Кумитаи забон ва истилоҳоти назди ҳукумати ҶТ на танҳо номи қахвахонаи CHIEF BURGER PIZZA»-ро ба «Бургер ва Питзо», балки навиштаҷоти ғизономаи онро ҳам тарҷума кард. Хабарнигори ОИ «Азия-Плюс» ба ин қахвахона рафта, бо ғизономаи нав шинос шуд. Дар ин ғизонома Chief Burger акнун «Бургери хосса аз номи Сардор» тарҷума шудааст.
Дар ғизонома Сheeseburger – «Бургер бо панир ва гӯши гов», Beef burger – «Бургер бо гӯшти гов», Special burger – «Бургери хосса» ва «Чай с лимоном» – «Чойи 3х1» зикр гардидааст.
Ёдрас мекунем, ки зимни нишасти хабарии имсола раиси Кумита забон ва истилоҳоти назди ҳукумати ҶТ Гавҳар Шарофзода изҳор намуда буд, ки дар асоси тавсияҳои гурӯҳи корӣ номгузории кошонаи ҳусни “Малина” ба “Малика” ва қавҳахонаи «CHIEF BURGER PIZZA» ба “Бургер ва питзо” иваз карда шуда, навиштаҷоти номи тарабхонаи “JAMOL” ба “Ҷамол” баргардонида шуд ва ғизономаи тарабхонаи “Ҷамол” ва қаҳвахонаи “Питсерия” ба забони давлатӣ тарҷума ва пешниҳод шуданд.
Ба гуфтаи ӯ, барои риоя нагардидани муқарророти Қонуни ҶТ “Дар бораи забони давлатии Тоҷикистон” соли сипаришуда 64 нафар тибқи моддаи 89-и Кодекси ҳуқуқвайронкунии маъмурӣ ҷарима гардидаанд. «Нисбати 5 нафар огоҳӣ дода шуда, ба 64 нафар ҷарима баста шуд. Маблағи ҷаримаҳо дар умум то имрӯз 37 ҳазору 600 сомониро ташкил кард», – гуфта буд раиси Кумита.
Шарофзода зикр карда буд, ки дар иртибот ба навиштаҷоти лавҳаю овезаҳо ва номгузории муасисаҳои савдо ва марказҳои хизматрасонӣ 12 санади огоҳӣ тартиб дода шудааст, ки мутобиқи он, барои бартараф намудани хатоҳо муҳлат муқарар гардидааст.
