Оҷонсии содироти Тоҷикистон иттилоъ дод, ки то ҳол 76 ширкат аз Тоҷикистон ба низоми содиркунандагони сабтшудаи Иттиҳоди Аврупо (Registered Exporter System) шомил шудаанд.
Баҳриддин Сироҷиддинзода, директори Оҷонсӣ рӯзи 30-юми январ дар нишасти матбуотӣ ба рӯзноманигорон хабар дод, ки ин кор ба дар пайи "ҷорисозии низоми худгувоҳномадиҳии макони истеҳсоли молу маҳсулот, ки ба содиркунандагон аз Тоҷикистон ҷиҳати дастрасӣ ба имтиёзҳои гумрукӣ ва осону соддатар гардонидани фаъолияти марбут ба содирот имкон медиҳад, муяссар шудааст".
Низоми мазкур аз ҷониби Иттиҳоди Аврупо барои кишварҳои дар ҳоли рушд қарордошта дар доираи Низоми умумии имтиёзҳо ҷорӣ карда шуд. Ширкатҳои содиротие, ки дар ин низом иштирок мекунанд, зимни содироти молу маҳсулот ба кишварҳои Иттиҳоди Аврупо метавонанд аз имтиёзҳои гумрукӣ истифода баранд.
Раванди сабт дар низом комилан рақамӣ гардонида шуда, пардохт талаб намекунад. Дар натиҷа ширкатҳое, ки дар низом сабтином шудаанд, барои таҳвили маҳсулоти худ ба бозорҳои аврупоӣ метавонанд аз савдои электронӣ истифода кунанд. Ин ҷараёни савдоро ба таври назаррас осону соддатар гардонида, ба рушди тиҷорати электронӣ мусоидат мекунад.
