Комиссияи марказии интихобот ва раъйпурсӣ (КМИР)-и Тоҷикистон бо камоли масъулият изҳор мекунад, ки дар ҷараёни ҷамъоварии имзоҳо ба ҷонибдории ин ё он номзад ба мансаби президенти кишвар ҳеҷ мушкилие ҷой надорад. Дар ин бора ба ОИ «Азия-Плюс» роҳбари маъмурияти КМИР ҶТ Абдуманнон Додоев хабар дод.
«Моро мавқеи чанде аз намояндагони Ҳизби наҳзати исломии Тоҷикистон дар робита ба ин масъала дар ҳайрат мегузорад. Оид ба ҳама гуна масоиле, ки дар ҷараёни ҷамъоварии имзоҳо ба ҷонибдории номзади онҳо Ойниҳол Бобоназарова пайдо мешавад, онҳо дарҳол барои матбуот дар бораи гӯё аз ҷониби ҳукумати маҳаллӣ монеъа эҷод кардан изҳорот медиҳанд, вале моҳиятан ин масъаларо дар ҳамон ҷо бо саривақт муроҷиат кардан ба КМИР метавон ҳал намуд», – зикр кард Додоев.
Ба гуфтаи ӯ, лаҳзаҳои корие, ки намояндагони ҲНИТ бо он дар шаҳри Турсунзодаву ноҳияҳои Мӯъминобод ва Рашт дучор шудаанд, фавран тавассути телефон аз ҷониби КМИР ҳаллу фасл гардидаанд.
«Намояндагони дигар аҳзоби сиёсӣ, ки номзадҳои худро ба мансаби президентӣ пешбарӣ намуданд, то ҳол дар ҷараёни ҷамъоварии имзоҳо ба мушкилие мувоҷеҳ нагардидаанд», – афзуд номбурда.
