Шаҳрванди Тоҷикистон ба кӯшиши фурӯши миқдори ниҳоят зиёди маводи нашъаовар дар Русия гумонбар дониста мешавад.
Бино ба иттилои сомонаи расмии мақомоти прокуратураи Русия дар вилояти Брянск, шаҳрванди 34-солаи Тоҷикистон Боқӣ Алиқуловро ба он гумонбар медонанд, ки ӯ зимни иқомат дар ноҳияи Фокини шаҳри Брянск 4 кило маводи мухаддири сахттаъсири герроинро барои фурӯш омода кардааст, ки ин миқдор ниҳоят зиёд арзёбӣ мешавад.
Мутобиқи моддаи 228.1, қ. 5-и Кодекси ҷиноии Русия (Истеҳсоли ғайриқонунӣ, фурӯш ё интиқоли маводи нашъаовар дар ҳаҷми ниҳоят зиёд) барои содир кардани чунин ҷиноят аз ҷумла муҷозоти ҳабси абад низ пешбинӣ шудааст.
Мувофиқи хулосаи прокурор, нисбати Алиқулов чораи пешгирии таҳти ҳабс қарор доштан таъин шудааст.
Ёдрас мекунем, ки ахири моҳи декабри соли 2012 Хадамоти давлатии назорати маводи нашъаовари Русия дар бораи
боздошти гӯё наркобарони бузурги тоҷик
Атобек Гулмамадов дар Аморати Муттаҳидаи Араб (АМА) хабар дод, ки яке аз роҳбарони гурӯҳи бузурги байнулмилалии қочоқбарони нашъа ба шумор меравад.
Аввали моҳи феврали соли 2013 Гулмамадов ба Русия истирдод шуда, аввали моҳи март бошад, яке аз шабакаҳои муваффақи телевизионии Русия Вазорати корҳои хориҷии Тоҷикистонро ба он
гунаҳкор кард
, ки ба Аморати Муттаҳидаи Араб ҷиҳати ба Русия истирдод накардани кочоқбари маводи мухаддир Атобек Гулмамадов нота фиристодааст.
