Шоми имрӯз тамоми маҳаллаҳои аҳолинишини ноҳияҳои аз офати табииӣ осебдидаи Шӯрообод ва Восеъи вилояти Хатлон шабонарӯзӣ пурра бо нерӯи барқ таъмин карда мешаванд.
Директори корхонаи шабакаҳори барқи минтақаи Кӯлоб Мирзо Исмоилов ба «Азия-Плюс» дар ин робита иттилоъ дод, ки рӯзи 13-уми апрел бар асари боришоти шадид дар як қатор маҳаллаҳои аҳолинишини ин ноҳияҳо, ки ба фаромадани ярч боис гардиданд, дар маҷмӯъ ҳудуди 70 симчӯбҳои хатти интиқоли барқ хароб гардида, то 30 ҳазор нафар аз барқ маҳрум шуданд.
Ба қавли ӯ, гурӯҳи таъмиргарон дар маҳалҳо ва кормандони шабакаҳои барқ муваққатан тавонистаанд, ки фавран дар 80%-и минтақаҳои осебдида интиқоли барқро таъмин созанд.
«Мувофиқи фармони роҳбари ширкати «Барқи тоҷик» Аслиддин Гулмурод Назирзода имрӯз воридоти кӯмаки техникӣ ба минтақа низ оғоз гардид»», – иброз дошт номбурда.
Исмоилов ҳамчунин зикр кард, ки то шоми имрӯз ивази симчӯбҳои барқӣ ба пояҳои оҳану бетонӣ ва насби тамоми маҳаллаҳои аҳолинишин ба хатти интиқоли барқ ба итмом мерасад.
