Вазорати маориф ва илми Тоҷикистон бори навбатӣ ба муассисаҳои таълимии ҷумҳурӣ дастур дод, ки дар ҷашни Соли нави милодӣ нишони асосии ин ид – арчаро дар муассисаҳо нагузоранд.
Дар супориши вазири маориф ва илми ҷумҳурӣ аз 21 декабр гуфта мешавад, гузоштани ҳама гуна навъи арчаи зиндаву сунъӣ манъ аст.
«Буридани арча ва гузоштани ягон намуди арча, истифодаи ҳама гуна маводи пиротехникӣ, зиёфатороиву туҳфаситонӣ, ҷамъоварии маблағ, сайру гашт ва дар тарабхонаҳо ташкил намудани чорабиниҳои солинавӣ дар муассисаҳои таълимӣ қатъиян манъ аст», – қайд мешавад дар супориш.
Ҳамчунин Вазорати маориф ва илм тавсия медиҳад, ки ҳангоми гузаронидани чорабинии солинавӣ таҳияи рӯзномаи деворӣ, баргузории маҳфилҳои адабӣ, фарҳангӣ ва бозиҳои варзишӣ ба роҳ монда шавад.
Ғайр аз ин, дар дастури вазири маориф ишора мешавад, ки дар муассисаҳои таълимии ҷумҳурӣ аз 25 то 31 декабр ва 1 январи соли 2016 аз ҷумлаи шахсони масъул бояд навбатдорӣ ташкил гардида, оид ба масъалаи амнияти шаҳрвандон, тартиботи ҷамъиятии зиддисӯхтор дар муассисаҳо чораҷӯӣ карда шавад.
