Дар қароргоҳи Созмони Милали Муттаҳид оид ба масъалаҳои маориф, илм ва фарҳанг (ЮНЕСКО) дар шаҳри Париж вохӯрии намояндаи доимии Тоҷикистон дар назди ЮНЕСКО, сафир Рустамҷон Солиев бо мудири кулли ЮНЕСКО Ирина Бокова баргузор гардид.
Бино ба маълумоти Вазорати корҳои хориҷии ҷумҳурӣ, зимни сӯҳбат ҷонибҳо доираи васеи масъалаҳои ҳолати кунунӣ ва дурнамои рушди ҳамкории Ҷумҳурии Тоҷикистонро бо ЮНЕСКО муҳокима намуданд.
Ирина Бокова тамоюли устувори робитаҳои зудинкишофёбандаи байни ЮНЕСКО ва Тоҷикистонро махсус қайд кард.
Ҳамсӯҳбатон мавзӯъҳои мубрами ҳамдастии Тоҷикистонро бо ЮНЕСКО, аз ҷумла масъалаи ворид намудани ёдгориҳои моддӣ ва ғайримоддии Тоҷикистон ба Рӯйхати мероси умумиҷаҳонии ЮНЕСКО, инчунин лоиҳаҳои ҳамкорӣ дар соҳаҳои илм ва фарҳангро матраҳ карданд.
Р. Солиев ва И. Бокова имконияти иштироки намояндагони Тоҷикистонро дар коромӯзиҳои кӯтоҳмуддат ва дарозмуддат дар ЮНЕСКО, аз ҷумла дар курсҳои омӯзишӣ бо мақсади омодасозии гузаронидани ҳаргуна конфронсҳо ва форумҳо дар ҳошияи Созмон баррасӣ намуданд.
