Нимаи дуюми рӯзи 26 июни соли равон президенти Ҷумҳурии Исломии Эрон доктор Маҳмуд Аҳмадинажод вазири корҳои хориҷии Тоҷикистон Ҳамрохон Зарифиро ба ҳузур пазируфт.
Бино ба иттилои Вазорати корҳои хориҷии ҷумҳурӣ, дар ҷараёни мулоқот раисҷумҳури Эрон муносибатҳои байни Эрону Тоҷикистонро ҳамчун “дӯстии истисноӣ” ном бурд. Ӯ қайд намуд, ки ба Тоҷикистон шаш маротиба сафар намуда буд ва ба мушоҳидаи ӯ чанд соли охир Тоҷикистони бародар хеле рушд кардааст. Президенти Эрон ҳамчунин хоҳиш намуд, ки орзуҳои неки ӯ ба президенти Тоҷикистон Эмомалӣ Раҳмон ва ҳалқи шарифи Тоҷикистон расонида шавад.
Дар навбати худ вазири корҳои хориҷии Тоҷикистон ба сарвари давлати Эрон паёми Президенти Тоҷикистон Эмомалӣ Раҳмонро расонид.
Ҳамчунин Ҳамрохон Зарифӣ ба президенти Эрон дар бораи рафти татбиқи лоиҳаҳои муштарак дар Тоҷикистон маълумоти мухтасар дод.
Рӯзи 27 июни соли 2013 вазири корҳои хориҷии Тоҷикистон Ҳамрохон Зарифӣ бо устондори Хуросон Разавии Ҷумҳурии Исломии Эрон Фурӯзонмеҳр мулоқот анҷом дод.
Дар рафти мулоқот ҷонибҳо рушди робитаҳои дуҷонибаро мусбӣ баҳогузорӣ намуда, зарурати фаъол кардани ҳамкориро дар соҳаҳои нақлиёт ва роҳ, кишоварҳӣ ва соҳибкорӣ қайд намуданд.
Вазири корҳои хориҷии Тоҷикистон диққати ҳамсуҳбати худро ба муҳимияти мубодилаи таҷриба миёни мутахассисони саноати бофандагии Тоҷикистону Эрон ва қолинбофӣ, ки Хуросонро машҳур кардаанд, ҷалб намуд.
Дар навбати худ Устондор Фурӯзонмеҳр оид ба дастовардҳои устони Хуросон Разавӣ дар заминаҳои гуногун, хусусан кишоварзӣ ва саноатӣ маълумот дод. Ӯ ҳамчунин қайд намуд, ки дар Машҳад солҳои охир бештар аз 5 намоишгоҳҳои саноатӣ бо иштироки намояндагони кишварҳои гуногун, аз ҷумла Тоҷикистон баргузор гаштааст.
