Аз ин ба баъд тоҷикистониён имкон пайдо карданд, ки аз дарсҳои видеойӣ дар шабакаи Интернет сабақ омӯзанд. Дар шабакаи ҷаҳонии Интернет торнамои нахустини видеодарсҳо – uroki.tj мавриди истифода қарор гирифт.
Чӣ тавре ки ба ОИ «Азия-Плюс» ташаббускори таъсиси сомона Озод Сиддиқов хабар дод, минбаъд ба таври мукааммал мавриди баҳрабардорӣ қарор додани торнамо дар назар аст.
«Ҳадафи мо ба таҳсилу омӯзиш фаро гирифтани мардуми Тоҷикистон аст. Вақте мустақилона ба торнамо ворид шудану таҳсил намудан имконпазир аст, онҳоро зарур нест, ки ҳатман дар курсҳои гаронқимат омӯзиш бигиранд», – зикр кард Сиддиқов.
Ба қавли ӯ, айни замон дар торнамо машғулияту дарсҳо оид ба варзиш, рақсу мусиқӣ, забонҳои хориҷӣ, омӯзиши компютер, акс ва наворбардории видеоӣ гузошта шудаанд.
«Айни замон наворҳои видеоиро мо аз Youtube гузоштем, вале дар фурсатҳои наздиктарин наворҳои видеоии муаллифони худро мегузорем. Омӯзгорон, коршиносон ва мутахассисони бахшҳои гуногун бо мо табодули таҷриба хоҳанд кард. Агар моро Вазорати маориф дастгирӣ мекард, хеле хушнуду қаноатманд мешудем», – афзуд Сиддиқов.
