Бо фармони Нусратулло Давлатзода, раиси Кумитаи андози назди ҳукумати ҶТ, Сироҷиддин Гулмуродов, ки тибқи баъзе маълумот ҷияни президенти ҶТ мебошад, сардори Раёсати андози вилояти Хатлон таъин шуд.
Тавре ба «Азия-Плюс» аз Кумитаи андози ҷумҳурӣ хабар доданд, Гулмуродов дар ин вазифа Саидислом Амировро иваз намудааст, ки дар дастгоҳи марказии Кумитаи андоз ба вазифаи муовини сардори Раёсати аудити дохилӣ таъин карда шудаст.
Қобили зикр аст, ки аз моҳи марти соли 2014 вазифаи сардори Раёсати аудити дохилии Кумитаи андозро Ашраф Гулов – домоди президент ва писари собиқ вазири энергетика ва саноати ҶТ Гул Шералӣ ба дӯш дорад. То ин таъинот Гулов дар мансаби сардори нозироти андозсупорандагони бузурги Кумитаи андоз кор мекард.
Дар Кумита зикр карданд, ки то ба ин мансаб таъин шудан Сироҷиддин Гулмуродов ба ҳайси муовини сардори Раёсати андози вилояти Хатлон фаъолият намуда, ду сол қабл Раёсати андози ноҳияи Ҷалолиддини Румии вилояти Хатлонро раҳбарӣ мекард.
Тибқи баъзе маълумот, Сироҷиддин Гулмуродов хеши наздик (ҷиян)-и президенти ҷумҳурӣ Эмомалӣ Раҳмон мебошад.
