Дар Фурудгоҳи байнулмилалии Душанбе (ФБД) оид ба дараҷаи омодагии фурудгоҳ машқҳои навбатии омӯзишӣ доир гардиданд.
Тавре котиби матбуотии ФБД Муҳаммадюсуф Шодиев хабар дод, бо садо додани бонги хатар бахшҳои махсус, аз ҷумла гурӯҳи наҷотдиҳии садамавӣ, сухторнишонӣ, қисми санитарӣ-авиатсионӣ ва масъулини хадамот дар ҷойи эълоншудаи хатар, дар мӯҳлатҳои таъиншуда ҳозир шуданд. Аз ҷониби роҳбари машқи санҷишӣ ба масъулини хадамот ва бахшҳо дастури алоҳида дода мешуд. Ҳамагон пас аз расидан дар ҷойи таъин дарак меёфтанд, ки бонги хатар машқи навбатии омӯзишӣ буда, аз ҷониби Хадамоти таъминоти ҷустуҷӯӣ ва садамавӣ-наҷотдиҳии парвозҳо барои муайян намудани дараҷаи омодагии фурудгоҳ ба ҳолатҳои фавқулода эълон шудааст.
Сардори Хадамоти таъминоти ҷустуҷӯӣ ва садамавӣ-наҷотдиҳии парвозҳо Қудратулло Одинаев иброз дошт, ки машқи имрӯза дар пайи садамаи дар фурудгоҳи Қазон рухдодаи ҳавопаймои мусофиркаш гузаронида мешавад. «Мо бояд омодагии ҳамешагӣ дошта бошем, то дар мавридҳои рух додани садама саривақт ва дуруст амал карда тавонем», – гуфт ӯ.
Дар фурудгоҳи Душанбе бобати омодагии ҳамешагӣ ба ҳолатҳои фақулодда пайваста дарсҳои назариявӣ гузашта бо салоҳдиди вазъ машқҳои амалӣ низ гузаронида мешаванд.
Бонги хатари имрӯза бори дигар нишон дод, ки бахшҳои махсуси хадамоти таъминоти ҷустуҷӯӣ ва садамавӣ-наҷотдиҳии парвозҳо, қисми тиббӣ, бахши сухторнишонӣ, хадамоти муҳандисӣ-авиатсионӣ, хадамоти истеҳсолӣ-тиҷоратӣ ва хадамоти амнияти авиатсионии фурудгоҳи Душанбе дар ҳолати хуби омодагӣ қарор доранд.
Машқи имрӯзаро нозирони амнияти парвозҳои фурудгоҳи Душанбе назора намуда, ба амалҳои иҷрошуда баҳои қаноъатбахш доданд.
