Чанде қабл дар шаҳри Исфара вохӯрии ҳайатҳои Тоҷикистону Қирғизистон доир гардид, ки дар он масоили ҳамкории мутақобилаи мақомоти қудратии кишварҳо дар таъмини тартибот дар қаламравҳои наздимарзии давлатҳо баррасӣ шуданд.
Котиби матбуотии раиси шаҳри Исфара Иқбол Тешаев дар суҳбати телефонӣ ба ОИ «Азия-Плюс» дар ин робита иттилоъ дод, ки дар ин вохӯрӣ ҳайати Тоҷикистонро муовини вазири корҳои дохилии ҶТ генерал-майори милиса Искандар Раҷабов ва ҳайати Қирғизистонро муовини вазири корҳои дохилии ин кишвар генерал-майори милиса Курсан Асанов роҳбарӣ доштанд.
Ба гуфтаи Тешаев, ба ҳайатҳо ҳамчунин фармондеҳони нерӯҳои марзбонии кишварҳо, муовинони раисони вилоятҳои Суғду Ботканд ва раисони навоҳии наздимарзӣ низ шомил буданд.
«Аз рӯи натиҷаҳои гуфтушунид протокол ба имзо расид, ки мутобиқи он, аз ҳисоби марзбонон ва кормандони милисаи ҳарду кишвар гурӯҳҳои посбонии муштарак таъсис дода шуда, ҷонибҳо ҷиҳати дар муддати як ҳафта мувофиқа кардани ҳайати гурӯҳҳои посбонии муштарак ва самтҳои ҳаракати онҳо тавофуқ ҳосил намуданд», – иброз дошт котиби матбуотии раиси шаҳри Исфара.
Ёдрас мекунем, ки дар
мулоқоти
ҳайатҳои роҳбарони комиссияҳои байниҳукуматии Тоҷикистону Қирғизистон оид ба аломатгузорӣ дар марзи давлатӣ таҳти роҳбарии муовинони нахуствазирони кишварҳо Муродалӣ Алимардон ва Токон Мамитов, ки рӯзи 7-уми январ дар шаҳри Душанбе доир гардид, масоили танзими вазъ ва ҳамкориҳои судманд дар марзи давлатӣ баррасӣ шуданд.
Дар мулоқот ҳамчунин масоили аломатгузорӣ дар марзи давлатӣ низ баррасӣ шуда, нақшаи вохӯриҳои ҳайатҳои ҳукуматӣ ва гурӯҳҳои корӣ оид ба ин масъала дар соли 2014 муайян карда шуданд.
