Душанбе. 25-уми март. ОИ «Азия-Плюс» – Дар Тоҷикистон шурӯъ аз

имрӯз

ба шаҳрвандони хориҷӣ ва шахсони шаҳрвандӣ надошта тартиботи нави додани иҷозатномаи кор ҷорӣ мегардад.

           

Чӣ тавре ки аз Хадамоти муҳоҷирати Вазорати умури дохилии ҷумҳурӣ ба ОИ «Азия-Плюс» хабар доданд, акнун барои ҷалби ғайриқонунии шаҳрвандони хориҷӣ ба кор дар Тоҷикистон ҷазои маъмурӣ дар шакли ҷарима пешбинӣ шудааст, ки он барои шахсони воқеӣ дар ҳаҷми аз 30 то 50, шахсони мансабдор – аз 70 то 100 ва шахсониҳуқуқӣ – аз 250 то 300 музди меҳнати

ҳадди

аққал муқаррар гардидааст.

           

Ба ақидаи коршиноси мустақил Абдулло Қурбонов, тартиботи нав ба танзими раванди муҳоҷират, ҳифзи бозори дохилии меҳнат, назорати қувваи корӣ аз хориҷи кишвар ва воридоти зиёди маблағ ба буҷа мусоидат хоҳад кард.

           

Тибқи маълумоти хадамоти муҳоҷират, агар соли 2007 ҳудуди 30 ҳазор мутахассисони хориҷӣ вориди Тоҷикистон гардида бошанд, пас ин шумора дар соли гузашта ба 62 ҳазор нафар расидааст. Соли 2008 барои будубоши ғайриқонунӣ 968 нафар шаҳрванди хориҷӣ ҷазои маъмурӣ гирифта, 186 нафарашон ба ватан фиристода шуда буданд.

           

Душанбе. 1-уми апрел. ОИ «Азия-Плюс» – Имрӯз дар Тоҷикистон маъракаи даъвати баҳорӣ ба хизмат дар сафи Қувваҳои Мусаллаҳи ҶТ оғоз гардид. Мутобиқи фармони президенти ҷумҳурӣ, он то 31-уми май идома хоҳад ёфт.

           

Ёдрас мекунем, ки маъракаи даъвати тирамоҳии гузашта пеш аз мӯҳлат ва пурра ба иҷро расида буд. Тибқи маълумоти Вазоарти мудофиаи ҷумҳурӣ, ҳамасола 15-16 ҳазор нафар ба хизмат дар сафи Қувваҳои Мусаллаҳ даъват карда мешавад.

           

Феълан дар кишвар беш аз 600 ҳазор нафар шаҳрвандони синну соли даъват ба хизмати ҳарбӣ ба сар мебаранд, вале 150 ҳазор нафари онҳо пурра аз хизмат озод ё мӯҳлати даъваташон ба хизмат мавқуф гузошта шудааст.

           

Душанбе. 1-уми апрел. ОИ «Азия-Плюс» – Мушовир оид ба масоили ҳуқуқии Корпоратсияи байнулмилалии молиявӣ (


IFC


) оид ба рушди соҳибкории хурду миёна дар Тоҷикистон Мадина Нурматова бар ин назар аст, ки низоми иҷозатномадиҳӣ дар Тоҷикистон аслан таҷдиди назар нашуда, он барои ташкил ва рушди тиҷорат яке аз монеаҳои асосии маъмурӣ маҳсуб мегардад.

           

Дар мусоҳиба ба хабарнигори ОИ «Азия-Плюс» номбурда изҳор дошт, низоми иҷозатномадиҳии мавҷуда дар Тоҷикистон бештар дорои талаботи кӯҳнашудаи замони шӯравӣ аст. «Гузашта аз ин, низоми мазкур шаффоф нест, зеро аксари соҳибкорон ба як қатор асноди меъёрӣ-ҳуқуқӣ дастрасӣ надоранд», – гуфт ӯ.

           

М.Нурматова таъкид сохт, ки доштани иҷозатнома барои аксари соҳибкорон ҳатмӣ аст, вале барои гирифтани он вақту маблағи зиёд масраф мегардад ва соҳибкоррро баҳри ба даст овардани иҷозатномаи оғози фаъолият лозим аст, ду моҳ интизорӣ кашад. «Мушкилоти мавҷуда дар ин соҳа ба афзоиши ришвахӯрӣ ва пардохти маблағҳои ғайрирасмӣ ба мансабдорон шароит фароҳам месозад, ки чунин вазъ аксари шаҳрвандонро аз машғул гардидан ба фаъолияти соҳибкорӣ бозмедорад», – баён дошт вай.

           

Ба назари коршинос, мушкилоти зикргардида натиҷаи мавҷуд набудани низоми ягона аст. «Бидуни ворид сохтани тағйирот дар низоми иҷозатномадиҳии ҷумҳурӣ, интизорӣ доштани беҳбуди фаъолияти соҳибкории хурду миёнаро чашмдор будан нашояд», – афзуд М.Нурматова.

           

Душанбе. 1-уми апрел. Дар мулоқоти раиси Палатаи савдо ва саноати ҷумҳурӣ Шариф Саид бо муовини раиси Шӯрои кории Созмони Ҳамкории Шанхай Дмитрий Мезентсев, ки чанде қабл дар шаҳри Душанбе баргузор шуд, масоили густариши ҳамкориҳои дуҷониба дар чаҳорчӯбаи СҲШ мавриди баррасӣ қарор гирифтанд.

           

Чӣ тавре ки аз палатаи мазкур ба ОИ «Азия-Плюс» хабар доданд, дар вохӯрӣ ҷонибҳо атрофи масоили роҳандозии робитаи мустақим миёни доираҳои молиявӣ ва тиҷоратии кишварҳо ва ҷалби онҳо ба ҳамкории пурсамари мутақобила дар соҳаи иқтисод ва сармоягузорӣ ибрози ақида намуданд.

           

Ғайр аз ин, Д.Мезентсев ва Ш.Саид ба масоили барои Тоҷикистон муҳим, аз қабили ҳифзи сармоягузориҳо, сохтмони нерӯгоҳҳои хурду бузург, раванди муҳоҷират, ҳифзи иҷтимоии аҳолӣ, такмили механизмҳои фаъолияти суғуртакунӣ, боркашонӣ ва транзити борҳо таваҷҷӯҳ зоҳир сохтанд.

Душанбе. 1-уми апрел. ОИ «Азия-Плюс» – Дирӯз намояндаи Бонки рушди Осиё дар Тоҷикистон Макото Оҷиро дар ҷамъи рӯзноманигорон изҳор дошт, ки бонк ният дорад, ҷиҳати амалисозии барномаи зиддибӯҳронии ҳукумати Тоҷикистон ва рафъи оқибатҳои бӯҳрони молӣ 40 млн доллари ИМА ихтисос диҳад.

Ба қавли ӯ, маблағи мазкур аз ҳисоби 102 млн. $ воситаҳои Бунёди рушди Осиё, ки ба Тоҷикистон барои солҳои 2009-2010 ҷудо гардидааст, пешниҳод карда мешавад. «Зимни баррасии барномаи зиддибӯҳрони ҳукумат бонк ба ҷанбаи иҷтимоии он, аз ҷумла ҳифзи иҷтимоии аҳолӣ, ташкили ҷойҳои кории нав, кӯмак ба қишри осебпазири ҷомеа ва пардохти хизматрасониҳои коммуналии муассисаҳои иҷтимоӣ таваҷҷӯҳ зоҳир хоҳад кард», – изҳор дошт ӯ.

М.Оҷиро мегӯяд, ояндаи наздик се гурӯҳи намояндагони бонк баҳри муайян сохтани амалисозии лоиҳаҳо барои ду соли минбаъда дар Тоҷикистон ба кишвари мо меоянд. Дар мавриди ҷудо кардани маблағҳои иловагӣ номбурда гуфт, «мо чунин имконият дорем ва он мавриди баррасӣ қарор дорад».

Душанбе. 31-уми март. ОИ «Азия-Плюс» – Хавфи асосие, ки Тоҷикистон бо он дар соли ҷорӣ рӯбарӯ хоҳад шуд, коҳиши интиқоли маблағҳои муҳоҷирони меҳнатӣ аз хориҷи кишвар мебошад. Дар гузориши нави иқтисодии Бонки рушди Осиё таҳти унвони «Дурнамои рушди Осиё дар соли 2009» гуфта мешавад, соли равон ҳаҷми интиқоли маблағҳои муҳоҷирони тоҷик ба андозаи 30 дарсад ё аз он бештар коҳиш меёбад. Моҳи январи соли ҷорӣ ҳаҷми интиқоли маблағҳои муҳоҷирони тоҷик ба миқдори 22 дарсад поин рафт.

Имрӯз зимни муаррифии гузориши номбурда иқтисодчии Намояндагии доимии БРО дар Тоҷикистон Зафар Ҳотамов изҳор дошт, ки соли гузашта ҳаҷми интиқоли маблағҳои муҳоҷирон ба Тоҷикистон 60 дарсад афзудааст.

Дар гузориши нави иқтисодии БРО зикр мегардад, ки бар асари афзоиши сусти истеҳсолот ва коҳиши ҳаҷми маҳсулоти содиротӣ, феълан сеяки аҳолии қобили кори ҷумҳурӣ дар хориҷи кишвар фаъолият доранд ва ин вазъ ба он оварда расонидааст, ки дар дохили ҷумҳурӣ ба мутахассисони баъзе аз бахшҳо эҳтиёҷ пайдо гардидааст. «Бо ҷойи корӣ таъмин намудани муҳоҷирони баргашта дар навбати худ ба рушди бахши хусусӣ вобаста буда, ҳарчанд ҳукумат баҳри ҷалби сармоягузории хориҷӣ кӯшишоте ба харҷ диҳад ҳам, дар ин самт то ҳанӯз мушкилоти зиёде мавҷуданд», – афзуд З.Ҳотамов.