Хазинаи кӯдакони СММ (ЮНИСЕФ) аз намояндагони васоити ахбори умуми машғул ба масоили оилаву кӯдакон қотеъона даъват кард, ки зимни инъикоси масоили марбут ба кӯдакон ба интихоби меъёр ва худтанзимкунии масъулият нисбат ба барномарезӣ, интишор ё намоиши ҳама гуна маълумоти муассир ба вазъи рушди равониву иҷтимоӣ, эҳсос ва маънавиёти кӯдакон таваҷҷуҳи ҷиддӣ зоҳир намоянд.
Дар изҳороти рӯзи 28-уми сентябри ЮНЕСКО вобаста ба пахши барномаи «Пойбанди нафрат» дар шабакаҳои телевизионӣ зикр мегардад, ки намоиши наворҳои кӯдаки ҳалокшуда ва ҷисми афгори ӯ бо шарҳи дақиқи амали содиршуда аз ҷониби қотил дар шабакаҳои телевизионӣ, бахусус шабакаи кӯдаконаи «Баҳористон», миёни аҳли ҷомеа баҳсҳои пурҷӯшу хурӯшеро рӯйи кор овард.
«Гузашта аз ин, пахши чунин наворҳо дар шабакаи телевизионие, ки ба таҳияи барномаҳои некхоҳона барои тамошобинони синнусоли аз 3 то 16-сола масъул аст, мухолифи Принсипҳои ахлоқи инъикоси барномаҳои марбут ба кӯдакон аст», – баён мегардад дар изҳорот.
Ҳамчунин дар изҳорот таъкид мегардад, ки дастур оид ба ахлоқи инъикоси масоили марбут ба кӯдакон ва нварасони синнусоли то 18-сола бар асоси Конвенсияи ҳуқуқи кӯдакон таҳия ва ба сифати дастур пешниҳод шудаанд, ки ба ВАО дар инъикоси ин масоил ба тарзи қобили қабул барои кӯдакон кӯмак мекунад.
«Ҳуқуқи одамон нисбат ба маълумот оид ба масъалаҳои мушкилоти ҷомеа бояд эътироф ва ба ихтиёри шаҳрвандон вогузор гардад. Дар ҳамин ҳол, эътирофи ҳуқуқи дастрасӣ ба маълумот низ бояд маҳдудиятҳои ахлоқӣ зимни инъикоси онҳоро ба инобат гирад ва яке аз ин маҳдудиятҳо дастрасӣ ба маълумоти марбут ба кӯдакон аст, зеро инъикоси масоили вобаста ба кӯдакон ва наврасон нозукиҳои хоси худро дорад. Таҳияи мавод барои кӯдакон ё дар бораи онҳо бо шумули барномаҳои телевизионӣ аз журналистон муносибати саҳеҳкорона, амал кардан танҳо ба хотири манфиати кӯдакон ва ҳимояи онҳо аз осеби равонӣ ва эҳтиром гузоштан ба оилаҳои ҷабрдидагонро тақозо мекунад. Пахши тасвирҳо ё намоиши барномаҳои дорои маълумоти зараровар ба рушди кӯдакон набояд дар шабакаҳои телевизионии кӯдакон пахш карда шаванд», – зикр мегардад дар изҳорот.
Дар ҳамин ҳол, Саидалӣ Сиидиқов, муовини аввали раиси Кумитаи телевиизону радиои Тоҷикистон ба ОИ «Азия-Плюс» дар ин робита
изҳор намуда буд
, ки «баъзан метавон чунин барномаҳоро дар шабакаҳои телевизионии кӯдакон пахш намуд, то ки кӯдакони мо шахсони хубу накӯкор ба воя расанд».
Ҳамчунин қаблан созмонҳои журналистии кишвар
бо пахши як изҳорот
аз роҳбарияти давлат ва ҳукумати Тоҷикистон тақозо карданд, ки ба пахши барномаи телевизионии нафратангез баҳои сазовори ҳуқуқиву сиёсӣ дода шавад.
