Тамоми мансабдорони наве, ки бо фармони президент ба ҳайати нави ҳукумат таъин шуданд, аъзои Ҳизби халқии демократии Тоҷикистон мебошанд.
Ба гуфтаи, Усмон Солеҳ, мудири шӯъбаи таблиғот, иттилоот ва матбуоти ҲХДТ, вазирони тозатаъини саноат ва технологияи нав Шавкат Бобоев, энергетика ва захираҳои об Усмоналӣ Усмонов, фарҳанг Шамсиддин Орумбеков, меҳнат, муҳоҷират ва шуғли аҳолӣ Сумангул Тағоева аъзои ҳамин ҳизбанд.
Дар ҳамин ҳол, ӯ таъкид дошт, ки вазирони аз ин мансабҳо сабукшуда – Гул Шералӣ, Мирзошоҳрух Асрорӣ ва Маҳмадамин Махмадаминов низ дар сафи аъзогии ҲХДТ қарор доштанд.
Танҳо вазири нави мудофиаи Тоҷикистон Шералӣ Мирзо, роҳбарони аз нав таъиншудаи ВКД Рамазон Раҳимов ва КДАМ Саймӯмин Ятимов ғайриҳизбӣ мебошанд, зеро қонунгузории кишвар узвияти кормандони мақомоти қудратӣ ва ҳифзи ҳуқуқ ба аҳзоби сиёсиро манъ мекунад.
Ҳизби халқии демократии Тоҷикистон соли 1994 таъсис ёфта, айни замон шумори аъзои он беш аз 230 ҳазор нафарро ташкил медиҳад. Ҳудуди 40 дарсади аъзои ҳизб ҷавонон мебошанд. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҳамин ҳизбанд.
