Иёлоти Муттаҳидаи Амрико (ИМА) барои дастгирии тақрибан 40 ҳазор аҳолии осебпазир ба Тоҷикистон 75 тонна ба маблағи 255 ҳазору 666 доллар ғизо кумак кардааст.
Тавре ки сафорати ИМА дар Тоҷикистон хабар медиҳад, ғизои мазкур, ки дар шаҳри Лаббоки аёлати Техас аз ҷониби ширкати "Breedlove Foods" истеҳсол шудааст, омехтаи ғизоии наск, биринҷ ва сабзавотро дар бар мегирад, ки бо витамину минералҳои муҳим ғанӣ гардонида шудааст.
Ин кӯмаки ғизоӣ ба зиёда аз 140 муассисаи тиббӣ ва иҷтимоӣ, аз ҷумла муассисаҳои табобати сил, муассисаҳои равонпизишкӣ, марказҳои бемории саратонон ва паноҳгоҳҳо барои гурезаҳо тақсим карда мешавад.
Тақсимоти ин кумаки ғизоӣ таҳти назорати Вазорати тандурустӣ ва ҳифзи иҷтимоии аҳолӣ, Кумитаи ҳолатҳои фавқулодда ва мудофиаи гражданӣ, Маркази миллии мубориза бо бемории сил ва Ҷамъияти ҳилоли аҳмар сурат мегирад.
"Ҳадафи муштараки мо наҷоти ҳаёт, беҳтар кардани саломатӣ ва расонидани кумаки воқеӣ ба оилаҳо ва ҷомеаи Тоҷикистон мебошад", – гуфтааст сафири ИМА дар Тоҷикистон Мануэл Микаллер.
Аз соли 2007 инҷониб ҳукумати ИМА ба Тоҷикистон ба маблағи зиёда аз 2,2 млн доллар 1000 тонна кумаки ғизоӣ кардааст. Ин ташаббус тавассути ҳамкорӣ бо Вазорати тандурустӣ ва шарикони калидӣ, аз ҷумла ташкилоти гайриҳукуматӣ "Авесто" ва ташкилоти гайриҳукуматии амрикоии "Resource and Policy Exchange" амалӣ мегардад.
