Home Blog Page 11

“Аудиокитоб” бо Субҳон Ҷалилов. Асари “Таърихи инқилоби Бухоро”-и Садриддин Айнӣ |Қисми 43

By
admin
-
0

Лоиҳаи “Аудиокитоб” бо Субҳон Ҷалилов ба хондани асари "Таърихи инқилоби Бухоро"-и Садриддин Айнӣ, Қаҳрамони Тоҷикистон оғоз кард. Дар нашри навбатӣ, қисми чилу сеюми ин асари таърихӣ манзури ҳаводорони китоб мешавад.

Ҳадафи лоиҳаи “Аудиокитоб” бо Субҳон Ҷалилов сабти китобҳои савтӣ ва пешниҳоди он ба хонандаву шунавандааш тавассути радио, сомона ва саҳифаҳои худ дар шабакаҳои иҷтимоӣ ва ба ин васила тарғиби ҷомеа ба мутолиаи китоб мебошад.

Қаблан, лоиҳаи “Аудиокитоб” ҳикояҳо аз “Маснавии маънавӣ”-и Ҷалолиддини Балхӣ, “Дардҳои гиреҳхӯрда”-и Иноят Насриддин, ҳикояҳои Антон Чехов, романи “Киштии Нӯҳ” ва маҷмӯи ҳикояҳои Юнус Юсуфиро дар шакли савти манзури хонандагон ва шунавандагон карда буд.

Ин бор таҳиякунандагони лоиҳа ба хондани асари таърихии "Таърихи инқилоби Бухоро"-и Садриддин Айнӣ, Қаҳрамони Тоҷикистон оғоз карданд.

Китобҳои савтӣ ҳамарӯза тариқи радиои “Азия-Плюс” пахш мегардад ва ровии он Субҳон Ҷалилов, рӯзноманигор ва директори барномавии радиои “Азия-Плюс” аст.

Cабти китобҳои савтиро аз саҳифаи “Телеграм”-и бахши тоҷикии хабаргузорӣ метавонед гӯш кунед.

Дар Telegram, Facebook ва Instagram бо мо бимонед.

Гранти президентӣ барои занони ҳунарманд. Ба куҷо бояд муроҷиат кард ва кадом ҳуҷҷатҳо лозим аст?

By
admin
-
0

Кумитаи кор бо занон ва оилаи Тоҷикистон ҷиҳати дарёфти қарзҳои бебозгашт (грант) президенти Тоҷикистон барои дастгирӣ ва рушди соҳибкорӣ миёни занон дар соли 2026 озмун эълон кардааст.

Аз ин ниҳод ба “Азия-Плюс” гуфтанд, ки имсол 200 зан барои рушди тиҷорати худ метавонанд қарзҳои бебозгашт бебозгашт дарёфт кунанд.

"Грантҳо баҳри татбиқи лоиҳаҳо дар соҳаи эҳёи ҳунарҳои мардумӣ, ифтитоҳи коргоҳу устохонаҳои хурд, қолинбофӣ, чорводорӣ, парандапарварӣ, моҳипарварӣ, соҳаи коркарди меваи хушк ва рушди бахши кишоварзӣ ҷудо карда мешаванд", – гуфтанд аз Кумитаи кор бо занон ва оила.

Ба иттилои ин ниҳод, маблағи қарзҳо аз 40 ҳазор то 110 ҳазор сомонӣ буда, ба 200 зан дода мешавад. Қарзҳои бебозгашт ба таври зайл тақсим мешаванд:

25 грант ба андозаи 110 000 сомонӣ;

25 грант ба андозаи 100 000  сомонӣ;

25 грант ба андозаи 90 000  сомонӣ;

25 грант ба андозаи 80 000  сомонӣ;

МАТЕРИАЛЫ ПО ТЕМЕ
Озмун барои 20 гранти президент. Ба куҷо муроҷиат бояд кард ва чӣ ҳуҷҷат лозим аст?

25 грант ба андозаи 70 000  сомонӣ;

25 грант ба андозаи 60 000 сомонӣ;

25 грант ба андозаи 50 000  сомонӣ;

25 грант ба андозаи 40 000 сомонӣ.

Дар Кумита зикр карданд, ки қабули ҳуҷҷатҳо ба озмун аллакай оғоз гардида, то 15 апрел давом мекунад. Лоиҳаҳо бо забони тоҷикӣ дар ҳаҷми на зиёда аз 5 саҳифа дар шакли "MS Word" (шрифти Times New Roman, 14) ба озмнуи пешниҳод карда мешавад.

Дар сурати нопурра будани бастаи ҳуҷҷатҳо Кумита лоиҳаҳоро баррасӣ намекунад. Агар иштирокчии озмун ғолиб дониста шавад, ҳуҷҷатҳои пешниҳодгардида баргардонида намешаванд.

Хоҳишмандон метавонанд ба Кумитаи кор бо занон дар шаҳри Душанбе,  кӯчаи Академикҳо Раҷабовҳо, 3, ё тариқи телефонҳои 227-91-17, 221-34-71, 227-24-38 муроҷиат кунанд.

Қобили зикр аст, ки соли 2025 дар Тоҷикистон ба занони соҳибкор баҳри амалисозии 200 лоиҳа 15 млн сомонӣ грант ҷудо шуда буд. Он замон Бунафша Файзиддинзода, раиси Кумитаи кор бо занон ва оила гуфта буд, ки дар муқоиса бо солҳои пешин маблағи қарзҳои бебозгашт 3 баробар зиёд карда шуд.

Ин маблағҳо ба рушди соҳибкорӣ миёни занон, дастгирии ҳунарҳои мардумӣ ва таъсис додани ҷойҳои нави корӣ равона шуданд.

Дар Telegram, Facebook ва Instagram бо мо бимонед.

“Беш аз 180 ҳазор ҷой намерасад”. Муовини вазири маориф як мушкили гузаштан ба низоми таҳсили дувоздаҳсоларо шарҳ дод

By
admin
-
0

Равшан Каримзода, муовини вазири маориф ва илми кишвар яке аз мушкилоти гузаштан ба низоми таҳсили дувоздаҳсоларо ба норасоии ҷойи нишаст дар мактабҳои кишвар рабт дод. Ба қавли ӯ, ҳоло теъдоди кӯдакони шашсола дар кишвар наздики 250 ҳазор буда, мактабҳои Тоҷикистон барои кӯдакони ин синн зарфияти қабули танҳо ҳудуди 66 ҳазор нафарро дорад.

Ба қавли ӯ, “дар сурати гузариши пурра ба низоми таҳсилоти дувоздаҳсола, тибқи ҳисоботи пешакӣ, 184 ҳазору 640 хонанда метавонад ба мушкили норасоии ҷойи нишаст рӯбарӯ шавад”.

Ӯ мегӯяд, ин теъдод, 73,7 дарсади кӯдакони шашсоларо дарбар гирифта, мактабҳои кишвар барои қабули беш аз 26 дарсади кӯдакони ин синн зарфият доранд.

Ин нуктаро Каримзода рӯзи 26-уми феврали соли равон дар мизи мудаввар, ки аз ҷониби Кумитаи маҷлиси намояндагон оид ба илм, маориф, фарҳанг ва сиёсати ҷавонон дар мавзуи “Аҳамияти гузариш ба низоми дувоздаҳсолаи таълим: мутобиқат ба стандарти ҷаҳонӣ” баргузор шуд, зикр кардааст.

Ба қавли Каримзода, ин яке аз далелҳои гузариши марҳилавӣ ба низоми таҳсили дувоздаҳсола будааст.

Зарурати омода кардани омӯзгорони иловагӣ, тақвияти бозомӯзии омӯзгорон, таъмини хонандагон бо адабиёти таълимӣ, бознигарии меъёри таълим, омода намудани барномаи таълимӣ, сохтани синфхонаҳои иловагӣ, аз мушкилоти дигаре будааст, ки тақозо мекунад, гузариш ба низоми таҳсили дувоздаҳсола марҳила ба марҳила, “бо таҳкими инфрасохтор, таъминоти кадрӣ ва молиявӣ” амалӣ гардад.

 

Мавсума Муинӣ, муовини раиси Маҷлиси намояндагон яке аз далоили гузаштан ба низоми таҳсили дувоздаҳсоларо “ба меъёрҳои ҷаҳонӣ мутобиқ сохтани соҳаи илму маориф, фаро гирифтани кӯдакон аз синни шашсолагӣ ба таълим ва кам кардани сарбории кӯдакону омӯзгорон” гуфтааст.

Ӯ зикр карда, ки соли 1992 дар асоси Декларатсияи Шурои Аврупо 150 кишвари ҷаҳон гузариш ба низоми таҳсили 12-соларо дастгирӣ карданд ва ҳоло ин низом дар беш аз 180 кишвар тадбиқ шудааст.

 

Барно Саидвализода, раиси кумитаи Маҷлиси намояндагон оид ба илм, маориф, фарҳанг ва сиёсат низ илова кардааст, ки ин низом ба нафароне, ки оянда таҳсили олиро дар хориҷи кишвар идома додан мехоҳанд, “имкони васеъ” фароҳам меорад.

“Зеро имрӯз шаҳрвандони мо, ки ба ин мақсад ба хориҷи кишвар мераванд, таҳсили синфи 12-ро дар он кишвар идома медиҳанд”, – гуфтааст ӯ.

Ҳамчунин ба қавли ӯ, ин навъи таҳсил дар 32 давлат аз синни 5, 129 кишвар аз синни 6 ва дар 23 кишвар аз 7-солагӣ роҳандозӣ шуда, дар 25 мамлакати дунё таҳсилоти сездаҳсола аз шашсолагӣ амал мекунад.

 

“Ваъда”-и беш аз даҳсола

Соли гузашта аз Пажӯҳишгоҳи рушди маорифи Академияи таҳсилот ба “Азия-Плюс” гуфта буданд, Вазорати маориф ва илми кишвар нақша дорад, ки дар соли таҳсили 2029-2030 ба низоми таҳсили 12-сола гузарад. Дар асоси нақша, дар ин сурат, қабул ба синфи якум аз 6-солагӣ оғоз шуда, таҳсили асосӣ то синфи 10-ум ҳатмӣ мешавад.

Аз рӯйи нақшае, ки пажӯҳишгоҳ таҳия кардааст, бояд соли таҳсили 2023-2024 марҳилаи озмоишии ин низом оғоз мешуд, аммо ба гуфтаи масъулин, бо пеш омадани чанд мушкил ин кор ба таъхир уфтод. Аммо гуфта нашуд, ки он чӣ мушкил буд.

МАТЕРИАЛЫ ПО ТЕМЕ
Вазорати маориф ният дорад, то соли 2029 ба низоми таҳсили 12-сола гузарад. Ин чӣ гуна амалӣ мешавад?

Зарурати гузаштан ба низоми таҳсили 12-сола ҳанӯз солҳои 2009 ва 2011 дар паёмҳои Эмомалӣ Раҳмон, раисҷумҳури Тоҷикистон зикр шуда буд. Баъдтар, раисҷумҳур дар паёми соли 2015 изҳор дошт, ки то гузаштан ба низоми таҳсили 12-сола мактабҳо бо омӯзгорон таъмин карда шаванд.

Соли 2017 Нуриддин Саид, вазири маорифи вақт зимни нишасти хабарӣ изҳор намуда буд, ки аз соли 2020 мактабҳои таҳсилоти миёнаи умумии Тоҷикистон ба низоми таълими 12-сола гузашта, ин ҷараён тадриҷан ва дар муддати чандин сол сурат хоҳад гирифт.

Соле пеш Зиёдулло Абдулзода, муовини вазири маориф ва илми Тоҷикистон дар мусоҳиба бо нашрияи “Омӯзгор” гуфта буд, таҳсил дар мактабҳои Тоҷикистон то соли 2030-юм 12-сола мешавад.

Дар ҳоле ки зарурати гузариш ба низоми таҳсили 12-сола дар кишвар баррасӣ мешавад, аксар сокинон бар ин боваранд, ки “Беистеъдод дар 15 сол ҳам намеомӯзад”

Дар Telegram, Facebook ва Instagram бо мо бимонед.

Субҳ ба хайр, Тоҷикистон! Як рӯз дар таърих, зодрӯзи шахсиятҳо, вазъи ҳаво барои 11 марти соли 2026

By
admin
-
0

ЧОРАБИНИҲОИ МУҲИМ

– Имрӯз соати 10:00 дар Филармонияи давлатии Тоҷикистон ба номи Акашариф Ҷӯраев Рӯзи матбуоти тоҷик таҷлил мегардад.

ЯК РӮЗИ ТАЪРИХ

Имрӯз дар Тоҷикистон Рӯзи матбуоти тоҷик ҷашн гирифта мешавад.

Соли 1912 – Шумораи аввалини рӯзномаи тоҷикии “Бухорои шариф” нашр шуд. Ин рӯзнома нахустин нашрияи матбуотии тоҷикӣ ба ҳисоб меравад ва дар муҳити фарҳангӣ ва сиёсии Осиёи Марказӣ нақши муҳим бозид. Он  бо ташаббуси ҷадидон (ислоҳотхоҳон)-и Аморати Бухоро таъсис ёфт. Забони рӯзнома асосан тоҷикӣ (форсии дарӣ) буд, вале мақолаҳо бо забони туркӣ ва арабӣ низ чоп мешуданд.

Ҳар шумораи он 4 саҳифа дошт ва ҳафтае 2 маротиба нашр мегардид. Баъди ҳудуди 8 моҳ фаъолияти рӯзнома қатъ шуд. Шумораи охирини он 28 январи соли 1913 нашр гардид.

Гарчанде рӯзнома умри кӯтоҳ дошт, таъсири он дар бедории фикрии тоҷикон ва рушди матбуоти миллӣ хеле бузург буд.

Соли 2002 – Муҳлати эътибори Созишномаи ризоияти миллӣ бе муҳлат дароз карда шуд.

Соли 2007 – Дар шаҳри Душанбе Форуми матбуоти тоҷикзабонон баргузор гардид.

Соли 2008 – Додгоҳи Олии ҶТ ташкилоти “Ҳизб-ут-Таҳрир”-ро расман ҳамчун гурӯҳи экстремистӣ эълон кард.

 

ШАХСИЯТҲО

Соли 1912 – Зодрӯзи Ғанӣ Абдулло, драматург ва шоири тоҷик.

Ғанӣ Абдулло соли 1932 факултаи филологияи Донишкадаи давлатии омӯзгории Самарқандро хатм карда, ба Душанбе омадааст. Солҳо дар Пажӯҳишгоҳи омӯзгории Комиссариати маориф, Иттифоқи нависандагон, Театри давлатии академии драмавии ба номи А. Лоҳутӣ фаъолият кардааст.

Оғози фаъолияти эҷодияш ба ибтидои солҳои 30-юми асри гузашта рост меояд. Ӯ муаллифи драмаҳои “Вахш”, “Водии бахт”, “Рустам ва Суҳроб” (бо ҳамқаламии А.Пирмуҳаммадзода), “Шӯриши Восеъ”, “Ҳуррият” “Мурғи саҳар” ва дигар асарҳои саҳнавӣ буда, соли 1972 барои драмаҳои “Ҳуррият” ва “Сарбозони инқилоб” сазовори Ҷоизаи Рӯдакӣ гардидааст. Инчунин асарҳои маъруфи нависандагони ҷаҳониро ба забони тоҷикӣ тарҷума кардааст.

Ғанӣ Абдулло соли 1982 аз олам даргузашт.

Соли 1917 – Мавлуди Лутфӣ Саид, нависандаи тоҷик.

Соли 1943 – Зодрӯзи Маҳмад Ғоибов, доктори илми фалсафа, профессор.

Соли 1950 – Зодрӯзи Музаффар Юнусов, доктори илмҳои кимиё, профессор.

Соли 1954 – Зодрӯзи Соро Сабзалиева, ҳунарпешаи театр ва синамои тоҷик.

Соро Сабзалиева хатмкардаи факултети ҳунарпешагии Донишкадаи умумииттифоқии давлатии кинематографияи Маскав буда, аз соли 1975 дар Театри давлатии академии драмавии Тоҷикистон ба номи А. Лоҳутӣ. ба ҳунарнамоӣ пардохта, дар ин театр як қатор нақшҳои мондагор офаридааст.

Ӯ нақши Робиаро дар намоишномаи “Дар чорроҳа”, Насиба дар “Мардон намегирянд”, София дар “Бадбахтӣ аз ақл”, Лаура дар “Боғи ҳайвоноти шишагӣ”-ро иҷро намудааст.

Соро Сабзалиева, ки соли 2009 Ҳунарпешаи халқии Тоҷикистон шуд, дар чанде аз филмҳо низ нақшҳои асосӣ ва дуввумдараҷа офаридааст.

Соли 1963 – Мавлуди Мардон Мавлонов, сароянда, Ҳунарпешаи халқии Тоҷикистон.

 

САНАҲОИ МУҲИМИ ҶАҲОНӢ

Соли 1824 дар ИМА Бюрои умури ҳиндувони амрикоӣ таъсис дода шуд.

Бюрои умури ҳиндувон (Bureau of Indian Affairs, BIA) як ниҳоди ҳукуматииАмрико мебошад, ки масъули ҳамоҳангсозӣ ва идораи муносибатҳои ҳукумат бо қабилаҳои ҳиндувонии эътирофшудаи федеролӣ аст.​ BIA, ки барои дастгирӣ ва рушди қабилаҳои ҳиндувон таъсис ёфтааст, дар тӯли таърихи худ бо мушкилоти идорӣ ва молиявӣ рӯбарӯ шудааст, ки боиси таҳқиқот ва даъвоҳои ҳуқуқӣ гардидаанд.

​11 марти соли 1869 табиатшинос ва рӯҳонии фаронсавӣ Арман Давид ҳангоми сафар ба музофоти Сичуан-и Чин аз шикорчиёни маҳаллӣ пӯсти ҳайвони сиёҳу сафедро дарёфт кард. Ин кашфиёт аввалин шиносоии илмии аврупоиён бо панда буд.​

Арман Давид пӯстро ба Осорхонаи миллии таърихи табиӣ дар Париж фиристод, ки дар он ҷо зоологҳо онро таҳқиқ намуда, бо ҳайрат фаҳмиданд, ки ин ҳайвони то ҳол ба илм ношинос аст. Баъдтар, ин намуди ҳайвон “пандаи бузург” ном гирифт.​

Аз нимаи асри ХХ панда ба рамзи миллии Чин табдил ёфт ва ҳамчун нишонаи дӯстӣ ва сулҳ шинохта мешавад. Ҳамчунин, панда рамзи Созмони ҷаҳонии ҳифзи табиат (WWF) мебошад.

​11 марти соли 1878 дар ҷаласаи Академияи илмҳои Фаронса, ихтирооти Томас Эдисон – фонограф муаррифӣ карда шуд. Ин дастгоҳ аввалин бор имкони сабт ва бознавозии садоро фароҳам овард.​

Ҳангоми намоиш, баъзе аз ҳозирин бо шубҳа ва ҳайрат ба ин ихтироот нигоҳ мекарданд. Масалан, забоншинос Жан Буйяр изҳор дошт: “Шумо чӣ гуна бовар мекунед, ки як порчаи металл метавонад садои одамро такрор кунад?”​ Моҳи майи ҳамон сол намоиши оммавии фонограф баргузор гардид, ки онро “кашфиёти аср” номиданд. ​

​Рӯзи ҷаҳонии фарҳанги мусалмонӣ, сулҳ, муколама ва кино ҳамасола 11 март ҷашн гирифта мешавад. Ин рӯзро Ҷовид Муҳаммад, нависанда ва продюсери амрикоӣ аз Калифорния, соли 2010 бо мақсади баланд бардоштани огоҳӣ дар бораи гуногунрангии фарҳанги исломӣ ва таҳкими муколамаи байнифарҳангӣ пешниҳод кардааст.​

Дар ин рӯз, чорабиниҳои гуногун, аз ҷумла намоиши филмҳо, намоишгоҳҳои фарҳангӣ ва муҳокимаҳо баргузор мегарданд, ки ба муаррифӣ ва фаҳмиши беҳтари фарҳанги мусалмонӣ мусоидат мекунанд.

​Ҳамасола 11 март Рӯзи ҷаҳонии системаҳои обрасонӣ (сантехникӣ) ҷашн гирифта мешавад. Ин рӯз ба ҳифзи манбаъҳои об, сарфакорӣ ва истифодаи оқилонаи он равона шудааст. Системаҳои обрасонӣ зиндагии моро осон ва роҳат кардаанд, аммо мушкилоти камбуди об дар ҷаҳон ҳанӯз доғ боқӣ мемонад.

 

ВАЗЪИ ҲАВО*

Дар вилояти Суғд – Ҳавои тағйирёбанда пешгӯӣ шуда, рӯзона ҳавои бебориш дар назар аст. Ҳарорат: дар водиҳо рӯзона -2+3º, дар ноҳияҳои кӯҳӣ рӯзона 0-5º сард, дар водиҳо шабона аз 0-5º сард то 1+6º гарм, дар ноҳияҳои кӯҳӣ шабона аз 9-14º сард то 3-8º сард.

Дар вилояти Хатлон – Ҳавои тағйирёбанда пешгӯӣ шуда, рӯзона ҳавои бебориш дар назар аст. Ҳарорат: дар водиҳо рӯзона 6+11º гарм, дар доманакӯҳҳо рӯзона -1+4º, дар водиҳо шабона 2+7º гарм, дар доманакӯҳҳо шабона -1+4º.

Дар шаҳру ноҳияҳои тобеи ҷумҳурӣ – Ҳавои тағйирёбанда пешгӯӣ шуда, рӯзона ҳавои бебориш дар назар аст. Ҳарорат: дар водиҳо рӯзона 5+10º гарм, дар ноҳияҳои кӯҳӣ рӯзона 0+5º гарм, дар водиҳо шабона 2+7º гарм, дар ноҳияҳои кӯҳӣ шабона 6-11º сард, дар баъзе ноҳияҳо то 1-3º сард.

Дар Вилояти Мухтори Кӯҳистони Бадахшон – Ҳавои тағйирёбанда пешгӯӣ шуда, дар баъзе ҳолатҳо борон ва барф меборад. Ҳарорат: дар ғарби вилоят рӯзона 5+10º гарм, дар шарқи вилоят рӯзона 0+5º гарм, дар ғарби вилоят шабона -3+2º, дар шарқи вилоят шабона 12-17º сард, дар баъзе минтақаҳо то 20-22º сард.

Дар шаҳри Душанбе – Ҳавои тағйирёбанда пешгӯӣ шуда, рӯзона бебориш дар назар аст. Ҳарорат: рӯзона 8+10º гарм, шабона 2+4º гарм.

Дар шаҳри Хуҷанд – Ҳавои тағйирёбанда пешгӯӣ шуда, рӯзона ҳавои бебориш дар назар аст. Ҳарорат: рӯзона 0+2º гарм, шабона 4-6º сард.

Дар шаҳри Бохтар – Ҳавои тағйирёбанда пешгӯӣ шуда, рӯзона ҳавои бебориш дар назар аст. Ҳарорат: рӯзона 8+10º гарм, шабона 2+4º гарм.

Дар шаҳри Хоруғ – Ҳавои тағйирёбанда пешгӯӣ шуда, дар баъзе ҳолатҳо борон ва барф меборад. Ҳарорат: рӯзона 7+9º гарм, шабона 0-2º сард.

*Ҳарорати шабонаи ҳаво шаби 11 ба 12-уми март ба ҳисоб гирифта шудааст.

Дар Telegram, Facebook ва Instagram бо мо бимонед.

Идомаи ҳамлаҳои шадид ба Теҳрону Тел-Авив ва изҳороти ду тараф дар бораи поёни ҷанг. Шабонарӯзи гузашта дар Ховари Миёна чӣ гузашт?

By
admin
-
0

Шаби 9 ба 10-уми март дар ҳоле, ки Доналд Трамп, раисҷумҳури Амрико ба рӯзноманигорон мегуфт, поёни ҷанг бо Эрон наздик аст, ба Теҳрон ва чанд шаҳри дигар ҳамлаҳои шадид сурат гирифтааст. Дар посух ба ин, Сипоҳи посдорони Эрон гуфтааст, бо мушакҳои навъи нав ба Исроил ва пойгоҳҳои низомӣ ва зерсохтҳои Амрико дар Ховари Миёна зарба задааст.

Дар ин ҳол, Доналд Трамп мегӯяд, “поёни ҷанг наздик аст”, вале Сипоҳ гуфт, “поёни ин даргириро Эрон муайян мекунад”. Ин ва дигар ҳаводиси охири Эрон ва Ховари Миёнаро дар матлаби мо хонед.

 

Ҳамлаҳои “сангин” ба Теҳрон ва чанд шаҳри дигари Эрон

Амрикову Исроил шаби 9 ба 10-уми март ба чанд шаҳри Эрон ҳамла кардаанд. Аз ҷумла ба шаҳри Караҷ ҳамла шуда, боиси қатъи муваққатии барқ гаштааст. Ҳамчунин, хабаргузории “Форс”-и Эрон аз ҳамлаҳои “сангин” тавассути ҳавопаймоҳои низомӣ гузориш дода, гуфтааст, ҳамлаҳои шадид дар шарқи Теҳрон, аз ҷумла дар минтақаҳои Комрония, Нормак ва наздикии ҷойи Артиш сурат гирифтааст.

Шаби гузашта дар ҷануб ва ҷанубу ғарби пойтахти Эрон низ садои инфиҷорҳои шадид тавассути ҳавопаймоҳои низомӣ шунида шудаааст. Дар пайи ин ҳамлаҳои дар чанде аз нуқтаҳои Теҳрон интиқоли барқ қатъ шуд. Нисфирӯзии 10-уми март интиқоли барқ дубора пайваст гардидааст.

Хабаргузории “ИСНА” мегӯяд, дар пайи ҳамла ба як бинои истиқоматӣ дар шаҳри Арок 5 тан кушта ва чанд нафари дигар захмӣ шудаанд.

Хабаргузории “Садо ва симо”-и Эрон гуфтааст, ки ба як шаҳраки санъатӣ ва сохтмонҳои маскунӣ дар шарқи Теҳрон ҳамла шудааст.

Ҳамчунин, субҳи имрӯз аз ҳамла ба як мактабе дар вилояти Марказӣ гузориш додаанд. Раиси ин вилоят гуфтааст, ки ба ҷӯз мактаб, чанд бинои маскунӣ дар атрофи он низ, осеб дидаанд.

Ҳамчунин, расонаҳои эронӣ гузориш доданд, ки дар пайи ҳамлаҳои душанбеи 9-уми март, биноҳои таърихӣ ва мероси фарҳангӣ, мисли кохи Чилсутун, иморати Ракибхона, толори Темурӣ ва толори Ашраф осеб дида, шишаҳои кохи Оли Қопу шикастаанд.

Ин биноҳо мероси таърихиест, асрҳо пеш сохта шудааст. Толори Ашраф имрӯз бахше аз бинои ҳукумати вилояти Исфаҳон низ ҳаст.

Омори хисорот ва талафоти ин ҳамлаҳо ҳоло нашр нашудааст.

 

Ҳамлаҳо ба Исроил

Маркази “Хотам-ул-анбиё” гуфтааст, ки чанде аз мушакҳоро дар осмони Теҳрон раҳгирӣ кардааст.

Дар посух ба ин ҳамлаҳо, шабона ва субҳи 10-уми март Сипоҳи посдорони Эрон аз мавҷи нави ҳамлаҳо ба “мавзеъҳои ҳаётии” Исроил, аз ҷумла фурудгоҳи Бен-Гурион ва пойгоҳҳои Амрико дар Арабистони Саудӣ, Баҳрайн ва Ироқ хабар дода, гуфтааст, ки дар ин ҳамлаҳо аз мушакҳои “бо кулоҳакҳои як тонаӣ” истифода шудааст.

Сипоҳ ҳамчунин аз нобуд сохтани наздики 10 радари амрикоӣ дар пойгоҳҳои низомии ин кишвар дар Халиҷи Форс ва раҳгирии “теъдоди бешумори” паҳподҳои онҳо дар Эрон хабар додааст.

Артиши Эрон низ мегӯяд, ба полоишгоҳи нафту гази Ҳайфои Исроил мушак партоб кардааст. Рӯзи 10-уми март артиши Исроил аз партоб шудани мушакҳои бештар аз тарафи Эрон хабар дода, гуфтааст, ки як мушакро дар Тел-Авив нобуд кардааст.

МАТЕРИАЛЫ ПО ТЕМЕ
Писар ҷойгузини падар. Муҷтабо Хоманаӣ, роҳбари нави Эрон кист ва чӣ корнома дорад?

Ба иттилои Вазорати тандурусти Исроил тайи шабонарӯзи гузашта дар пайи ҳамлаҳои Эрон 191 нафари маҷрӯҳ ба бемористонҳо интиқол дода шудаанд.

“The Times Of Israel” менависад, ки дар умум, дар пайи ҳамлаҳо 2 ҳазор 339 нафар захмӣ шудаанд.

 

Трамп гуфт, “поёни ҷанг наздик аст”, Сипоҳ мегӯяд, “поёни ҷангро мо таъйин мекунем”

Дар ҳамин ҳол, Доналд Трамп гуфтааст, ки агар Эрон ҷараёни интиқоли нафт дар гулӯгоҳи Ҳурмузро қатъ кунад, “бо вокуниши бисёр шадиди Иёлоти Муттаҳида рубарӯ хоҳад шуд”.

Ӯ рӯзи 9-уми март дар шабакаи иҷтимоии худ – “Truth Social” навишт, ки “агар Эрон ҳар иқдоме анҷом диҳад, ки ҷараёни нафт дар тангаи Ҳурмузро қатъ кунад, Иёлоти Муттаҳидаи Амрико 20 баробар шадидтар аз он чи то кунун анҷом шудааст, ба Эрон зарба хоҳад зад”.

“Марг, оташ ва ғазаб бар онҳо нозил хоҳад шуд; аммо умедворам ва дуо мекунам, ки чунин иттифоқе рух надиҳад”, – навиштааст Трамп.

Дар ин баробар, Доналд Трамп, 9-уми март дар нишасти хабарӣ гуфтааст, ки “ҷанг ба зудӣ тамом мешавад”, аммо, “ин ҳафта поён нахоҳад ёфт”. Ӯ, ки қаблан гуфта буд, ҳамла ба Эрон 4-5 ҳафта давом мекунад, дирӯз ба хабарнигорон гуфтааст, ки “мо хеле пештар аз барнома ҳастем”.

Вале Сипоҳи посдорони Эрон мегӯяд, “ин мо ҳастем, ки поёни ҷангро таъйин хоҳем кард, Дасти мо барои тавсеаи ҷанг боз аст. Амният барои ҳама ё ноамнӣ барои ҳама хоҳад буд”.

“Нерӯҳои мусаллаҳи Ҷумҳурии Исломӣ дар сурати идомаи таҷовузи Амрико ва режими саҳюнистӣ ба мардум ва зерсохтҳо иҷозаи содироти як литр нафт аз минтақаро то иттилоъи баъдӣ ба тарафи душман ва шариконаш нахоҳад дод”, – омадааст дар баёнии Сипоҳ дар посух ба ин гуфтаҳои Трамп.

 

Гуфтугӯи телефонии Трамп ва Путин ва коҳиши нархи нефт

Шаби 9-уми март Кремл эълон кард, ки Доналд Трамп бо Владимир Путин, раисҷумҳури Русия тамос гирифтааст ва “вазъияти феълии байналмилалӣ, ба вижа Эрон ва Украина”-ро баррасӣ кардаанд.

Ба гуфтаи Юрий Ушаков, мушовири Путин, ин суҳбат як соат давом карда, “коршиносона, сареҳ ва созанда” буд.

Ӯ илова кардааст, ки раисҷумҳури Русия “чанд идеяеро бо ҳадафи дастёбӣ ва як роҳҳали сиёсӣ-дипломатии зуд барои муноқишаи Эрон, аз ҷумла, бар асоси тамосҳои анҷомшуда бо роҳбарони кишварҳои Халиҷи Форс, раисҷумҳури Эрон ва роҳбарони чанде кишварҳо баён кардааст”.

Ҷузъиёти бештари ин гуфтугӯ расонаӣ нашудааст.

МАТЕРИАЛЫ ПО ТЕМЕ
“Бомбборону куштори чанд фармондеҳ поёни ҷанг нест ва Эрон омодаи ҷанги давомдор аст”.

Гуфтугӯи онҳо дар ҳолест, рӯзи гузашта Владимир Путин изҳор дошт, ки ҳамлаҳои Амрикову Исроил ба Эрон боиси буҳрони энержӣ шудааст.

Ӯ дар ҷаласае бо ҳузури мақомҳои Русия ва ширкатҳои нафту газ ҳушдор додааст, ки тавлиди нафт, ки ба таҳвил аз тариқи тангаи Ҳурмуз вобаста буд, метавонад, ба зудӣ ба таври комил мутаваққиф шавад.

Путин дар ин ҷаласа гуфтааст, ки Русия барои кумак ба коҳиши ин буҳрон ва барои таъмини нафту гази кишварҳои аврупоӣ омода аст.

Вале, ба навиштаи хабаргузории “Форс” тангаи Ҳурмуз “барои Чин ва кишварҳои дӯсти Эрон боз буда, табодулоти энержӣ бидуни мушкил идома дорад”.

Хабаргузории “Ройтерз” рӯзи гузашта хабар дод, ки Амрико сабук кардани таҳримҳо ба нафти Русияро барои пешгирӣ аз болоравии нархи ҷаҳонии энержӣ баррасӣ мекунад.

Субҳи сешанбе, 10-уми март нархи нафти хом дар бозорҳои ҷаҳонӣ марзи аз 100 доллар поён фаромад.

Дар пайи шадид шудани даргириҳо дар Ховари Миёна, ки бо ҷанги Амрикову Исроил алайҳи Эрон оғоз шуд, субҳи 9-уми март нархи як бушка нафти “Брент” ба беш аз 25 дарсад афзоиш ёфта, ба наздики 120 доллар расид. Вале давоми рӯз нархи коҳиш ёфта буд.

 

ББС: Ба мактаби духтаронаи Миноб бо мушаки “Tomahawk” зарба зада шудааст

Дар ҳамин ҳол, бахши ростозмоии ББС тавассути санҷидани наворҳои лаҳзаи расидани мушак муайян кардааст, мушаке, ки мактаби духтарона дар шаҳристони Миноби Эрон ҳадаф қарор дода буд, мушаки навъи “Tomahawk”-и амрикоӣ аст.

ББС бо такя ба коршиносон менависад, ки Исроил ва Эрон чунин навъи мушак надоранд.

Доналд Трамп дар нишасти хабарии шаби 9-уми март ба саволи хабарнигорон дар бораи ҳамлаи мактаб бо мушаки “Tomahawk”-и амрикоӣ изҳор доштааст, ки таҳқиқ дар ин самт идома дорад ва “ҳар чизе, ки ин гузориш нишон медиҳад, ман омодаам онро қабул кунам”.

Қаблан, Доналд Трамп гуфта буд, мактаби мазкур аз тарафи Эрон ҳадафи ҳамла қарор гирифта буд.  

Ёдовар мешавем, ки ҳамла ба мактаби ибтидоии духтаронаи “Шаҷараи Тайиба” дар Миноб 28-уми феврал, дар рӯзи аввали ҳамлаи муштараки Амрикову Исроил ба Эрон сурат гирифта, дар пайи он тибқи маълумоти охир 168 нафар кушта ва наздики 100 тани дигар захмӣ гашта буданд.

Дар ин зимн, Аббос Ароқчӣ, вазири корҳои хориҷии Эрон шаби гузашта дар мусоҳибае бо шабакаи амрикоии “PBS” гуфт, “бар хилофи Амрико ва режими саҳюнистӣ, ки ба мактабҳо ҳамла мекунанд, мо ҳаргиз ба маконҳои ғайринизомӣ ҳамлае надоштем”.

 

Вазъ дар Ховари Миёна

Ҳамчунин, шаби гузашта ва субҳи имрӯз, 10-уми март ҳамлаи Исроил ва Лубнон ва зарбаҳои Эрон ба пойгоҳҳои Амрико дар кишварҳои Ховари Миёна идома ёфтааст. Аз ҷумла, Исроил давоми шабонарӯзи гузашт чанд маротиба сокинони чанд минтақаи Лубнон ҳушдор додааст, ки манзилҳои худро тарк кунанд. Ин кишвар, ҳамчунин иттилоъ додааст, ки ба 30 нуқтаи як созмони хайриявии марбут ба “Ҳизбуллоҳ” зарба задааст. “Ҳизбуллоҳ” низ аз ҳамла ба як пойгони низомии Исроил хабар дод.

Исроил тасдиқ кардааст, ки дар пайи зарбаҳои мушакии 9-уми март аз тарафи “Ҳизбуллоҳ” ба ин кишвар 16 кас маҷрӯҳ шудааст.

Вазорати беҳдошти Лубнон то ин дам теъдоди қурбониёни ҳамлаҳои Исроилро ба 486 нафар ва захмиёнро 1 ҳазору 313 ҳисоб кардааст.

МАТЕРИАЛЫ ПО ТЕМЕ
Низои маҳдуд, шиддатгирии вазъ ва бесуботии дохилӣ дар Эрон. Се гузинаи таъсири ҷанг дар Эрон ба Тоҷикистон

Баҳрайн бомдоди 10-уми март аз кушта шудани як нафар ва захмӣ шудани чанд тани дигар дар пайи як ҳамлаи Эрон ба ин кишвар хабар додааст. Баҳрайн иттилоъ додааст, ки ба як минтақаи нафти ҳамлаи паҳподӣ шудааст.

Вазорати кишвари Баҳрайн гуфтааст, ҳамла ба як минтақаи маскунӣ сурат гирифтааст. Аммо, Теҳрон борҳо таъкид кардааст, ки танҳо пойгоҳҳои низомӣ, зерсохтҳо ва маконҳое, ки Амрико аз он ҷойҳо барои ҳамла ба Эрон истифода мекунанд, ҳадаф қарор додааст.

Ҳамчунин, Вазорати дифоъи Қатар шоми рӯзи гузашта гуфтааст, ки 17 мушаки балистикӣ ва 6 паҳподеро, ки аз сӯи Эрон партоб шуда буд, раҳгирӣ кардааст.

Кувайт аз раҳгирии 6 паҳпод хабар дода, Имороти Муттаҳидаи Арабӣ гуфтааст, ки паҳподҳои ба сӯи кишвараш партобшударо раҳгирӣ мекунад.

Арабистони Саудӣ аз ҳамла ба кони нафти Шайба хабар дода, ҳамчунин, аз сарнагун кардани як паҳпод иттилоъ медиҳад.

Бо охирин таҳаввулоти Эрону дигар кишварҳои Ховари Миёна, вазъи тоҷикистониҳо дар ин кишварҳо дар ин бахши махсуси "Азия-Плюс" огоҳ шавед: Ҳамлаи Амрикову Исроил ба Эрон

Дар Telegram, Facebook ва Instagram бо мо бимонед.

Дар 31 муассисаи Тоҷикистон хонандагон дар се баст таҳсил мекардаанд

By
admin
-
0

Ҳоло дар 31 муассисаи таҳсилоти умумии Тоҷикистон бинобар норасоии ҷойи нишаст хонандагон дар се баст таҳсил мекунанд. Дар ин бора Муҳаммадтоир Саидзода, роҳбари Оҷонсии назорат дар соҳаи маориф ва илм моҳи феврал зимни нишасти матбуотӣ иттилоъ дод.

Ба гуфтаи ӯ, дар ин муассисаҳо, дар маҷмӯъ, 38 ҳазору 167 хонанда ба таҳсил фаро гирифта шудаанд. Аз ин шумора 8 ҳазору 368 нафар ё 21,9%-и хонандагон маҳз дар басти сеюм дарс мехонанд, ки барои ин 281 гурӯҳи таълимӣ ташкил карда шудааст. Ҳисоби миёнаи хонандагон дар ҳар як гурӯҳи басти сеюм ба 29,8 кас баробар аст.

Ин муасисаҳои таҳсилоти умумӣ, ки ба онҳо мактабҳо, гимназияҳо, литсейҳо, мактабҳои президентӣ ва мактаб – интернатҳо дохил мешаванд, аз рӯи минтақаҳои кишвар, ба таври зерин аст:

 

Дарсҳо соати чанд оғоз ва ба итмом мерасанд?

Муҳаммадтоир Саидзода дар шарҳи ин омор ба “Азия-Плюс” гуфт, ки ҳукумати кишвар барои бартараф кардани ин мушкил талош дорад.

Аз ҷумла, ба қавли ӯ, теъдоди мактабҳое, ки дар се баст фаъолият мекарданд, соли таҳсили 2024-2025 ба 43 ва соли таҳсили 2023-2024 ба 70 адад баробар буд, ин омор дар соли таҳсили равон то 31 адад коҳиш ёфтааст.

Ба қавли роҳбари Оҷонсӣ, қаблан, дар ҳудуди шаҳри Душанбе муасисае, ки дар се баст фаъолият мекард, вуҷуд надошт, азбаски як қисми ноҳияи Рӯдакӣ ба ҳудуди шаҳри Душанбе ворид шуд, 5 боргоҳи таълимӣ дар се баст фаъолиятдошта ба омори пойтахт гузашт.

“Пеш аз ҳама мушкили асосӣ дар нарасидани ҷойи нишаст дар муассисаҳо аст… Мо дастур додем, маълумотро ба ҷойҳои даркорӣ расонидем. Дар баъзе муассисаҳо як-ду синфхона созанд, ин мушкилот бартараф мешавад. Ин мушкиле ҳаст, ки дар баъзе солҳо пайдо мешаванд, дар бархе солҳои дигар ба танзим даромада, ҳал мешаванд”, – гуфт Муҳаммадтоир Саидзода.

Ӯ таъкид кард, ки соатҳои дарсии хонандагон мувофиқ ба соатҳои таълимӣ дар бастҳои якум ва дуюм ба танзим дароварда шуда, маъмулан ҳар се баст аз соати 8:00 оғоз шуда, то соат 18:00 ба анҷом мерасад.

“Ҳар вақте синфхонае холӣ шуд, дар ҳамон ҷо хонандагони басти сеюм ба дарс оғоз мекунанд. Дар ҷадвали дарсии синфҳои болоӣ сарборӣ гузошта шуда, дарсҳои онҳо зудтар тамом мешаванд ва ҳар соате, ки як синфхона холӣ шуд, хонандагони басти сеюм ба таҳсил оғоз мекунанд. Албатта, сарбории таълимӣ дар синфҳои болоӣ вазнин мешавад. Дар умум, дарсҳо дар се баст то соати 17:00 ё 18:00 пурра ба анҷом мерасан. Шабона дарс нест”, – гуфт роҳбари Оҷонсии назорат дар соҳаи маориф ва илм.

 

МАТЕРИАЛЫ ПО ТЕМЕ
Аз ҳалли норасоии омӯзгору камбуди китоби дарсӣ то таҳсили 40 хонанда дар як синф. Дар нишасти матбуотии Вазорати маориф боз чиҳо гуфтанд?

Мушкиле, ки солҳост идома дорад

Норасоии мактаб, мизу курсӣ ва синфхонаҳои таълимӣ мушкилест, ки солҳост дар соҳаи маорифи Тоҷикистон мавҷуд аст. Ин мушкил дар нишасти матбуотии Вазорати маориф ва илми Тоҷикистон ҳам матраҳ гардид ва масъулини соҳа ин камбудро эътироф карданд.

Аз ҷумла, Раҳим Саидзода, вазири маориф ва илм гуфт, дар яке аз гимназияҳои пойтахт дар як синф 40 хонанда таҳсил мекнанд, ки ин вазъ “ба сифати таҳсил таъсир мерасонад”.

Ёдовар мешавем, ки ғайр аз норасоии ҷойи нишаст дар мактаб, инчунин, норасоии омӯзгорон ҳам солҳо боз мушкили доғи соҳаи маориф аст. Вазорати маориф ва илми Тоҷикистон мегӯяд, ки норасоии омӯзгорон дар соли таҳсили 2025-2026 дар мактабҳои Тоҷикистон “пурра бартараф шуда”, соли гузашта беш аз 5 ҳазор омӯзгор зиёдтар дар мактабҳо ба кор оғоз кардаанд.

Бо вуҷуди ин, дар мактабҳои кишвар қариб 700 омӯзгори ғайриихтисос дарс мегуфтаанд. Бештар дар ин хабари “Азия-Плюс” маълумот пайдо кунед.

Дар Telegram, Facebook ва Instagram бо мо бимонед.

Чин дар марзи Тоҷикистон бо Афғонистон 9 иншооти сарҳадӣ месозад

By
admin
-
0

Чин дар минтақаҳои сарҳадии Тоҷикистон бо Афғонистон 9 иншооти марзӣ бунёд мекунад. Арзиши умумии сохтмон беш аз 550 миллион сомонӣ буда, пурра аз ҷониби ҳукумати Чин пардохт мешавад. Ҷониби Тоҷикистон бошад, барои озод кардан аз андозҳо ва боҷҳои гумрукӣ, инчунин, дигар пардохтҳои ҳатмӣ масъул аст.

Лоиҳаи ин созишнома ахиран дар маҷлиси вакилони парлумон, рӯзи 4-уми март баррасӣ ва қабул шудааст.

Ҳадафи лоиҳаи мазкур мустаҳкам намудани шароити моддӣ-техникии Қушунҳои сарҳадии Тоҷикистон гуфта мешавад.

Муродалӣ Раҷабзода, муовини якуми раиси Кумитаи давлатии амнияти миллии Тоҷикистон (КДАМ) дар ҷаласа гуфтааст, татбиқи лоиҳа дар се марҳила пешбинӣ шуда, аллакай номаҳои табодулӣ барои амалисозии марҳилаи дуюм ба имзо расидаанд.

Мувофиқи номаҳои табодулӣ, майдони умумии сохтмон 17 ҳазору 109 метри мураббаъ буда, хароҷоти зарурӣ барои сохтмони иншооти сарҳадии мазкур тақрибан 569 миллион сомонӣ (424 миллиону 830 ҳазор юани чинӣ)-ро ташкил медиҳад ва “аз ҷониби ҳукумати Чин ба таври ройгон пешниҳод мешавад”.

“Ҷониби Тоҷикистон барои амалӣ намудани номаҳои мазкур бобати озод кардан аз андозҳо ва боҷҳои гумрукӣ, инчунин, пардохтҳои ҳатмӣ масъул аст”, – гуфтааст ин масъул.

Аммо ҳанӯз мушаххас нест, ки ин иншооти сарҳадӣ дар кадом минтақаҳо бунёд мешаванд.

Баҳриддин Зиёӣ, узви кумитаи Маҷлиси намояндагон оид ба тартиботи ҳуқуқӣ, мудофиа ва амният низ дар баррасии лоиҳа зикр кардааст, ки ҷониби Чин ҳамчунин барои таҳқиқот ва тарҳрезии лоиҳа, пешниҳоди таҷҳизот ва маводи зарурӣ барои сохтмон, фиристодани теъдоди зарурии муҳандисон ба Тоҷикистон, насб ва танзими таҷҳизот, таъмини ҷиҳози зарурии дафтардорӣ, истиқоматӣ ва компютерҳо, сохтмони роҳҳои воридшавӣ, хатҳои обтаъминкунӣ, обрав, интиқоли барқ ба иншоот ва зерсохтҳои дигари ёрирасон ва нуқтаҳои дигари алоқаи сохтмонӣ масъул аст.

 

Гуфта мешавад, ки маблағгузории лоиҳаи мазкур аз ҷониби кишвари сармоягузор баъди анҷоми расмиёти дохилидавлатӣ дар Чин, оғоз мешавад.

Ба иттилои номбурда, номаҳои табодулӣ ҳанӯз моҳи ноябри соли 2025 аз ҷониби ҳукумати Тоҷикистон тасдиқ шуда, ба маҷлиси вакилон ирсол ва бо дигар вазорату идораҳо мувофиқа шудааст.

“Номаҳои мазкур аз экспедитсияи зиддикоррупсионӣ гузашта, дар он омилҳои бавуҷудоварандаи коррупсия ошкор карда нашудааст”, – гуфтааст ӯ.

Ба қавли ӯ, муовини раиси КДАМ гуфтааст, дар марҳалаи аввали ин лоиҳа солҳои 2017-2018 бо маблағгузории Чин дар минтақаҳои марзии Тоҷикистон бо Афғонистон 12 иншооти сарҳадӣ бунёд шудааст.

МАТЕРИАЛЫ ПО ТЕМЕ
“Мехоҳанд муносибати моро бо давлати Чин вайрон кунанд”. Додситони кул даргириҳо дар марзи Тоҷикистон бо Афғонистонро шарҳ дод

Бояд гуфт, дар гузашта хабари сохтмони пойгоҳи нав барои нерӯҳои тоҷик бо пули Чин дар Бадахшон баҳсҳоеро дар бораи ҳузури низомии он кишвар дар Осиёи Марказӣ барангехта буд.

Аз ҷумла, ин нукта моҳи октябри соли 2021 дар парлумони Тоҷикистон садо дода, гуфта мешуд, ки бар асоси созишнома миёни Вазорати корҳои дохилии Тоҷикистон ва Вазорати амнияти Чин дар вилояти Бадахшон иншооти нав бунёд мешавад.

Вазорати корҳои дохилии Тоҷикистон дертар ин иттилоъро рад карда гуфт, “маълумот дар бораи он ки гуё дар қаламрави Тоҷикистон пойгоҳи ҳарбии Чин бунёд мешавад, ба ҳақиқат мувофиқ нест. Масъалаи мазкур дар рӯзномаи муносибатҳои дуҷониба гузошта нашудааст”.

Ин масъала соли 2024 баъди навиштаи нашрияи бритониёии “Телеграф” дар бораи он ки “Чин бо назардошти хатари афзоянда аз Толибони ҳоким дар Афғонистон дар хоки Тоҷикистон пинҳонӣ як пойгоҳи низомӣ месозад”, дубора баҳснок шуд. Ин маротиб низ Вазорати корҳои хориҷии Тоҷикистон, вуҷуди пойгоҳи Чин дар Вилояти Мухтори Кӯҳистони Бадахшонро рад карда буд.

Дар Telegram, Facebook ва Instagram бо мо бимонед.

Сарфи назар аз афзоиши содирот, касри тавозуни савдои Тоҷикистон зиёд шудааст

By
admin
-
0

Касри савдои хориҷии Тоҷикистон дар моҳи январи соли ҷорӣ аз 478 млн доллар то 579 млн доллар зиёд шудааст. Дар ин бора дар гузориши ҳафтаинаи макроиқтисодии Бонки авруосиёёи рушд (БАОР) маълумот дода мешавад.

“Афзоиши каср ба зиёдшавии воридот ба андозаи 27,2% (нисбат ба як соли пеш) дар шароити болоравии талаботи дохилӣ дар иқтисод вобаста аст”, – таъкид мешавад дар гузориш.

Гуфта мешавад, Тоҷикистон хариди воситаҳои нақлиётро аз хориҷа ба андоза 52,7%, мошину таҷҳизотро 32,7% ва ғизоро 55,7% нисбат ба соли пешин зиёд кардааст.

“Ба туфайли афзоиши интиқоли фулузот (металлҳо)-и гаронбаҳо ва ранга, маҳсулоти нассоҷӣ ва маҳсулоти минералӣ бо шумули семент ва консентратҳои маъдан, содирот нисбат ба соли пешин 53,1% афзуд”, – таъкид мекунанд коршиносони БАОР.

Бино ба маълумоти Оҷонсии омори кишвар, савдои хориҷии кишвар дар моҳи январи соли ҷорӣ 929 млн долларро ташкил дод, ки 31,4% (221,9 млн доллар) зиёдтар дар муқоиса бо ҳамин давраи соли гузашта аст. Тавозуни савдо манфӣ ва ба 578,6 млн доллар баробар шуд.

Дар моҳи аввали соли равон Тоҷикистон бо 94 кишвар муомилоти молу маҳсулот анҷом додааст.

Содирот дар моҳи январ 175,2 млн долларро ташкил дод, ки ба андозаи 53,1% (60,8 млн доллар) зиёдтар нисбат ба ҳамин давраи соли 2025 мебошад.

 

Воридоти молу маҳсулот ба ҷумҳурӣ 753,8 млн долларро ташкил дод, ки ба андозаи 27,2% (161,1 млн доллар) зиёдтар дар муқоиса бо моҳи январи соли гузашта мебошад.

 

Шарикони асосии тиҷоратии кишвар дар ин давра, Чин (281 млн доллар), Русия (237 млн доллар) ва Қазоқистон (120 млн доллар) боқӣ мондаанд.

Дар Telegram, Facebook ва Instagram бо мо бимонед.

“Намоде аз вафодорӣ ба пешаи интихобкардааш”. Тоҷинисо Саидоваро дар оромгоҳи Лучоб ба хок супориданд

By
admin
-
0

Тоҷинисо Саидова, Ҳунарпешаи халқии Тоҷикистон, ки субҳи дирӯз дар 73-солагӣ даргузашт, асри ҳамон рӯз дар оромгоҳи “Лучоб”, макони дафни шахсиятҳои шинохтаи Тоҷикистон ба хок супорида шуд. Дар ин бора Мавлона Наҷмиддинова, ҳунарпешаи тоҷик, ки дар маросими ҷанозаи ӯ ширкат дошт, ба "Азия-Плюс" иттилоъ дод.

Ба қавли ӯ, ҷанозаи Саидова баъди намози аср дар Масҷиди ҷомеи ба номи Имоми Аъзам Абӯҳанифа (масҷиди нави Душанбе) хонда шуда, дар оромгоҳи Лучоб, дар наздикии қабри Асланшоҳ Раҳматуллоев, ки моҳи апрели соли гузашта аз олам чашм баст, ба хок супорида шудааст.

Дар бораи даргузашти ҳунарпеша, дирӯз дӯстону наздиконаш дар  шабакаҳои иҷтимоӣ хабар дода буданд.

Дар баробари садҳо ҳампешагону ҳаводоронаш, Рустами Эмомалӣ, шаҳрдори Душанбе ва раиси Маҷлиси миллии Тоҷикистон низ бинобар даргузашти Тоҷинисо Саидова изҳори ҳамдардӣ кард.

Вазорати фарҳанги кишвар низ аз номи аҳли фарҳанг ва санъати кишвар, ба пайвандон ва ҳаводорони “ин ситораи фазои санъат”, ҳамдардӣ баён кард.

“Саидова на танҳо ҳунарпешаи барҷастае буд, балки намоде аз вафодорӣ ба пешаи интихобкардааш, улгӯе аз тахассуси воло ва инсоният низ ба шумор мерафт. Даргузашти ин ҳунарпешаи асил, зоеъае ҷуброннопазир барои ҷомеъаи санъату ҳунар ва ҳаводорону шефтагони истеъдод ва ҷазаботи ӯ маҳсуб мешаванд”, – навиштааст ин ниҳод дар баёнияи худ.

 

Аз “Исёни арӯсон” то “Муҷассамаи ишқ”

Тоҷинисо Саидова аз ҳунарпешагони мумтози театр ва синамои тоҷик буда, бо иҷрои як қатор нақшҳои мондагор худро ҳамчун ҳунарпешаи вижа муаррифӣ ва аз худ ном гузошт. Ҳамкоронаш аз ӯ ҳамчун иҷрокунандаи бомаҳорати нақшҳои фоҷиавӣ ва драма ном мебаранд.

 

Ҳунарпеша 11-уми октябри соли 1953 дар ноҳияи Муъминобод ба дунё омада, соли 1975 Институти давлатии умумииттифоқии кинематографияи шаҳри Маскавро хатм кардааст.

Фаъолияти ҳунариаш соли 1975 дар Театри давлатии академӣ – драмавии ба номи Лоҳутӣ оғоз шуда, қариб ду даҳсола дар ин боргоҳи ҳунар нақш офарида, ҳунараш маҳз инҷо зуҳур ва ташаккул ёфтааст.

МАТЕРИАЛЫ ПО ТЕМЕ
Даргузашти Саидмурод Мардонов, Ҳунарпешаи халқии Тоҷикистон ва ҳаҷвнигори шинохта

Соли 1991 ӯ ба театри “Оина” омада, солҳо ҳунарманди ин театр буд.

Ӯ дар намоишномҳои “Интихоби домод”, “Хостгорӣ”, “Исёни арӯсон”, “Садо аз тобут”, “Кафшҳои Абулқосим”, “Охирин арӯси амиралмуъминин”, “Бахтатро бедор кун”, “Эдип”, “Ҷияни хира”, “Имтиҳон”, “Лаку Пак” нақш офаридааст, ки аз беҳтарин намоишномаҳои театри миллӣ дониста мешаванд.

Ҳамчунин, дар даҳҳо теленовеллаи “Оина” ва намоишҳои телевизионӣ, чун “Дугонаҳо ба театр мераванд”, “Зани оҳанин” низ бозигарӣ кардааст.

Ҳунрапеша баъдтар ба синамо низ рӯ овард ва дар филмҳои бадеии “Хатти парвоз”, “Дар ҷарӣ” (2 қисм), “Қӯшатир”, “Бозавқтар нигоҳ кун” (қисми 3), “Марди мутааллиқи ду зан”, “Муҷассамаи ишқ”, “Чашмаи хостаҳо” ҳунар офаридааст.

Ӯ соли 1996 бо унвони Ҳунарпешаи шоистаи Тоҷикистон ва соли 2006 бо унвони баланди Ҳунарпешаи халқии Тоҷикистон қадр шудааст.

Дар Telegram, Facebook ва Instagram бо мо бимонед.

Сафири Эрон дар Душанбе: “То охир мубориза мебарем ва таслим нахоҳем шуд”

By
admin
-
0

Рӯзи 28-уми феврал Амрико ва Исроил ба хоки Эрон ҳамла карданд ва дар пайи ин Ҷумҳурии Исломӣ ба пойгоҳҳои Амрико дар Ховари Миёна ва Исроил ҳамлаҳои ҷавобӣ кард. Ин вазъ ҳоло аксар кишварҳои ҷаҳонро нигарон кардааст.

Дар пайи ҳамлаҳои Амрикову Исроил ба Эрон, раҳбари ин кишвар Алии Хоманаӣ ва чанде аз мақомҳои низомии радаи аввал низ ҷон бохтанд. Рӯзи 5-уми март дар Сафорати Эрон дар Душанбе "Дафтари ёдбуд" боз шуд, ки ҷамъе аз мансабдорон, аҳли адабу фарҳанг ва шаҳрванди Тоҷикистон рафта, ба мардуми Эрон ҳамдардӣ баён кардан.

Хабарнигори "Азия-Плюс" онҷо ҳузур дошт ва бо Алиризо Ҳақиқиён, сафири Ҷумҳурии исломии Эрон дар Душанбе мусоҳибаи кӯтоҳе анҷом дод.

 

– Ҷаноби сафир, вақте музокирот ҷараён дошт, чаро Амрикову Исроил ба Эрон ҳамла карданд?

– Бисмиллоҳир-раҳманир-раҳим. Ҷо дорад, ки аввал аз давлат ва миллати азизи Тоҷикистон ва аз ҷаноби раисҷумҳури муҳтарам барои изҳори муҳаббат ва ҳамдардие, ки дар ин даврони сахт бо мардуми Эрон доштанд, ташаккури вижа кунам. Як бори дигар мушаххас шуд, ки мардумони Эрону Тоҷикистон ҳамдарду ҳамдили ҳамдигар ҳастанд ва дар воқеъ дар ғаму шодии ҳамдигар шарик ҳастанд.

Воқеаҳои охире, ки дар Эрон мегузарад, ба ин шакл аст: як бори дигар ҷаҳониён мутаваҷҷеҳ шуданд, ки душмани ғаддори мо ба ҳеҷ мантиқе пойдор нест. Ба ҳеҷ усули байналмилалӣ, маншури Созмони Милали Муттаҳид, усули инсонӣ ва ҳеҷ усули дигаре эътиқод надорад. Он чизе ки барои онҳо муҳим аст, тасаллут бар минтақа ва таслими ҳамаи мардуми минтақа аст. Барои манофеи номашруъе, ки онҳо доранд.

 

– Ҳоло вазъияти дохилӣ дар Эрон чӣ гуна аст?

– Шароити мо ин гуна аст, ки мо мусаммам ҳастем (қарори қатъӣ қабул кардаем, – АП), ки аз киёни худамон, аз миллати худамон ва аз сарзамини худамон дифоъ кунем ва то охир ин масирро пеш хоҳем бурд ва онҳоро қатъан пушаймон хоҳем кард.

Мо аз аввал ҳам гуфта будем, ки таслими зиёдахоҳиҳо, таслими султагариҳо нахоҳем шуд. Чуноне гуфтам, онҳо ҳеҷ усулеро намепазиранд ва ё дар зоти онҳо нест.

– Аксар коршиносони байналмилалӣ аз эҳтимоли сар задани як ҷанги густурда дар Ховари Миёна нигаронӣ доранд. Ба назари Шумо, оё ҳоло имкони ҳалли дипломатии ин ҷанг боқӣ мондааст?

– Мо ҳама гуна роҳҳоро тай карда истодаем. Аммо масиреро интихоб мекунем, ки онҳоро воқеан пушаймон кунад ва онҳоро сари ҷояшон биншонад. Ҳоло шароит ҳамин тавр аст, ки онҳо ҷанг мекунанд.

Шумо шоҳид ҳастед, ки мо бо онҳо ду бор музокира доштем, вале онҳо мизи музокираро мунфаҷир карданд. Лиҳозо нишон медиҳад, ки ҳеҷ эътиқоде ба ҳеҷ усуле надоранд. Дар як амалиёт беш аз 160 кӯдакро онҳо кушанд. Кӯдаке, ки дар сари синфи мадараса дарс мехондааст. Албатта, ин амали ҷадиде нест барои онҳо. Онҳо касоне ҳастанд, ки беш аз 30 ҳазор кӯдакро дар Ғазза ба қатлгоҳ бурданд ва онҳоро куштанд. Ин гуна аст душманони мо.

– Пешбинитон чист: имкони сари мизи музокирот нишастан боқӣ мондааст?

МАТЕРИАЛЫ ПО ТЕМЕ
Муҷтабо Хоманаӣ – писари Алии Хоманаӣ роҳбари нави Эрон интихоб шудааст

– Ҳоло чизе гуфта наметавонам.

– Шумо гуфтед ду бор бо Амрико музокирот доштед, ки ҳар ду маротиба ҳамла кард. Ва агар оқибати кор ҷанг аст, он музокирот чӣ маъно дошт?

– Зоти Амрико ҳамин гуна аст. Савобиқи ҳамлаи онҳо ба Ироқро бинед. Ҳамлаи онҳо ба Афғонистонро бинед. Мо бо онҳо музокира доштем ва сари БАРҶОМ тавофуқ кардем, вале худашон онро пора карданд. Боз дубора музокира хостанд, муҷаддадан музокира кардем. Аммо ин сабаб намешавад, ки ба дурӯғу фиребҳои онҳо дил бандем ва кори худро идома надиҳем. Мо ҳамаи сенариёҳои мухталифро дар назар доштем ва омода будем.

– Бо вуҷуди ин, Эрон талафоти сангин дод...

– Маълум аст, ки душманони мо чӣ гуна ҳастанд. Вале мо сенариёҳои мухталифро дар назар гирифта ва худамонро омода карда будем. Ба ҳар ҳол, душман – душманест, ки ба ҳеҷ усуле эътиқод надорад.

– Агар ин даргирӣ ҳафтаҳо идома ёбад, Эрон то куҷо тавони муқобила ва ҷавобҳои қотеонаро дорад?

– Эрон қудрати кофии худашро дорад, миллати сарфарози Эрон дар саҳна ҳастанд. Нерӯҳои низомии мо муқтадирона аз киёни худашон дифоъ мекунанд. То ҳар вақте ки лозим бошад, мо муқовимат мекунем ва намегузорем онҳо ба ҳадафашон бирасанд.

МАТЕРИАЛЫ ПО ТЕМЕ
Ҳамла ба анборҳои нафту полоишгоҳҳо. Охирин хабарҳо аз Эрону Исроил ва дигар кишварҳои Ховари Миёна

– Теъдоди зиёди зиёиён, мансабдорони давлатӣ ва шаҳрвандони Тоҷикистон барои изҳори ҳамдарӣ ба Сафорати Эрон дар Душанбе омаданд. Ин ҳамовозии ҷомеаи Тоҷикистон дар ин рӯзҳои мушкил барои муносибатҳои дуҷонибаи Душанбеву Теҳрон чӣ аҳмият дорад?

– Равобити мо бо Тоҷикистон равобити густарда ва амиқе аст. Равобит дар ҳамаи арсаҳо, ҳамаи ҳавзаҳо ҳаст. Мо равобити бисёр хуб, дӯстона, бародарона бо Тоҷикистон дорем ва онро идома медиҳем.

– Мавқеи Тоҷикистонро алайҳи ин ҳамла чӣ гуна арзёбӣ мекунед?

– Мавқеи Тоҷикистон дар ҳаводиси охир бисёр арзишманд буд. Мо дар тамоми маҷомеи байналмилалӣ ва ҳамкориҳои минтақавӣ ҳамеша аз якдигар ҳимоят кардем. Дар робитаҳои дуҷониба низ пайваста мавқеи ҳамдигарро дастгирӣ мекунем.

– Ин ҳаводис ба ҳамкориҳои иқтисодии Эрону Тоҷикистон чӣ таъсире расонида метавонад?

– Равобити Эрон ва Тоҷикистон, арз кардам, дар ҳамаи заминаҳо, бахусус дар ҳавзаи иқтисод ва тиҷорат рӯ ба пешрафт будааст ва ҳатман ҳамин тавр идома хоҳад ёфт.

Бо охирин таҳаввулоти Эрону дигар кишварҳои Ховари Миёна, вазъи тоҷикистониҳо дар ин кишварҳо дар ин бахши махсуси "Азия-Плюс" огоҳ шавед: Ҳамлаи Амрикову Исроил ба Эрон

Дар Telegram, Facebook ва Instagram бо мо бимонед.

1...101112...5,384Page 11 of 5,384