Муҳлати ҷамъбасти озмуни эҷодии «Эҷодиёти илҳомбахш» ба муносибати 90-умин солгарди мақоми пойтахтро соҳиб шудани шаҳри Душанбе то 1-уми октябр дароз карда шуд. Озмун аз ҷониби мақомоти шаҳрдории Душанбе эълон шуда буд.
Тавре ба «Азия-Плюс» аз мақомоти шаҳрдории пойтахт хабар доданд, аз ҷониби ҳайати ҳакамони озмун чунин тасмим гирифта шудааст. Қаблан эълон шуда буд, ки натиҷаҳои озмун санаи 13-уми июн ҷамъбаст карда мешаванд.
Ёдрас мекунем, ки бо мақсади эҷоди асарҳои назмиву насрӣ, барномаҳои радиоиву телевизионӣ, сенарияи баргузории намоиши театришуда ва фоторепортажҳо, ҳамчунин пешниҳоди фикру мулоҳизаҳои ҷолиб барои дар сатҳи баланди ғоявӣ ва бадеӣ таҷлил намудани 90- солагии пойтахт бо ибтикори раиси шаҳри Душанбе М. Убайдуллоев миёни эҷодкорон озмуни «Эҷодиёти илҳомбахш» эълон гардид. Баргузории озмун аз 1-уми апрел то 1-уми июни соли равон миёни журналистон ва адибон пешбинӣ шуда буд. Акнун ҷамъбасти он ба санаи то 1-уми октябр мавқуф гузошта шуд.
Ҳамчунин Убайдуллоев ба муҳосиботи шаҳрдорӣ дастур дода буд, ки аз ҳисоби фонди захиравии раиси Душанбе барои қадрдонии ғолибони озмун 50 ҳазор сомонӣ (беш аз 10 ҳазор доллари ИМА) маблағ ҷудо карда шавад. Ба ҳайати ҳакамони озмун раиси Иттиҳоди нависандагони Тоҷикистон Меҳмон Бахтӣ, президенти Академияи улуми ҶТ Фарҳод Раҳимов, вазири фарҳанги ҷумҳурӣ Шамсиддин Орумбеков шомиланд.
