Раиси ҲНИТ, вакили палатаи поёнии парлумон Муҳиддин Кабирӣ субҳи рӯзи 8-уми октябр шахсан ба ҷамъоварии имзоҳо ба ҷонибдории номазади пешбаришуда аз ҲНИТ Ойниҳол Бобоназарова оғоз намуда, то нимаи рӯз 10 имзо ҷамъ овард.
Бино ба иттилои сомонаи расмии ҲНИТ, ӯ худаш ба дари ҳар хона рафта, занг зада бо соҳибони хона суҳбати рӯбарӯ карда, аз онҳое, ки розӣ шуданд имзо бидиҳанд, имзо ҷамъоварӣ намуд.
Таҷрибаи худро ӯ чунин шарҳ додааст: “Имзоҷамъоварӣ вақти зиёде талаб мекунад, вале ба ҳар сурат мешавад измо ҷамъоварӣ намуд. Алъон, он чизе ки мушоҳида кардам, ин аст ки имзоҷамъоварӣ кори хело мушкил будаааст. Вақте тавонистем дар як соат ва аз ду кучае, ки гаштем, 10 имзо ҷамъо оварем, мо бояд ба он ҷавонон ва духтарон ва ҳамаи онҳое, ки шабу рӯз кор карда, имзо ҷамъ карда истодаанд ва то имрӯз беш аз 170 ҳазор имзо карданд, таҳсин бигӯем.”
Бо натиҷагирӣ Муҳиддин Кабирӣ афзудааст: “Ман ба он ҳизбҳое, ки аллакай эълон карданд, ки онҳо дар давоми ду се рӯз қариб 200 ҳазор имзо ҷамъ карданд, мегӯям: камтар бо эҳтиёт суҳбат кунед, аввал биоед бо мардум имзоҳоро худатон ҷамъ кунед ва баъд ин рақамҳоро эълон кунед. Суол ин аст, ки оё мешавад дар давоми ду се рӯз 150 ё 200 ҳазор имзоро ҷамъ кард? Ман аз таҷрибаи яксоатаи худам дидам, ки ин рақамҳо имкон надорад.”
Қаблан Маҳмадалии Ҳайит, роҳбари ситоди пешазинтихоботии Бобоназарова ба ОИ «Азия-Плюс» дар мавриди ин масъала хабар дода буд, ки дар баъзе маҳаллаҳои пойтахт, ки дар он ҷо фаъолони ҲНИТ ба ҷамоварии имзоҳо машғуланд, тамоили шиноснома бо худ надоштани шаҳрвандон ба назар мерасад, ки ба таври имконпазир метавонистанд аз номзади ҲНИТ дастгирӣ намоянд.
«Масалан, дар микрорайони 46-ум ва Гулбутта раисони кумитаи маҳаллаҳо шиносномаҳои шаҳрвандонро барои дастгирии дастаҷамъонаи кадом як номзаде ҷамъоварӣ кардаанд ва алҳол онҳоро ба сокинони маҳаллаҳо барнагардонидаанд», – зикр кард М.Ҳайит.
Сарфи назар аз ҳамаи ин ҳолатҳо, роҳбари ситоди пешазинтихоботии номзади ҲНИТ изҳори итминон кард, ки то субҳи рӯзи 10-уми октябр ба КМИР миқдори зарурии имзоҳо (210 ҳазор)-ро пешниҳод хоҳанд кард.
