Бар асари як садамаи нақлиёти фоҷеабор дар километри 17-уми роҳи мошингарди Ваҳдат-Рашт-Ҷиргатол 7 нафар ба ҳалокат расиданд.
Бино ба иттилои ВКД ҶТ, ронандаи автомашинаи тамғаи «Опел-Астра», сокини ноҳияи Файзобод Фирдавс Юсуфови 34-сола ба самти муқобили ҳаракати роҳ баромада, ба автомашинаи тамғаи «Опел-Астра» таҳти идораи сокини 38-солаи ноҳияи Файзобод Сабзалӣ Олимов бармехӯрад.
«Дар натиҷа ронандагони ҳарду автомашина, мусофирон Робия Қаландароваи 50-сола ва як марди шахсияташ номаълум аз ҷароҳатҳои бардошта дар ҷойи ҳодиса ба ҳалокат расидаанд», – гуфта мешавад дар иттилои ВКД.
Зимнан зикр мегардад, ки дигар мусофирони автомашинаҳо Шоира Турсуноваи 35-сола, Омина Юсуфоваи 1-сола ва Фариза Қодироваи 49-сола дар роҳ ба бемористон фавтида, боз се нафар мусофирон бо ҷароҳатҳои вазнин ба бемористон мунтақил шудаанд.
