Дар вилояти Хатлон бо мақсади ҳавасмандгардонӣ ва ҷалби занҳо ба самти роҳбарии хоҷагиҳои деҳқонӣ-фермерӣ ва баланд бардоштани нақши фаъолияти соҳибкорӣ тавассути ба даст овардани замини саҳмӣ озмуни минтақавии «Зан соҳиби замин» баргузор мешавад.
Тавре ба Хабаргузории «Азия-Плюс» аз Ассотсиатсияи миллии соҳибкории хурд ва миёнаи Ҷумҳурии Тоҷикистон иттилоъ доданд, озмуни мазкур бо ибтикори Ассотсиатсиява дастгирии Oxfam дар Тоҷикистон доир мегардад.
«Меъёри асосии интихоби довталабон инҳоянд: Занҳои иштирокдор бояд аз 18-сола боло буда, дар қаламрави вилояти Хатлон зиндагӣ кунанд; сертификати амалкунандаи замин дошта бошанд, ё замони эълон шудани озмун барои гирифтани ин сертификат ба мақомоти дахлдори маҳалӣ муроҷиат карда бошанд; занҳое, ки дар қитъаи замини худ маҳсулоти кишоварзӣ ё дигар намуди маҳсулотро парвариш ё истеҳсол мекунанд; занҳое, ки барои коркарди маҳсулоти кишоварзӣ ва дигар намуди маҳсулот корхонаи хурди истеҳсолӣ таъсис додаанд; занҳое, ки саҳми худро дар рушди ҷойҳои кори иловагӣ, инфрасохтори иҷтимоӣ ва масъулиятнокии тиҷорат дар қаламрави вилояти Хатлон гузоштаанд», – зикр кард манбаъ.
Номи ғолибон дар маросими ҷоизасупорӣ, ки 4 апрели соли 2014 дар мехмонхонаи Hyatt Regency Dushanbe доир мегардад, эълон мешаванд. Ғолибони озмун бо диплом, мукофотҳои пулӣ ва дигар туҳфаҳои арзишманд қадр мегарданд. Мӯҳлати пешниҳоди ҳуҷҷатҳо ба озмун то 28 феврали соли 2014 мебошад.
