошти нишонаҳои таърихи гузаштаи миллати тоҷик таъсис додем, ба як сохтори қудратманди ҳарбии таъиноти махсус табдил ёфтааст, ки ин дар навбати худ, яке аз омилҳои муҳимми ҳифзи истиқлолу озодӣ, тамомияти арзии кишвар ва амнияти давлату ҷомеа мебошад”,- гуфтааст Эмомалӣ Раҳмон.
Бояд гуфт, ки Гвардияи миллӣ яке аз шохаҳои Қувваҳои мусаллаҳи кишвар буда, моҳи январи соли 1995 дар заминаи як бригадаи зудамал бо номи Гвардияи президентӣ таъсис дода шудааст. Мутобиқи қонун “Дар бораи рӯзҳои ид” ҳар сол 3-юми сентябр ҳамчун Рӯзи Гвардияи миллии Тоҷикистон таҷлил мегардад.
