Рӯзҳои 6-7-уми августи соли равон дар минтақаи «Олимтой»-и ноҳияи Восеъ аз тарафи кормандони милитсия бемувофиқа бо роҳбарияти Вазорати корҳои дохилӣ дидбонгоҳ ташкил гардида, ҳангоми гузаштан аз ин мавзеъ ронандагону мусофирон беасос манъ ва мавриди санҷиш қарор гирифтаанд, ки ин амали онҳо ба норозигии ронандагон ва шаҳрвандон дар арафаи Иди саиди Фитр боис гардидааст.
Бино ба иттилои сомонаи расмии ВКД ҶТ, ҳолати мазкур роҳбарияти Вазорати корҳои дохилиро ба ташвиш оварда, барои муайян намудани кормандони милитсия, ки ба ин амали номатлуб даст задаанд ва ба ҷавобгарии интизомӣ кашидани онҳо санҷиши хизматӣ таъин карда шудааст.
Рафти санҷиши хизматӣ зери назорати Вазири корҳои дохилии Ҷумҳурии Тоҷикистон қарор дорад.
Гуфта мешавад, шахсоне, ки вобаста ба дидбонгоҳи мазкур ягон арзу шикоят дошта бошанд, метавонанд тариқи телефони боварии Вазири корҳои дохилӣ (221-21-21) муроҷиат намоянд.
