Дар пайи манъи кор дар самти колорасонӣ барои муҳоҷирон дар Санкт-Петербурги Русия, нархи хизматрасонии ширкатҳои боррасон дар баъзе минтақаҳои ин шаҳр беш аз 40% афзоиш ёфтааст, навиштааст хабаргузориҳои русии “Фонтанка”.
Қарори манъи кор дар самти колорасон ё боррасон барои муҳоҷирон бо вуҷуди доштани иҷозатномаи корӣ (патент) дар моҳи август тасдиқ ва сар аз 22-юми ноябри соли ҷорӣ қувваи қонунӣ пайдо кард.
“Фонтанка” навиштааст, ки арзиши интиқоли молу коло дар баъзе минтақаҳои Санкт-Петербург дар рӯзи аввали ба иҷро даромадани қарор беш аз 40% афзоиш ёфтааст.
“Масалан, нархи ҳадди ақали фармоиш аз “Самокат” барои интиқол ба хиёбони Дунайский аз 440 рубл то 750 рубл афзоиш ёфтааст. Дар баъзе минтақаҳои шаҳр арзиши интиқол тақрибан 2-4% афзоиш ёфтааст”, – навиштааст ин расона
Хадамоти матбуотии “Yandex Delivery” низ афзоиши нархро эълон кардааст.
“Дар пайи татбиқи қонуни мазкур бо кам шудани колорасонҳо ва афзоиши талабот интизор меравад, арзиши хадамоти боррасонӣ зиёд шуда вақти расонидани фармоиш низ дароз шавад”, – навиштааст “Yandex Delivery”.
Бояд гуфт, ки қаблан низ дар ин шаҳр фаъолияти муҳоҷирон ҳамчун колорасон манъ гардида буд, аммо аввали моҳи июл ин қарор дубора бозбинӣ шуда, кор дар соҳаи колорасонӣ ва таксиронӣ барои муҳоҷирон иҷоза дода шуда буд.
Пештар аз ин, дар Санкт-Петербург маҳдудият дар бахши таксиронӣ низ ҷорӣ гардида буд. Он замон гуфта мешуд, ки ба ин маҳдудият соҳаи колорасонӣ низ илова шуда, рӯйхати намудҳои фаъолияти мамнӯъ барои муҳоҷирон васеъ мешавад.
Мақомоти ин шаҳр мегӯянд, ҳадаф аз гирифтани чунин тасмим “мубориза бо кори ғайриқонунӣ, баланд бардоштани сифати хизматрасониҳо ва эҷоди ҷойи кор барои шаҳрвандони Русия мебошад”.
Ин дар ҳолест, ки бархе минтақаҳои Русия, ки пештар кори муҳоҷиронро дар баъзе соҳаҳо, аз ҷумла, таксиронӣ маҳдуд карда буданд, дубора барои фаъолияти онҳо дар ин соҳаҳо иҷоза медиҳанд. Мақомоти ин кишвар гуфта буданд, дар Русия рӯз то рӯз норасоии шадиди қувваи корӣ ба мушоҳида мерасад ва эътироф мекунанд, ки бе муҳоҷирон иқтисоди ин кишвар пеш намеравад.
Пештар даҳҳо минтақаи ин кишвар, аз ҷумла вилоятҳои Новосибирск, Самара, Тула, Магадан ва Челябинск ба фаъолияти шаҳрвандони хориҷӣ дар баъзе соҳаҳо маҳдудиятҳо ҷорӣ шуда буданд. Боз дар кадом минтақаҳои Русия ва дар кадом соҳаҳо кор барои муҳоҷирон манъ шудааст, дар ин матлаби мо хонед.
Гуфтан зарур аст, ки тайи ду соли охир мақомоти Русия ҳазорҳо шаҳрванди Тоҷикистонро аз ин кишвар ихроҷ карданд, “рӯйхати сиёҳ”-и муҳоҷиронро тартиб доданд ва ба қонунгузории самти муҳоҷират даҳҳо тағйиру иловаҳо ворид карданд, ки будубоши муҳоҷиронро сахттар мекунад.
