Ахири ҳафтаи гузашта як ҳайати Вазорати корҳои дохилии Қирғизистон таҳти сарварии муовини аввали вазири корҳои дохилии ин кишвар Курсан Асанов ба Тоҷикистон ташриф оварда, бо ҳайати ВКД ҶТ таҳти роҳбарии муовини аввали вазири корҳои дохилии ҷумҳурӣ Нурилло Орипов мулоқот орост.
Бино ба иттилои сомонаи расмии ВКД ҶТ, дар мулоқот масоили ҳамкории мутақобилаи вазоратҳо дар кори мубориза бо экстремизм, терроризм, муомилоти ғайриқонунии маводи мухаддир, ҷинояткории муташаккилона ва ғайра баррасӣ шуданд.
Ба иттилои манбаъ, бо дарназардошти он, ки айни замон, ҳам дар Вазорати корҳои дохилии Ҷумҳурии Тоҷикистон ва ҳам дар Вазорати корҳои дохилии Ҷумҳурии Қиғизистон ислоҳоти милитсия ҷараён дорад, яке аз масъалаҳои асосии мулоқот ин баррасии рафти ислоҳоти милитсия дар ВКД Ҷумҳурии Тоҷикистон буд.
