Нимаи дуюми рӯзи 7-уми октябр Президенти кишвар Эмомалӣ Раҳмон Дабири кулли Созмони Аҳдномаи амнияти дастаҷамъӣ (СААД) Николай Бордюжаро ба ҳузур пазируфт.
Бино ба иттилои хадамоти матбуоти сарвари давлат, дар мулоқот масоили ҳамкорӣ дар доираи ин созмон баррасӣ шуд.
Таваҷҷуҳи асосӣ ба татбиқи босамари санадҳои дар ҳамоиши охири сарони давлатҳои СААД, 23 сентябри соли 2013 баимзорасида доир ба кумаки фаврии техникӣ ба нерӯҳои марзӣ ва дигар сохторҳои дахлдори Тоҷикистон барои пурзӯр намудани ҳифзи марзи давлатӣ бо Афғонистон зоҳир карда шуд.
Таъкид гардид, ки иҷрои пурра ва саривақтии ин санадҳо ба нафъи таҳкими амнияту субот дар кулли минтақа хоҳад буд. Тавре иттилоъ дода шуд, кумаки мазкур бояд дар муддати 3 моҳ расонда шавад.
Гуфта мешавад, дар мулоқот, ҳамчунин доир ба дигар масоили ҳамкорӣ гуфтугӯи судманд сурат гирифт.
Қобили зикр аст, ки аз рӯи натиҷаҳои нишасти навбатии сарони кишварҳои узви СААД рӯзи 23-юми сентябр дар Сочи қарор шуд, ки ба нерӯҳои марзбонии Тоҷикистон кӯмак расонида шавад.
