Дар Агентии назорати маводи нашъаовари назди президенти Тоҷикистон ҷаласаи коршиносони мақомоти зиддимухаддиротии Афғонистон, Қирғизистон ва Тоҷикистон – ташаббуси АҚТ ҷараён дорад, ки дар он намояндагони РСММ оид ба ҷинояткорӣ ва мухаддирот низ ҳузузр доранд.
Бино ба маълумоти шуъбаи робита бо ҷомеаи АНМН, 27 сентябр дар сухани ифтитоҳӣ муовини Директори Агентӣ Бунафша Одинаева қайд намуд: « Бо мақсади ба ҳам овардани кӯшишҳо дар мубориза бо муомилоти ғайриқонунии маводи мухаддир ва баланд бардоштани самаранокии он Ҷумҳурии Тоҷикистон ба таври ҳамешагӣ ҳамкориҳоро бо давлатҳо ва созмонҳои дахлдор ҳамаҷониба рушд ва таҳким мебахшад».
Ба иттилои манбаъ, мақсади асосии ҷаласа ин омода намудани ҳуҷҷатҳо доир ба баланд бардоштани самаранокии ҳамкорӣ дар самти мубориза бо муомилоти ғайриқонунии маводи нашъаовар ва идора байни сарҳадоти ҶИА, Қирғизистон ва Тоҷикистон мебошад.
Гуфта мешавад, ҳуҷҷатҳои мазкур барои баррасӣ дар вохӯрии навбатии вазирон/роҳбарони мақомотҳои зиддимухаддиротии Афғонистон, Қирғизистон ва Тоҷикистон, ки дар шаҳри Бишкек баргузор мегардад, пешниҳод карда мешавад.
Зимнан зикр мегардад, ки дар ҷамъбасти ҷаласа Протоколи муштарак ба имзо мерасад. Вохӯрии сеҷониба дар доираи амалисозии «Барномаи минтақавии Раёсати СММ оид ба маводи мухаддир ва ҷинояткорӣ барои Афғонистон ва кишварҳои ҳамсояи он дар солҳои 2011-2014” баргузор мегардад.
