Душанбе. 31-уми июл. ОИ «Азия-Плюс» – Айни замон дар шаҳри Душанбе ҷаласаи Шӯрои машваратии назди президенти Тоҷикистон оид ба беҳбуди фазои сармоягузорӣ мегузарад. Тибқи иттилои дафтари матбуоти сарвари давлат, ҷаласа таҳти раёсати сарвари давлат Эмомалӣ Раҳмон мегузарад, ки дар он сарвазири ҷумҳурӣ Оқил Оқилов, аъзои гурӯҳи иқтисодии ҳукумат, намояндагони созмонҳои мададрасони байнулмилалӣ, аз қабили Бонки рушди Осиё, Хазинаи байнулмилалии асъор, Бонки ҷаҳонӣ, Бонки таҷдид ва рушди Аврупо ва дигар ниҳодҳои молиявии муқими Тоҷикистон иштирок доранд.

Дар ҷаласа масъалаи беҳсозии муҳити сармоягузорӣ дар Тоҷикистон мавриди баррасӣ қарор дорад.

Шӯрои

 

машваратӣ бо мақсади рушди бахши хусусӣ дар кишвар соли гузашта таъсис дода шуд. Ба ҳайати он намояндагони сохтори давлатии марбут ба танзими фаъолияти бахши хусусӣ ва президенти Тоҷикистон шомил мебошанд.

Душанбе. 31-уми июл. ОИ «Азия-Плюс» – Вазири молияи Ҷумҳурии Тоҷикистон Сафаралӣ Наҷмиддинов ба рӯзноманигоон изҳор дошт, ки дар солҳои 2008-2010 барои рушди соҳаи иҷтимоии Вилояти Мухтори Кӯҳистони Бадахшон (ВМКБ)

 

34 миллион сомонӣ маблағи иловагӣ ҷудо мегардад.

Мавсуф гуфт, ки маблағҳои зикршуда бо супориши президенти Тоҷикистон, ки дар таърихи 18-20-уми июл аз вилоят боздид карда буд, ихтисос дода мешаванд.

Ба гуфтаи С.Наҷмиддинов, айни замон санадҳои ҷудо кардани маблағҳо омода мешаванд ва ояндаи наздик воситаҳои молиявӣ ба буҷаи ВМКБ ҷиҳати рушди соҳаи иҷтимоии вилоят равона хоҳанд гашт.

Душанбе. 31-уми июл. ОИ «Азия-Плюс»-«Паём» – Шаҳри Сарбанд аз ин ба баъд бо гази маҳаллӣ аз кони Қизилтумшуқ таъмин хоҳад шуд.

Ба иттилои Қутбуддин Хоҷаев, сардори Корхонаи фаръиву байниноҳиявии «Қӯрғонтеппагаз», сохтмони шоҳқубури газгузар ба дарозии


5 километр

бар асоси қарор ва маблағгузории КВД «Тоҷикгаз» анҷом меёбад.

Лозим ба тазаккур аст, ки то ба ҳол

 

аҳолии шаҳри Сарбанд аз гази Ӯзбекистон истифода мебурданд ва ҳамон ҳам танҳо ду соат дар як шабонарӯз. Қимати истифода аз газ барои сокинони Сарбанд 17 сомонӣ муқаррар шудааст, аммо бо мавриди истифода қарор гирифтани шоҳқубури нав, ба манозили сарбандиҳо шабонарӯз ва бо қимати нисбатан дастраси 4 сомонию 25 дирам гази маҳаллии кони Қизилтумшуқи ноҳияи Ҷалолиддини Румӣ интиқол хоҳад ёфт.

Қарор аст, то ҷашни истиқлол сохтмони шоҳқубур ба итмом расида, ба ҷуз ширкати «ТоҷикАзот» шаҳри Сарбанд низ бо гази маҳаллӣ таъмин хоҳад шуд.

 

Душанбе. 31-уми июл. ОИ «Азия-Плюс» – Аз Палатаи савдо ва саноати Тоҷикистон иттилоъ доданд, ки сардори Департаменти савдои хориҷӣ ва ҳамкории иқтисодии ноҳияи мухтори Синтзян-Уйғури Чин Хэ Имин зимни мулоқот бо раиси палата Шарифи Саид пешниҳод кардааст, ки дар ҳамоиши сарони кишварҳои Созмони ҳамкории Шанхай (СҲШ) масъалаи тавсеъаи роҳи мошингарди Қулма-Қарасу-Қирғизистонро ба миён гузоранд. Ш.Саид пешниҳодро дастгирӣ намуда, изҳор доштааст, ки масъалаи мазкур дар Шӯрои кории СҲШ, ки дар он ӯ Тоҷикистонро намояндагӣ мекунад, шояд мавриди муҳокима қарор гирад.

Дар мулоқот ҷонибҳо ҳамчунин масъалаи имконоти рушди ҳамкории иттилоотиву электрониро низ баррасӣ карда, чунин изҳори назар намуданд, ки он ба таҳкими робитаҳо миёни доираи соҳибкории кишварҳо мусоидат хоҳад кард. Зикр гардид, ки айни замон дар Тоҷикистон беш аз 50 лоиҳаи муштарак дар соҳаҳои гуногун амалӣ мешаванд ва то имрӯз зиёда аз 40 корхонаи муштараки Тоҷикистону Хитой таъсис дода шуданд.

Бо назардошти аҳамияти баргузории намоишгоҳҳо дар рушди ҳамкориҳо, Ш.Саид пешниҳод кард, ки намоишгоҳи навбатии Қошғар соли 2009 дар ноҳияи Данғара гузаронида шавад.

Дар анҷоми вохӯрӣ ба меҳмонон якчанд СД-диски «Раҳнамо барои тоҷирон», ки аз маълумоти зарурӣ перомуни соҳаҳои гуногуни ҳаёти иҷтимоӣ, иқтисодӣ ва шарҳи 176 лоиҳаҳои сармоягузорӣ дар Тоҷикистон, 525 корхонаву муассисоти кишвар ва қонунгузории амалкунандаи Тоҷикистон иборат аст, тақдим гардид.

 


 


 

Хуҷанд. 31-уми июл. ОИ «Азия-Плюс» – Аз соли нави хониш донишҷӯёни Донишгоҳи давлатии ҳуқуқ, тиҷорат ва сиёсати Хуҷанд бо хобгоҳи нав таъмин карда мешаванд.

Аз донишгоҳи мазкур хабар доданд, ки хобгоҳ ба муносибати таҷлили ҷашни 15-умин солгарди донишгоҳ бунёд ёфта, чун тӯҳфа ба донишҷӯён пешкаш мегардад. Хобгоҳи нав барои иқомати 300 нафар пешбинӣ шудааст.

Ба иттилои манбаъ, соли гузашта донишгоҳро 581 нафар хатм карданд, ки 76 нафари онҳо ба дипломи сурх сазовор дониста шуданд.

Мавсуф ҳамчунин зикр кард, ки соли равон дар донишгоҳ факултаи нави навоварӣ ва технологияи тиҷорат ифтитоҳ гашт, ки дар он муҳандисони барномасоз, иқтисодчӣ ва риёзидонон тайёр карда мешаванд.

 




Душанбе. 31-уми июл. ОИ «Азия-Плюс» – Дирӯз миёни Созмони амният ва ҳамкории Аврупо (САҲА) ва Вазорати корҳои дохилии Тоҷикистон созишномаи татбиқи лоиҳа оид ба таъмиру таҷдиди утоқҳои нигаҳдории аслиҳаи шӯъбаҳои корҳои дохилии вазорат ба имзо расид.

САҲА барои таъмиру таҷдиди утоқҳои нигаҳдории аслиҳаи 51 шӯъбаи корҳои дохилии ҷумҳурӣ ва бозсозии низоми огоҳкунӣ ва муҳофизати онҳо 136 ҳазор евро маблағ ихтисос медиҳад.

Қобили зикр аст, ки аз соли 2005 САҲА ва Тоҷикистон дар масъалаи нест кардани аслиҳаи сабуки оташфишон ва муҳимоти оддӣ, беҳсозии шароити нигаҳдории он, ки ба коҳиши хавфи истифодаи ғайриқонунии он равона гардидааст, ҳамкорӣ мекунанд.