Бо супориши Хадамоти зиддиинҳисории назди ҳукумати ҶТ, аз 1-уми январи соли оянда тарофаҳои оби нӯшокӣ дар пойтахт боло мераванд.
Котиби матбуотии раиси шахри Душанбе Шавкат Саидов ба ОИ «Азия-Плюс» дар ин робита иттилоъ дод, ки аз соли оянда ташкилотҳои буҷетии пойтахт барои як метри мукааб оби нӯшокӣ ва обу корез (бо назардошти ААИ) ба ҷойи 1 сомониву 004 дирами ҳозира 1 сомониву 36,88 дирам ва ташкилотҳои ғайрибуҷетӣ ба ҷойи 2 сомониву 71 дирами ҳозира 3 сомониву 3,99 дирам маблағ пардохт мекунанд.
«Сокинони пойтахт, ки дар хонаҳояшон ҳисобкунаки об насб шудааст, барои 1 метри мукааб об ба ивази 32 дирами пешина бо назардошти ААИ 41,61 дирам маблағ месупоранд», – иброз дошт Саидов.
Ба гуфтаи ӯ, сокинони хонаҳои то ошёнаи 12-ум, ки ҳисобкунаки об надоранд, ба ҷойи 3 сомониву 50 дирами ҳозира дар як моҳ 4 сомониву 54,654 дирам, сокинони аз ошёнаи 12-ум баландтар ба ивази 4 сомониву 38 дирами имрӯза 5 сомониву 69,586 дирам ва сокинони хобгоҳҳо ба ҷойи 2 сомониву 90 дирами ҳозира 3 сомониву 77 дирам маблағ пардохт хоҳанд кард.
«Тарофаҳои амалкунанда то 1-уми январи соли 2014 барои оби нӯшокӣ аввали соли 2011 тасдиқ шуда буданд», – афзуд котиби матбуотии раиси пойтахт.
