Аз 1-уми ферали соли ҷорӣ имомхатибони масоҷиди Тоҷикистон нахустин музди меҳнати расмии худро дастрас мекунанд.
Раиси Шӯрои уламои Тоҷикистон Саидмукаррам Абдуқодирзода имрӯз дар ин робита изҳор намуд, ки тибқи ҳисобҳои пешакӣ, ҳаҷми музди меҳнати роҳбари масҷиди марказӣ – 2 ҳазор сомонӣ, сархатиб – 1,5 ҳазор сомонӣ ва имомхатиб – 800 сомониро ташкил дода, дар маҷмӯъ ҳудуди 300 нафар ходими дин ба маоши доимӣ таъмин карда мешаванд.
Ба қавли муфтӣ, дар ин масъала имомхатибон бо Маркази исломӣ, Маркази исломӣ бо Кумитаи дин ва дар навбати худ Кумитаи дин бо Вазорати молия қарордод ба имзо мерасонанд. «Аммо таъкид месозам, ки ҳаҷми зикршудаи музди меҳнат алҳол комилан мушаххас нест», – иброз дошт ӯ.
Дар ҳамин ҳол, раиси Кумита Абдураҳим Холиқов дар ин маврид зикр кард, ки ин музди меҳнат набуда, як навъ дастгириест, ки онро худи имомхатибон дархост намуда буданд.
Ба қавли Абдуқодирзода, барои тамоми ходимони дин сарулибоси ягона муқаррар шуда, ранги он кабуд ва дорои рамзҳои миллӣ хоҳад буд. «Сарулибоси ягонаи имомхатибон дар корхонаи «Ёқут-2000» дӯхта шуда, он аз ҷониби Маркази исломӣ маъқул дониста шуд ва аллакай ҳафтаи оянда имом-хатибон сарулибоси ягонаро ба бар мекунанд», – гуфт муфтӣ.
