Дар ҷараёни сафари президенти Тоҷикистон Эмомалӣ Раҳмон ба Давлати Кувайт миёни кишварҳо оид ба ҳамкорӣ дар бахши тандурустӣ Созишномаи байниҳукуматӣ ба имзо расид.
Зимни суҳбат бо хабарнигори ОИ «Азия-Плюс» сармутахассиси шуъбаи байнулмилалии Вазорати тандурустии ҷумҳурӣ Дилафрӯз Ғоибова дар ин робита гуфт, созишномаи мазкур аз 12 банд иборат буда, ҷараёни амалишавии он таҳти назорати комиссияи байниҳукуматӣ қарор хоҳад гирифт.
«Дар созишнома ҳамкориҳои дуҷониба дар беҳбуди расонидани кӯмаки аввалияи тиббӣ ва муоинаи тиббӣ, низоми воридоту содироти доруворӣ ва таҷҳизоти зарурии тиббӣ, табодули маълумот дар соҳаи тандурустӣ, таъмини дуҷонибаи назорати санитарӣ-эпидемиологӣ, дастгирӣ дар бахши такмили ихтисоси кормандони тиббӣ ва табодули таҷрибаву дониш миёни донишҷӯёну олимони кишварҳо таъкид шудааст», – гуфт Ғоибова.
Номбурда мутмаин аст, ки амалисозии созишнома ба низоми тандурустӣ дар Тоҷикистон таъсири мусбат мерасонад, зеро табодули таҷриба ва имкони дастрасии таҷҳизоти муосир барои муоина, ба таври қобили мулоҳиза ба сифати хизматгузориҳои тиббӣ дар Тоҷикистон беҳбуд хоҳад бахшид.
Ба гуфтаи коршинос, тӯли солҳои истиқлолият ҳукумати Тоҷикистон бо кишварҳои гуногун, аз қабили Украина, Белорус, Афғонистон, Эрон, Яман ва ғайра 50 созишномаҳои ба ин монанд ба имзо расонидааст.
«Ҳамчунин лоиҳаҳои чунин созишномаҳои байниҳукуматӣ ба Русия, Корея, Қазоқистон, Қирғизистон, Лаҳистон ва Қатар низ пешниҳод шудаанд», – иброз дошт Ғоибова.
