Мақомот аз ду ҳолати “дуздӣ”-и барқ бо роҳи пинҳонӣ кашидани хатти барқ аз зеристгоҳ то хонаи истиқоматӣ аз сӯи ду корманди шабакаҳои тақсимоти барқ дар ноҳияи Мир Саид Алии Ҳамадонӣ ва шаҳри Ваҳдат хабар доданд.
Оҷонсии назорат дар соҳаи энергетика гуфт, барои ин кирдор, корманди “Шабакаҳои тақсимоти барқ”- и ноҳияи Ҳамадонӣ 2 ҳазору 250 сомонӣ ҷарима шуда, алайҳи устои зеристгоҳи “Явроз” –и шаҳри Ваҳдат парвандаи маъмурӣ боз шудааст. Тибқи ин банди қонунгузорӣ, ӯро то 2 ҳазору 340 сомонӣ ҷарима таҳдид мекунад.
Манбаъ аз корманди шабакаҳои тақсимоти барқи Ҳамадонӣ, Зайниддин Садриддинов ном бурда, гуфтааст, ки ӯ аз зеристгоҳи барқии 35/10 кВ-и “Ҳамадонӣ” то хонаи зисташ “хатти барқро пинҳонӣ тавассути зери замин кашида, бидуни пайвастшавӣ ба ҳисобкунаки барқӣ аз нерӯи барқ ба таври ғайриқонунӣ истифода мекардааст”.
“…зимни муоина боз панҷ хатти дигари пинҳонӣ ошкор карда шуданд, ки дар ҳолати ғайрифаъол қарор дошта ба самтҳои гуногун кашида бурда шудаанд”,-гуфтааст Оҷонсӣ.
Аз Раёсати Оҷонсии назорат дар соҳаи энергетика дар минтақаи Кӯлоб ба “Азия-Плюс” гуфтанд, ки дар асоси моддаи 382 (риоя накардани қоидаҳои истифодаи қувваи барқ ва гармӣ)-и Кодекси ҳуқуқвайронкунии маъмурӣ Зайниддин Садриддинов 2 ҳазору 250 сомонӣ (ба андозаи 30 нишондиҳанда барои ҳисобҳо дар соли 2025) ҷарима шудааст.
Манбаъ гуфт, Садриддинов уҳдадор шудааст, ки маблағи барқи истифодашударо пардохт кунад. Вале аз ин ниҳод ҳаҷми барқи истифодашуда бидуни ҳисобкунакро нагуфтанд.
Назари худи Зайниддин Садриддинов дар робита ба гуфтаҳои мақомот маълум нест.
Ҳолати дигари “дуздӣ”-и барқ аз сӯйи Садриддин Назруллоев, устои зеристгоҳи барқии 35/10 кВ-и “Явроз”-и деҳоти Чӯянгарони шаҳри Ваҳдат ошкор шудааст.
Оҷонсӣ гуфтааст, ки ӯ “бо мақсади насупоридани маблағи истифодаи ҳаққи нерӯи барқ аз зеристгоҳ то хонаи истиқоматиаш хатти дуздии барқ кашидааст”.
Худи Садриддин Назруллоев дар гузориши мақомот гуфтааст, ки “зарари ошкоршударо ҷуброн менамоям”.
Мақомот гуфтаанд, ки нисбати ӯ бо иттиҳоми “риоя накардани қоидаҳои истифодаи қувваи барқ ва гармӣ” (моддаи 382)-и Кодекси ҳуқуқвайронкунии маъмурӣ парванда боз кардаанд.
Ин банди қонунгузорӣ барои шахсони воқеӣ аз 1 ҳазору 560 то 2 ҳазору 340 сомонӣ (аз 20 то 30 нишондиҳанда барои ҳисобҳо дар соли 2026) ҷарима пешбинӣ мекунад.
“Шикори барқдуздон” замоне оғоз шуд, ки соли гузашта ҷазо барои истифодаи ғайриқонунии нерӯи барқ ва саркашӣ аз пардохти пули он сангин шуд. Бар асоси Кодекси ҷиноятӣ касоне, ки қоидаҳои истифодаи нерӯи барқро вайрон ва аз пардохти пули он саркашӣ мекунанд, аз 27 ҳазор то 90 ҳазор сомонӣ ҷарима ва ё аз 3 то 10 сол зиндонӣ мешаванд. Ҷазои маъмурӣ ё ҷарима ҳам барои “дӯздӣ”-и барқ зиёд шуд.
Ин дар ҳолест, ки Эмомалӣ Раҳмон, раисҷумҳури кишвар чанде пеш дар паёми солонааш аз тарафи кормандони соҳа сӯисфтифода аз мансабро танқид кард.
Ӯ гуфта буд, ки “аз тарафи баъзе кормандони соҳа, пардохтҳо пурра ба ҳисоб гирифта намешуданд ва талафоти беасоси нерӯи барқ ба таври сунъӣ ба зимаи аҳолӣ ва дигар гурӯҳҳои истифодабарндагони нерӯи барқ гузаронида мешуд”.
