Дар майдончаи сохтмонии «Маркази барқу гармидиҳӣ-2» дар шаҳри Душанбе корҳои сохтмон бомаром идома доранд.
Бино ба иттилои шуъбаи котиботи Вазорати энергетика ва саноати ҶТ, то имрӯз дар сохтмони «Маркази барқу гармидиҳӣ-2» 45 ҳазор метри мукааб бетон истифода шуда, айни замон сохтмони дегхонаи №1 ва лӯлаи дудбарор бо баландии 120 метр ва иншооти обсардкунӣ (градирня) бо баландии 90 метр пурра ба итмом расидааст.
«Бо дархости Вазорат аз тарафи мутахассисони ширкати “ТВЕА” корҳои сохтмони нуқтаи гармитақсимкунӣ ва хати интиқоли барқи баландшиддати 220 кВ аз «Маркази барқу гармидиҳӣ-2» то зеристгоҳи “Душанбе-500 кВ” босуръат идома дорад», – омадааст дар иттилои шуъбаи котиботи Вазорат.
Зимнан зикр мегардад, ки айни замон шумори коргарони иншоот беш аз 1,5 ҳазор нафар ва теъдоди техникаҳои дар корҳои сохтмонӣ истифодашаванда зиёда аз 150 ададро ташкил медиҳад.
Ёдрас мекунем, ки Маркази барқу гармидиҳии «Душанбе»-2» дар доираи созишномаи сеҷониба миёни Вазорати энергетика ва саноати ҶТ, ҶСК «ТВЕА» (Чин) ва ҶДММ «ТВЕА Душанбе саноати кӯҳкорӣ» бунёд мегардад.
Бояд зикр кард, ки “Маркази барқу гармидиҳӣ-2” 100 МВт иқтидор дошта, мавриди истифода қарор гирифтани блоки аввали марказ то оғози зимистони имсола дар назар аст. Марказ аз ду навбат 50 МВт иборат аст. Барои кори 1 дег дар 1 соат 31 тонна, дар як шабонарӯз 744 тонна ва дар як моҳ 22 ҳазору 320 тонна ангишт лозим аст.
