Ахири ҳафтаи сипаришуда дар Душанбе аз таъсиси як ҳизби нави сиёсӣ бо номи «Тоҷикистони нав» иттилоъ дода шуда, дар ҷаласаи махсус Эъломия дар ин хусус қироат карда шуд.
Раиси Шӯрои ҳамоҳангсози Иттиҳоди анҷуманҳои тиҷоратии Тоҷикистон Зайд Саидов, муовини аввали раиси Шӯрои мазкур ва раиси Анҷумани миллии менеҷерони Тоҷикистон Шавкат Бозоров, раиси Анҷумани сиёсатшиносони Тоҷикистон Абдуғанӣ Мамадазимов ва як зумра роҳбарони дигар иттиҳодияҳои тиҷоратии шомил ба Шӯрои ҳамоҳангсоз аз ташаббускорони таъсис додани ҳизб мебошанд.
Ба гуфтаи онҳо, ҳадафи аслии таъсиси ҳизби нав даст ёфтан ба истиқлоли иқтисодии Тоҷикистон аст. «Зарурати таъсиси ҳизб дар он ифода меёбад, ки имрӯз ҷомеаи тоҷикро як нобоварӣ ба оянда фаро гирифта, аксари қувваи корӣ ва нерӯи ақлонӣ Тоҷикистонро тарк мекунанд. Дар ин шароит ҷомеа ба афкору паём ва ташаббусу амалҳои тоза ниёз дошта, ҳизби «Тоҷикистони нав» ифодакунандаи ин ормонҳост», – гуфта мешавад дар эъломия.
Ташаббускорони ҳизби нав изҳор намуданд, ки «Тоҷикистони нав» як платформа барои муттаҳидсозии андешаву ғоя, шахсиятҳо ва имконот баҳри созандагии миллӣ буда, ҳизбро воқеъгароён, навоварон, технократҳо ва ҳирфаиён намояндагӣ хоҳанд кард.
Қобили зикр аст, ки Шӯрои ҳамоҳангсози Иттиҳоди анҷуманҳои тиҷоратӣ ва иттиҳодияҳои ҷамъиятии Тоҷикистон соли 2007 таъсис ёфта, тобистони соли гузашта Зайд Саидов ба ҳайси раиси Шӯрои ҳамоҳангсоз интихоб шуд.
