Муовини якуми раиси ҲХДТ, сардори ситоди марказии номзад ба мансаби президенти Тоҷикистон аз ҲХДТ Сафар Сафаров сардори намояндагии нозирони интихоботи президенти Тоҷикистон аз САҲА ва намояндагони гурӯҳи нозирони Дафтари институтҳои демократӣ ва ҳуқуқи башари САҲА (ДИДХБ) таҳти сарварии сафир Параскива Бадеску ва таҳлилгари масоили сиёсии созмонҳои номбурда Павел Гантарро бо хоҳиши онҳо ба ҳузур пазируфт.
Бино ба иттилои сомонаи расмии ҲХДТ, дар оғози суҳбат С. Сафаров меҳмононро бо фаъолияти вусъатбори ҲхДТ, нуфузи афзояндаи он дар ҷомеа, дастовардҳои Тоҷикистон дар солҳои истиқлолият, равобити ҷумҳурӣ бо созмонҳои байналмилалӣ, маъракаи дарпешистодаи интихоботи президенти мамлакат, чорабиниҳои ҳизбӣ ба шумули Анҷумани Х1-и ҲХДТ, пешниҳод шудани номзади ягона ба мансаби президенти кишвар Эмомалӣ Раҳмон ва якдилона дастгирӣ ёфтани ӯ, ҳамчунин ҳамкориҳои ҳизб бо ҷомеаи шаҳрвандӣ ва аҳзоби дигари сиёсӣ маълумот дод
«Сафаров таъкид намуд, ки баргузории интихоботи демократӣ ва шаффофу озодро арвари давлат Эмомалӣ Раҳмон ҳанўз зимни сафараш ба Аврупо кафолат дода буд. Мо мутмаин ҳастем, ки интихоботи мо ба таври демократӣ ва бидуни нақзи муқаррароти қонун мегузарад», – гуфт ӯ.
Ба иттилои манбаъ, хонум Параскива Бадеску дар бораи миссияи кўтоҳмудату дарозмуҳлати нозирони САҲА ва ДИДХБ, ки аввалиҳо вориди Тоҷикистон шудаанд, маълумоти мухтасар дода, ба масъалаи ба таври алтернативӣ гузаштани интихобот, рафти омодагии аҳзоби сиёсӣ, имкониятҳои молиявии аҳзоб ва хазинаи таблиғотии онҳо, вазъи сиёсию иҷтимоии ҷумҳурӣ ва минтақа мароқ зоҳир намуд.
Ҳизби халқии демократии Тоҷикистон соли 1994 таъсис ёфта, айни замон шумори аъзои он беш аз 230 ҳазор нафарро ташкил медиҳад. Ҳудуди 40 дарсади аъзои ҳизб ҷавонон мебошанд. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.
