Сафири ИМА дар Тоҷикистон Сюзан М. Эллиотт Форуми Соҳибкоронро, ки аз тарафи лоиҳаи USAID оид ба рушди савдо ва даромади Афғонистон ташкил карда шудааст, расман ифтитоҳ кард.
Бино ба иттилои сафоратхонаи ИМА дар Тоҷикистон, соҳибкорони тоҷикистонӣ дар ҳамҷоягӣ бо соҳибкорон аз Афғонистон, Қирғизистон ва Покистон дар шаҳри Душанбе имкониятҳои сармоягузорӣ ва додугирифти тиҷоратиро дар чор кишвари номбаршуда, баррасӣ мекунанд.
Чорабинии зерин аз ҷониби Агентии Амрико оид ба рушди байналмилалӣ (USAID) дар ҳамкорӣ бо Палатаи савдо ва саноати Ҷумҳурии Тоҷикистон, Палатаи савдо ва саноати шаҳри Кобул, Палатаи савдо ва саноати Қирғизистон, Палатаи савдо ва саноати муштараки Покистону Афғонистон ва Лоиҳаи Мусоидат ба рушди савдои Барномаи Милали Муттаҳид ташкил карда шудааст.
Тӯли ду даҳсолаи охир Осиёи Марказӣ ба яке аз минтақаҳои босуръат рушдкунанда мубаддал гашта, дар оянда инкишофи устуворонаи иқтисодии он пешбинӣ мешавад.
«Байни кишварҳои Осиёи Марказӣ ва Осиёи Ҷанубӣ имкониятҳои васеи тиҷоратии истифоданашуда мавҷуданд, ки аз он ҳар мамлакат метавонист самара гирад. Вазъи кунунӣ ҳолати бурднок барои ҳамаи тарафҳои манфиатдор аст», – қайд намуд сафир Эллиотт.
Илова ба вохӯрӣ ва гуфтушунидҳои тиҷоратии рӯ ба рӯ, ширкаткунандагои Форуми Душанбе бо мақсади шинос шудан бо ҷараёни истеҳсоли масолеҳи сохтмонӣ, саноати хӯрокворӣ ва саноати бофандагӣ ба чор ширкат ташриф меоваранд. Иштирокчиён доир ба созишномаҳои бисёрҷонибаи тиҷоративу транзитӣ, ки соддагардонии савдоро миёни Афғонистон, Покистон, Тоҷикистон ва Қирғизистон пешбинӣ мекунад, дастрасӣ пайдо мекунанд.
Лоиҳаи USAID оид ба рушди савдо ва даромади Афғонистон яке аз лоиҳаҳои сершумори кӯмакрасон мебошад, ки амалишавии он бо дастгирии мардуми Амрико имконпазир гашт. Аз соли 1992 инҷониб мардуми Амрико тавассути барномаҳо ва кӯмакҳои башардустона, барои дастгирӣ намудани ниҳодҳои демократӣ, соҳаи тандурустӣ, маориф ва рушди иқтисодии Тоҷикистон, маблағи беш аз 1 миллиард доллари ИМА-ро ҷудо намудааст.
