Душанбе. 3-юми феврал. ОИ «Азия-Плюс» – Коршиноси Маркази тадқиқоти стратегии назди президенти Тоҷикистон Фирӯз Саидов бар чунин назар аст, ки сарусадои босуръат боло рафтани қурби доллар нисбат ба сомонӣ аввали баҳор анҷом хоҳад ёфт.

           

Ф.Саидов мегӯяд, боло рафтани қурби доллари амрикоӣ нисбат ба асъори миллӣ ба бӯҳрони молии ҷаҳонӣ ва вобастагии зич доштани сомонӣ ба рубли русӣ марбут аст, зеро Русия яке аз шарикони асосии тиҷоратии Тоҷикистон мебошад ва тиҷорат миёни кишварҳо тариқи доллар сурат мегирад.

           

Ба ақида Ф.Саидов, бинобар бӯҳрони молии ҷаҳонӣ дар аксари мамолики ҷаҳон эҳтиёҷот ба доллари амрикоӣ зиёд шуд ва ин омил низ ба афзоиши қурби доллари амрикоӣ мусоидат кардааст.

           

Коршинос чунин мешуморад, ки дар вазъи мавҷуда ҳукумати ҷумҳуриро зарур аст, истеҳсоли маводи ниёзи аввалияро дар ҷумҳурӣ афзуда, воридоти онро аз хориҷи кишвар коҳиш диҳад. «Содироти маҳсулоти макаронӣ, гӯгирд, намак, равғни растанӣ, нӯшокиҳои мевагӣ ва намуди дигари чунин маҳсулот ба устувории қурби асъори миллии ҷумҳурӣ мусоидат карда наметавонад», – афзуд Ф.Саидов.

           

Ёдовар мешавем, тайи як моҳи ахир қурби ғайрирасмии доллари амрикоӣ нисбат ба сомонӣ аз 3 сомониву 50 дирам ба 3 сомониву 90дирам барои 1 доллар зиёд шуд.

Реклама на asia+

Душанбе. 3-юми феврал. ОИ «Азия-Плюс» – Вазири кишоварзии ҷумҳурӣ Қосим Қосимов аз фаъолияти муассисаҳои давлатӣ оид ба муҳофизати растаниҳо ва мубориза бо малах ба мавсими киштукори имсола изҳори норозигӣ кард.

Тавре сухангӯи вазорат Нарзулло Додобоев ба ОИ «Азия-Плюс» хабар дод, зимни ҷаласа бо иштироки мақомоти раҳбарӣ ва коршиносони ин муассисаҳо Қ.Қосимов аз ҷараёни омодагии техникаи махсус ва заҳрҳои кимиёвӣ барои мубориза бо малах ба мавсими киштукор изҳори норозигӣ кард.

Ба гуфтаи Н.Додобоев, вазир супориш дод, ки дар муддати ду ҳафта барои соли 2009 ду барнома – «Барномаи мубориза бо малах» ва «Барномаи муҳофизати растаниҳо» таҳия гардад. Қобили зикр аст, ки соли гузашта майдони 130 ҳазор гектар замин дар кишвар мавриди ҳуҷуми малахҳо қарор гирифта буд.

Реклама на asia+

Душанбе. 3-юми феврал. ОИ «Азия-Плюс» –

Имрӯз ба ҷумҳуриамон бо сафари расмӣ вазири бозаргонии Ҷумҳурии Исломии Ирон – Сайидмасъуд Миркозимӣ меояд.

Тавре ба ОИ «Азия-Плюс» аз вазорати корҳои хориҷии кишвар хабар доданд, ҳадаф аз боздиди дурӯзаи вазири иронӣ, густариши ҳамкориҳои тиҷориву иқтисодӣ миёни ду кишвар арзёбӣ мешавад.

Ба гуфтаи манбаъ, пагоҳ оқои Миркозимӣ бо нахуствазири мамлакат Оқил Оқилов, вазири рушди иқтисоду савдо Ғуломҷон Бобозода ва раиси Маҷлиси миллии Маҷлиси Олии ҷумҳурӣ Маҳмадсаид Убайдуллоев дидору гуфтугӯ хоҳад кард. Фардо иштироки вазири бозаргонии Ҷумҳурии Исломии Ирон дар маросими гузоштани хишти аввали бинои Маркази тиҷории Ирон дар Душанбе ба нақша гирифта шудааст. 5 –уми феврал Сайидмасъуд Миркозимӣ бо вазири корҳои хориҷа Ҳамрохон Зарифӣ ва вазири энергетика ва саноати мамлакат Гул Шералӣ мулоқот хоҳад кард.

Реклама на asia+

Душанбе. 3-юми феврал. ОИ «Азия-Плюс» – Соатҳои наздик котиби Шӯрои амнияти Тоҷикистон Амирқул Азимов ва муовини аввали вазири дифои кишвар Рамил Нодиров ҷиҳати иштирок дар ҷаласаи ғайринавбатии муштараки Шӯрои вазирони корҳои хориҷа, мудофиа ва Кумитаи дабирони Шӯрои амнияти Созмони аҳдномаи амнияти дастаҷамъӣ ба шаҳри Маскав сафар мекунанд.

Тавре ба ОИ «Азия-Плюс» аз хадамоти матбуотии Паймони амнияти дастаҷамъӣ хабар доданд, нишасти муштараки намояндагони Шӯроҳо пагоҳ ба кори худ шурӯъ хоҳад кард. Ба рӯзномаи ҷаласа барои баррасӣ масоили марбут ба баланд бардоштани потенсиали Созмони аҳдномаи амнияти дастаҷамъӣ дар роҳи таъмини амнияти дастаҷамъии кишварҳои аъзои он ворид гардидааст.

Реклама на asia+

           

Душанбе. 3-юми феврал. ОИ «Азия-Плюс» – Бо назардошти бӯҳрони энергетикии мавҷуда мақомоти раҳбарии КВД «Ширкати алюминии Тоҷикистон» оид ба ҷорӣ сохтани реҷаи махсуси коҳиши хароҷоти нерӯи барқ дар тамоми сохторҳои ширкат қарор қабул кард.

           

Тавре сухангӯи ширкат Саёҳат Қодирова ба ОИ «Азия-Плюс» хабар дод, феълан қарори коҳиши ҳаҷми истифодаи нерӯи барқ ва гудохтани алюминий амалӣ гардида, аллакай кори беш аз 100 ванаҳои электролизӣ қатъ гардидааст ва истифодаи нерӯи барқ то 15 млн. кВт/соат дар як шабонарӯз кам карда шудааст. «Қаблан корхона дар як шабонарӯз 21 млн. кВт/соат нерӯи барқ истифода мекард ва феълан ҷиҳати коҳиши ҳаҷми истифодаи он то 14 млн. кВт/соат дар як шабонарӯз чораҳо андешида мешаванд», – гуфт ӯ.

           

Ба гуфтаи ӯ, бо мақсади то ҳадди камтарин расонидани хароҷот ба қувваи корӣ дар сурати нигоҳ доштани ҷойи корӣ соати корӣ дар корхона 1 соат кам карда шуд. «Оид ба кам кардани хароҷоти марбут ба корҳои ташкилӣ, истифодаи нақлиёт ва ғайра низ тадбирҳо андешида мешаванд», – изҳор дошт С.Қодирова.

           

Сухангӯи ширкат афзуд, ба болои бӯҳрони молӣ бӯҳрони энергетикӣ низ ба фаъолияти корхона таъсири манфӣ расонид ва дар чунин шароит менеҷменти ширкат ҷиҳати қатъ нагаштани фаъолияти корхона ва нигоҳ доштани имконоти иқтидории он тамоми чораҳои зиддибӯҳрониро мавриди амал қарор хоҳад дод.

Реклама на asia+

           

Кӯлоб. 3-юми феврал. ОИ «Азия-Плюс» – Шӯъбаҳои бонкҳои кишвар дар минтақаи Кӯлоб, ки соли гузашта ба

 

4 ноҳияи минтақа баҳри истеҳсоли пунбадона қарз ҷудо карда буданд, ба Вазорати молияи ҷумҳурӣ 9 млн. 280 ҳазору 953 сомонӣ маблағи қарзро пардохт намуданд, ки ин миқдор 34,78 дарсади ҳаҷми умумии қарзи ҷудошударо ташкил медиҳад.

           

Ба гуфтаи мудири шӯъбаи Бонки миллии Тоҷикистон дар минтақаи Кӯлоб Абдукарим Неъматов, дар мавсими киштукори соли 2008 барои истеҳсоли пахта дар майдони


25186 гектар

ба кишоварзон 39 млн. 957 ҳазору 887 сомонӣ қарз ихтисос дода шуд, ки 27 млн. 471 ҳазору 796 сомонии он маблағи Вазорати молия мебошад.

Реклама на asia+

           

Душанбе. 3-юми феврал. ОИ «Азия-Плюс» – Ояндаи наздик китобхонаи илмии Донишгоҳи миллии Тоҷикистон бо китобҳое, ки зимни баргузории чорабинии хайрия аз ҷониби Фонди байнидавлатиии ҳамкории гуманитарии кишварҳои узви ИДМ ҷамъоварӣ шуданд, ғанӣ мегардад.

           

Ба гуфтаи котиби матбуотии фонд Александр Калугин, китобҳои мазкур моҳи декабр дар Маскав ҷамъоварӣ гардида, дар он беш аз 20 ташкилотҳову нашриёт саҳм гузоштаанд. «Ба ҷуз Тоҷикистон, адабиёти ҷамъовардашуда ба китобхонаҳои илмии Озарбойҷон, Арманистон, Белорус, Қазоқистон, Қирғизистон, Туркманистон, Ӯзбекистон ва Туркманистон низ фиристода мешаванд», – гуфт ӯ.

           

Номбурда афзуд, 26-уми феврал барои кормандони китобхонаҳои кишварҳои узви ИДМ давраи омӯзишии 10-рӯза оғоз мегардад ва иштирокдорон бо фаъолияти коргузории китобхонаҳои намунавии шаҳрҳои Бишкек, Маскав, Санкт-Петербург, Минск ва Киев аз наздик ошно хоҳанд гашт.

Реклама на asia+