Душанбе. 14-уми август. ОИ «Азия-Плюс» – Пагоҳ дар боғи истироҳати назди кӯли «Комсомол»-и пойтахт намоишгоҳи ҷойҳои кории холӣ доир мегардад.
Муовини директори агентии ҳифзи иҷтимоӣ, шуғли аҳолӣ ва муҳоҷирати назди Вазорати меҳнат ва ҳифзи иҷтимоии аҳолӣ дар шаҳри Душанбе Сафаралӣ Ҳакимов ба мухбири ОИ «Азия-Плюс» хабар дод, ки дар намоишгоҳ беш аз 30 субъекти хоҷагидорӣ ва корхонаву муассисоти шаҳр иштирок хоҳанд кард. Ҳамчунин хоҳишмандон метавонанд ба курсҳои омӯзиши касб ва баланд бардоштани тахассуси касбӣ худро номнавис кунанд.
«Дар намоишгоҳ як қатор ширкатҳои Русия ширкат меварзанд, ки ба қувваи корӣ ниёз доранд ва ҷойҳои кории холӣ пешниҳод месозанд», – изҳор дошт С.Ҳакимов. Барои хоҳишмандон иштирокдорони намоишгоҳ дар пойтахт ё минтақаҳои дигари ҷумҳурӣ ҷойҳои кории холӣ пешниҳод хоҳанд кард.
