Дар минтақаи шимоли ҷумҳурӣ ба гумони даст доштан дар муомилоти ғайриқонунии маводи мухаддир шаҳрванди Қирғизистон боздошт шуд.
Тавре ба ОИ «Азия-Плюс» корманди маркази матбуоти ВКД ҶТ дар вилояти Суғд Акбар Шарифов хабар дод, рӯзи якшанбеи ҳафтаи сипаришуда зимни як амалиёт дар ҷамоати Овчӣ-Қалъачаи ноҳияи Бобоҷон Ғафуров сокини 38-солаи ноҳияи Лайлаки вилояти Ӯши кишвари ҳамсоя А.Ш. боздошт ва зимни кофтукови шахсии ӯ ба миқдори 1 кило маводи мухаддири афюн дарёфт ва мусодира карда шудааст.
Ба иттилои манбаъ, аз рӯи ин далел нисбат ба шаҳрвуанди боздоштшудаи Қирғизистон мутобиқи моддаи 200, қ. 3-и КҶ ҶТ (Муомилоти ғайриқонунии воситаҳои нашъадор, моддаҳои психотропӣ ё прекурсорҳо бо мақсади фурӯш) парвандаи ҷиноӣ боз шуда тафтишот идома дорад.
Зимнан зикр гардид, ки бино ба маълумоти Раёсати Агентии назорати маводи нашъаовари назди президенти ҶТ дар вилояти Суғд, соли гузашта кормандони мақомоти ҳифзи ҳуқуқи вилоят аз муомилоти ғайриқонунӣ 568 кило (соли 2011 – 563 кило) маводи мухаддирро мусодира намудаанд, ки зиёда аз 100 килояшро героин, беш аз 340 килояро ҳашиш ва зиёда аз 122 килояшро афюн ташкил медиҳад.
