Чанде қабл бо роҳбарии вазири рушди иқтисод ва савдои ҷумҳурӣ Шариф Раҳимзода ҷаласаи нахустини ҳайати ҳакамони озмуни ҷумҳуриявии «Қуллаи шараф» вобаста ба муайян намудани бренди сол дар Тоҷикистон бо мақсади баррасии фаъолияти минбаъдаи ҳакамон баргузор гардид.
Тавре аз МД «Маркази миллии патенту иттилоот» хабар доданд, бо пешниҳоди кумитаи тадорукоти озмуни мазкур ҳайати ҳакамон аз ҳисоби намояндагони вазорату идораҳо, бахши хусусӣ ва ташкилотҳои байналмилалӣ таъсис дода шуд, ки раисии онро вазир Ш.Раҳимзода ба ӯҳда гирифт.
Ба иттилои манбаъ, дар ҷаласаи мазкур тибқи маълумоти директори МД «Маркази миллии патенту иттилоот» Ҷамшед Қурбонов, дар рафти қабули ҳуҷҷатҳо ҷиҳати иштирок дар озмуни мазкур 53 ариза аз ширкатҳои дохиливу хориҷӣ ворид гардидааст.
Дар рафти ҷаласа аъзоёни тозаинтихоби ҳайати ҳакамон масъалаҳои баҳсталабро вобаста ба баҳодиҳӣ ва муайянсозии ғолиб мавриди баррасӣ қарор доданд, ки аз ҷониби намояндагони муассиса посухҳои зарурӣ дода шуд.
Зимнан зикр гардид, ки натиҷаи озмуни мазкур дар аввали моҳи декабри соли 2013 ҷамъбаст карда мешавад.
