Раиси шаҳри Душанбе Маҳмадсаид Убайдуллоев ба ифтихори 20-умин солгарди таъсисёбии нерӯҳои марзбонии Тоҷикистон тасмим гирифт, ки баҳри дастгирии Сарраёсати нерӯҳои марзбонии КДАМ-и ҷумҳурӣ 100 ҳазор сомонӣ маблағ ҷудо намояд.
Тавре ба «Азия-Плюс» як манбаъ аз мақомоти шаҳрдории пойтахт хабар дод, раиси шаҳр ба муовинон ва раисони ноҳияҳои пойтахт супориш додааст, ки ба тамоми қисмҳои низомии воқеъ дар қаламрави шаҳри Душанбе рафта, дар чорабиниҳои тантанавӣ ширкат варзанд.
«Ғайр аз ин, дар рӯзи таҷлили ҷашни 20-умин солгарди таъсисёбии нерӯҳои марзбонии кишвар мақомоти шаҳрдории пойтахт дар 7 қисми низомӣ барои сарбозону афсарон дастурхони идона ороста, дар иҷрои сарояндагони эстрадаи тоҷик барномахои консертӣ пешкаш мекунад», – гуфт манбаъ.
