Душанбе. 28-уми апрел. ОИ «Азия-Плюс» – ҶСК «Тоҷиксодиротбонк» ба низоми муттаҳидаи ҳисоббаробаркунии «ОРС» (низоми муттаҳидаи ҳисоббаробаркунӣ) васл гардид.

Чӣ тавре ки аз бонки мазкур ба ОИ «Азия-Плюс» хабар доданд, васлшавии бонк ба ин низом ба дорандагони кортҳои ҶСК «Тоҷиксодиротбонк» имкон медиҳад, ки аз кортҳои худ бо пардохти ҳадди аққал аз маблағи умумӣ – 1 дарсад аз банкоматҳо ва терминалҳои бонкҳои узви ОРС истифода баранд.

Зикр гардид, ки зерсохтори низоми бонкии кишварҳои узви ОРС, ки бо нишони тиҷоратии ягона муттаҳид шудаанд, аз ҳудуди 5 ҳазор адад банкомат иборат буда, мақеи ҷуғрофии ҷойгиршавии он аз Белорус то Камчатка аст. «Ғайр аз ин, ба зерсохтори низом ҳамчунин садҳо дафтарҳои кории бонкҳои узв низ дохил мешаванд, ки барои хизматрасонӣ ба дорандагони кортҳои бонкӣ пешбинӣ шудаанд», – афзуд манбаъ.

Душанбе. 28-уми апрел. ОИ «Азия-Плюс» – Муовини раиси ШСХК «Барқи тоҷик» Нурмаҳмад Холназаров мӯътақид аст, ки шаҳрвандоне, ки аз истифодаи лампаҳои каммасрафи барқӣ даст мекашанд, ба худ зиён мерасонанд, зеро лозим меояд барои истифодаи барқ маблағи зиёд пардохт намоянд.

Чанде қабл дар нишасти хабарӣ номбурда изҳор дошт, ки ширкат чунин ваколатеро доро нест, ки шахсони аз истифодаи лампаҳои каммасрафи барқӣ дасткашидаро ҷазо диҳад. «Мо танҳо ба худи шаҳрвандон ва ҳисси дарки масъулияти онҳо такя хоҳем кард», – гуфт ӯ.

Дар ҳамин ҳол, мувофиқи маълумоти ширкат, феълан қарзи умумии истифодабарандгон дар назди ширкат 308 млн. сомониро ташкил медиҳад, ки бештари он ба вазорати мелиоратсия ва захираҳои об (93,1 млн. сомонӣ) ва КВД «Талко» (ҳудуди 90 млн. сомонӣ) тааллуқ дорад. Қарзи аҳолӣ 71,8 млн. сомониро ташкил медиҳад.

Душанбе. 28-уми апрел. ОИ «Азия-Плюс» – Имрӯз бо ташаббус ва сарпарастии Вазорати маорифи ҶТ дар ҳамкорӣ бо Донишгоҳи давлатии тиҷорати Тоҷикистон ва бо дастгирии Барномаи «Мусоидат ба таҳсилоти олӣ»-и Институти «Ҷамъияти Кушода» – Тоҷикистон дар Душанбе конфронси ҷумҳуриявии «Иштироки

толибилмон

дар идоракунии донишгоҳ» баргузор мегардад.

Конфронс ба

толибилмони



мактабҳои олии Тоҷикистон имкон медиҳад малакаи худро дар кори илмию тадқиқотӣ

 

дар соҳаи идоракунии соҳаи маориф инкишоф диҳанд.

            

Чӣ тавре ки ҳамоҳангсози барномаи «Мусоидат ба таҳсилоти олӣ» Зарина Қодирова ба ОИ «Азия-Плюс» хабар дод, дар конфронс 20 маърўзаи донишҷўён аз вилоятҳои Суғд ва Хатлон, ВМКБ ва шаҳри Душанбе, ки дар озмуни моҳи марти соли 2009 гузарондаи Барномаи «Мусоидат ба таҳсилоти олӣ»-и Институти «Ҷамъияти Кушода» – Тоҷикистон ғолиб баромадаанд, шунида мешаванд.

            

Ба гуфтаи ӯ, толибилмон дар маърўзаҳои худ: «Нақши донишҷўён дар идоракунии донишгоҳ», «Худидоракунии донишҷўён: воқеият ё устура», «Иттиҳодияҳои донишҷўён чун омили ҷалб намудани хонандагон дар раванди қабули қарорҳо» масъалаҳои иштироки донишҷўёнро дар риштаҳои гуногуни ҳаёти мактабҳои олӣ баррасӣ хоҳанд кард.

З.Қодирова афзуд, ҳайати ҳакамони мустақил, ки аз намояндагони макотиби олӣ иборат мебошад, маърўзаҳои муҳаққиқони ҷавонро арзёбӣ менамояд ва 3 маърўзаи беҳтаринро бо мукофотҳои махсус –

компютерҳо




 

сарфароз мегардонад.

           

Душанбе. 28-уми апрел. ОИ «Азия-Плюс» – «Ширкати алюминии тоҷик (ТАЛКО) ба ҳукумат пешниҳод сохт, ки тарзи фаъолияти корхонаро тағйир доданист ва ният дорад, аз истифодаи низоми толлингӣ даст кашад, аммо ҳукумат муқобили он аст», – изҳор дошт дар ҷамъи рӯзноманигорон муовини аввали вазири рушди иқтисод ва савдои ҶТ Амонулло Ашӯр.

           

Муовини аввали вазир гуфт, дар сурати даст кашидан аз низоми мазкур, ҳаҷми воридоти гилхок коҳиш ёфта, истеҳсоли алюминии аввалия метавонад то 260-300 ҳазор тонна поин равад. «Чун истеҳсоли алюминий 3,8 дарсади ММД ва 38-40 дарсади ҳаҷми умумии истеҳсоли маҳсулоти саноатии кишварро ташкил медиҳад, ҳукумат ин пешниҳодро пазируфта наметавонад», – гуфт ӯ.

           

Ба гуфтаи А.Ашӯр, ҳукумат дар андешаи бознигарии тарофаҳои интиқоли гилхок ва ҷалби сармоягузорӣ ба истеҳсоли моддаҳои дар таркиби гилхок мавҷудбуда машғул аст. «Мо дар водиҳои Рашту Ҳисор ва Зарафшон беш аз 100 ҳазор тонна захираҳои гилхок дорем», – бо боварӣ мегӯяд ӯ.

           

Амонулло Ашӯр таъкид сохт, ки мебояд сари масъалаи таъмини истеҳсолкунандагони ватанӣ бо ашёи хоми алюминий чораҳои ҷиддӣ андешид, зеро дар кишвар аз маҳсулоти алюминий беш аз 13 корхона истифода мебаранд ва феълан бар асари камбуди ашё корхонаҳои «Регаркабел», Тоҷиккабел», «Чароғ» ва ҳудуди 5 корхона дар вилояти Суғд аз фаъолият бозмондаанд.

           

Муовини аввали вазир афзуд, рӯзҳои наздик вазорат ҷиҳати дастгирӣ аз мавқеихуд ба ҳукумати кишвар пешниҳодот ирсол хоҳад дошт.

           

Душанбе. 28-уми апрел. ОИ «Азия-Плюс» – Чанде қабл дар нишасти матбуотӣ ректори Донишгоҳи давлатии тиббии Тоҷикистон Убайдулло Қурбонов изҳор дошт, ки донишгоҳ дар соли нави хониш коршиносони хориҷиро ба фаъолияти омӯзгорӣ ҷалб месозад.

           

Ба гуфтаи ӯ, иқдоми мазкур баҳри баланд бардоштани рейтинги дорнишгоҳ дар сатҳи байнулмилалӣ равона шудааст. «Дар аксари мавридҳо ба рейтинги макотиби олӣ аз рӯи то кадом андоза ба раванди таълим ҷалб кардани коршиносони хориҷӣ ва таҳсили донишҷӯёни хориҷӣ дар он баҳо дода мешавад», – гуфт ӯ.

           

Ректори донишгоҳ афзуд, феълан дар донишгоҳ 459 донишҷӯ аз мамолики хориҷӣ таҳсил мекунанд. Дар донишгоҳ 4 факулта – тиббӣ, дорусозӣ, дандонпизишкӣ ва тандурустии ҷамъиятӣ амал мекунад.

           

Душанбе. 28-уми апрел. ОИ «Азия-Плюс» – Дирӯз дар ҷамъи рӯзноманигорон сардори раёсати банақшагирии ширкати «Барқи тоҷик» Сӯҳроб Раҳимов изҳор дошт, ки масъалаи пардохти қарзи ширкат ба нерӯгоҳи Сангтӯда-1 дар ҳоли ҳаллу фасл қарор дорад.

           

Ба гуфтаи ӯ, гап сари он аст, ки маълумот оид ба ҳаҷми маблағи қарз дар ҳарду ҷониб як хел нест. «Тибқи маълумоти мо, қарз 30 млн. сомонӣ, вале аз нерӯгоҳ маълумот пешниҳод карданд, ки он 50 млн. сомонӣ аст», – гуфт ӯ.

           

С.Раҳимов мегӯяд, гуногун будани маълумот оид ба ҳаҷми қарз дар натиҷаи он пайдо шудааст, ки нерӯгоҳ мустақилона ва бидуни мувофиқасозӣ бо ширкат аз 1-уми январи соли ҷорӣ тарофаҳои нави истифодаи нерӯи барқро ҷорӣ сохтааст, ки он ба 3,1 сент барои 1 кВт/соат баробар аст. «Аз оғози соли ҷорӣ то имрӯз ширкати «Барқи тоҷик» ба суратҳисоби нерӯгоҳ беш аз 38 млн. сомонӣ маблағ гузаронид», – афзуд ӯ.

           

Душанбе. 28-уми апрел. ОИ «Азия-Плюс» – Айни замон гурӯҳи донишҷӯёни факултаи дорусозии Донишгоҳи давлатии тиббии Тоҷикистон дар Ҷумҳурии Исломии Эрон таҷриба меомӯзанд.

           

Тавре декани факултаи мазкури донишгоҳ Матлуба Ҳақназарова ба хабарнигори ОИ «Азия-Плюс» иттилоъ дод, дар муддати беш аз ду ҳафта 10 нафар донишҷӯи факултаи дорусозии донишгоҳ бо фаъолияти ширкатҳои дорусозии Эрон ва технологияи муосири мавриди истифода қарордодаи онҳо ҳангоми тайёр кардани доруҳои тиббӣ аз наздик ошно мегарданд.

           

Ба қавли М.Ҳақназарова, таҷрибаомӯзии донишҷӯён дар натиҷаи роҳандозии ҳамкориҳои дуҷонибаи пурсамар бо Эрон ва кӯшишоти мақомоти раҳбарии донишгоҳ имконпазир гардид.

           

Хуҷанд. 27-уми апрел. ОИ «Азия-Плюс» – Дар шаҳри Хуҷанд баъди таваққуфи сесола корхонаи истеҳсоли шими ҷинси «Сано» дубора ба фаъолият шурӯъ кард.

           

Тавре сардори шӯъбаи истеҳсолоти корхона Далер Боев дар сӯҳбат ба хабарнигори ОИ «Азия-Плюс» изҳор дошт, ба туфайли фармоиши корхонаи «Швейпром»-и Русия муяссар шудааст, ки корхона аз нав ба фаъолият пардозад. «Тибқи ин фармоиш, корхона то ахири сол бо кор таъмин хоҳад буд», – гуфт ӯ.

           

Ба қавли Д.Боев, феълан дар корхона 50 нафар машғули кор буда, тадриҷан бо ба кор даровардани хатҳои дигари истеҳсолӣ шумори онҳо бештар хоҳад шуд. «То моҳи оянда боз 50 нафари дигар бо ҷойи корӣ таъмин карда мешаванд», – афзуд вай.